ସମାପ୍ତ ହେବକି ଋଷ-ୟୁକ୍ରେନ ଯୁଦ୍ଧ? ପୁଟିନଙ୍କୁ ଭେଟିଲେ ଇସ୍ରାଏଲ ପ୍ରଧାନମନ୍ତ୍ରୀ

ମସ୍କୋ: ରୁଷୋ-ୟୁକ୍ରେନ ଯୁଦ୍ଧ ମଧ୍ୟରେ ଇସ୍ରାଏଲର ପ୍ରଧାନମନ୍ତ୍ରୀ ନଫ୍ତାଲି ବେନେଟ୍ ମସ୍କୋରେ ରୁଷର ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ଭେଟିଛନ୍ତି। ତେବେ ଯୁଦ୍ଧ ଚାଲିଥିବାବେଳେ ନଫ୍ତାଲିଙ୍କ ଋଷ ଗସ୍ତ ବେଶ୍ ଗୁରୁତ୍ୱପୂର୍ଣ୍ଣ ବୋଲି କୁହାଯାଉଛି । ଏହାପୂର୍ବରୁ ଉଭୟ ନେତା ମଧ୍ୟ ଫୋନରେ ମଧ୍ୟ କଥା ହୋଇଥିଲେ। ବେନେଟ୍ ଓ ପୁଟିନଙ୍କ ମଧ୍ୟରେ ଯୁଦ୍ଧ ପପ୍ରସଙ୍ଗରେ ଗୁରୁତ୍ୱପୂର୍ଣ୍ଣ ଆଲୋଚନା ହୋଇପାରେ। ତେବେ ଚର୍ଚ୍ଚା ହେଉଛି ଯେ ଋଷ-ୟୁକ୍ରେନ ଯୁଦ୍ଧ ସମାପ୍ତିରେ ଇସ୍ରାଏଲ ଏକ ଗୁରୁତ୍ୱପୂର୍ଣ୍ଣ ଭୂମିକା ନେଇପାରେ । ଏଭଳି ପରିସ୍ଥିତିରେ ଇସ୍ରାଏଲକୁ ଏକ ସମ୍ଭାବ୍ୟ ମଧ୍ୟସ୍ଥି ଭାବରେ ଦେଖାଯାଉଛି|

ତେବେ ଏହା ପୂର୍ବରୁ  ଶନିବାର ଦିନ ଆମେରିକାର ବୈଦେଶିକ ମନ୍ତ୍ରୀ ଆଣ୍ଟୋନି ବ୍ଲିଙ୍କେନ୍ ପୋଲାଣ୍ଡ-ୟୁକ୍ରେନ ସୀମାରେ ୟୁକ୍ରେନ ବୈଦେଶିକମନ୍ତ୍ରୀ ଦିମିତ୍ରୀ କୁଲେବାଙ୍କୁ ଭେଟିଛନ୍ତି। ଏହି ଅବସରରେ ସେ କହିଛନ୍ତି ଯେ ମୁଁ ଆଶା କରୁଛି ଯେ ୟୁକ୍ରେନବାସୀଙ୍କ ବିଶ୍ୱାସ ରହିଛି ଯେ ତାଙ୍କ ବନ୍ଧୁ ରାଷ୍ଟ୍ର ସେମାନଙ୍କ ସହ ଠିଆ ହୋଇଛନ୍ତି। ଏହି ବୈଠକ ହେଉଛି ଏହାର ସ୍ପଷ୍ଟ ଉଦାହରଣ। କୋରଜୋଭା-କ୍ରାକୋୱେଟ୍ସ ସୀମାରେ କଡ଼ା ସୁରକ୍ଷା ଭିତରେ ଏହି ବୈଠକ ଅନୁଷ୍ଠିତ ହୋଇଥିଲା।

ଆସନ୍ତାକାଲି ରୁଷ-ୟୁକ୍ରେନ ତୃତୀୟ ରାଉଣ୍ଡ ଆଲୋଚନା

ଆସନ୍ତାକାଲି ଅର୍ଥାତ ମାର୍ଚ୍ଚ ୭ରେ ଋଷ ଏବଂ ୟୁକ୍ରେନ ମଧ୍ୟରେ ତୃତୀୟ ରାଉଣ୍ଡ ଆଲୋଚନା ହେବାର ସମ୍ଭାବନା ରହିଛି। ଗଣମାଧ୍ୟମ ରିପୋର୍ଟ ମୁତାବକ ୟୁକ୍ରେନ ତୃତୀୟ ପର୍ଯ୍ୟାୟ ଆଲୋଚନା ପାଇଁ ତାରିଖ ପ୍ରସ୍ତାବ ଦେଇଛି, କିନ୍ତୁ ଋଷ ଏପର୍ଯ୍ୟନ୍ତ କୌଣସି ପ୍ରତିକ୍ରିୟା ଦେଇ ନାହିଁ। ମାର୍ଚ୍ଚ ୪ରେ, ପୋଲାଣ୍ଡ-ବେଲାଋଷ ସୀମାନ୍ତରେ ଋଷ ଓ ୟୁକ୍ରେନ ପ୍ରତିନିଧିଙ୍କ ମଧ୍ୟରେ ଆଲୋଚନା ହୋଇଥିଲା । ଏଥିରେ ୟୁକ୍ରେନ ନାଗରିକଙ୍କ ସୁରକ୍ଷା ପାଇଁ ଉଭୟ ପକ୍ଷ ମଧ୍ୟରେ ସହମତି ହୋଇଥିଲା । ସାଧାରଣ ନାଗରିକଙ୍କ ସ୍ଥାନାନ୍ତର ପାଇଁ ଋଷ ଏବଂ ୟୁକ୍ରେନ ମିଳିତ ଭାବେ ବ୍ୟବସ୍ଥା କରିବାକୁ ସହମତ ହୋଇଥିଲେ।