ଆଫଗାନିସ୍ତାନରେ ଭୂକମ୍ପ ଝଟକା ଅନୁଭୂତ, ତିବ୍ରତା ୫.୮
1 min read
ନନ୍ଦିଘୋଷ ବ୍ୟୁରୋ: ଆପଗାନିସ୍ତାନରେ ଭୂକମ୍ପ ଅନୁଭୂତ । ଆଫଗାନିସ୍ତାନ-ତାଜିକିସ୍ତାନ ସୀମାନ୍ତ ଅଞ୍ଚଳରେ ୫.୮ ତୀବ୍ରତାର ଏକ ଭୂମିକମ୍ପ ଅନୁଭୂତ ହୋଇଛି । ଯାହାଫଳରେ କାଶ୍ମୀର ଏବଂ ଦିଲ୍ଲୀ-ଏନସିଆର ସମେତ ଉତ୍ତର ଭାରତର କିଛି ସ୍ଥାନରେ ଏହାର ପ୍ରଭାବ ଦେଖିବାକୁ ମିଳିଛି । ନ୍ୟାସନାଲ ସେଣ୍ଟର ଫର୍ ସିସମୋଲୋଜି (NCS) ଅନୁଯାୟୀ, ଭୂମିକମ୍ପଟି ଅପରାହ୍ନ ୧୨:୧୭ ମିନିଟରେ ଭୂପୃଷ୍ଠର ୮୬ କିଲୋମିଟର ଗଭୀରରେ ଅନୁଭୂତ ହୋଇଥିଲା। ଭୂକମ୍ପର କେନ୍ଦ୍ରସ୍ଥଳ ଆଫଗାନିସ୍ତାନ-ତାଜିକିସ୍ତାନ ସୀମାବର୍ତ୍ତୀ ଅଞ୍ଚଳରେ ଅବସ୍ଥିତ, ଯାହା ଭୂକମ୍ପ ପ୍ରବଣ ଅଞ୍ଚଳ ଭାବେ ପରିଚିତ ।
ଏହାସହିତ କାଶ୍ମୀର ଉପତ୍ୟକା ଏବଂ ଦିଲ୍ଲୀ-ଏନସିଆରରେ ମୃଦୁ ଭୂମିକମ୍ପ ଅନୁଭୂତ ହୋଇଥିଲା, ଯାହା ସ୍ଥାନୀୟ ବାସିନ୍ଦାଙ୍କ ମଧ୍ୟରେ ଆତଙ୍କ ସୃଷ୍ଟି କରିଛି । କାଶ୍ମୀରର ଏକ ଭିଡିଓରେ ଦେଖାଯାଇଛି ଯେ ଭୂମି ଥରିବା ପରେ ଲୋକମାନେ ଏକ କୋଠାରୁ ବାହାରକୁ ଧାଇଁ ଆସୁଛନ୍ତି ।
https://x.com/i/status/1913496949614903614
ଶ୍ରୀନଗରର ଜଣେ ବାସିନ୍ଦା କହିଛନ୍ତି, “ମୁଁ ଅଫିସରେ ଥିବା ସମୟରେ ଭୂମିକମ୍ପ ଅନୁଭବ କରିଥିଲି – ମୋ ଚେୟାର ଥରିବାକୁ ଲାଗିଲା। ଏହା ଏତେ ଶକ୍ତିଶାଳୀ ନଥିଲା। କୌଣସି କ୍ଷତି ହୋଇଛି କି ନାହିଁ ମୁଁ ନିଶ୍ଚିତ ନୁହେଁ, କିନ୍ତୁ ଏହି ଅଞ୍ଚଳରେ ଭୂମିକମ୍ପ ବହୁତ ସାଧାରଣ।” ତେବେ କାଶ୍ମୀରରୁ ଆଉ ଏକ ଭିଡିଓ ଆସିଛି ଯେଉଁଥିରେ ଭୂମିକମ୍ପ ପରେ ଘର ଭିତରେ ସିଲିଂ ଫ୍ୟାନ୍ ଦୋହଲିଥିଲା । ବର୍ତ୍ତମାନସୁଦ୍ଧା ଭୂକମ୍ପ ପାଇଁ କୌଣସି କ୍ଷୟକ୍ଷତିର ସୂଚନା ମିଳିନାହିଁ ।
