ଜଗନ୍ନାଥ ମନ୍ଦିରରୁ ଖସିଲା ପଥର, ସୁରକ୍ଷା ନେଇ ଉଠିଲା ପ୍ରଶ୍ନ

ଖଲ୍ଲିକୋଟ: ଗଞ୍ଜାମ ଜିଲ୍ଲା ଖଲ୍ଲିକୋଟ ସହରରେ ଥିବା ଓଡ଼ିଶାର ଦ୍ବିତୀୟ ବୃହତ୍ତମ ଜଗନ୍ନାଥ ମନ୍ଦିରରୁ ଖସିଲା ପଥର । ତିନି ଶହ ବର୍ଷ ପୁରୁଣା ଏହି ଜଗନ୍ନାଥ ମନ୍ଦିରରୁ ପଥର ଖସିବା ପ୍ରଥମ ଘଟଣା ନୁହେଁ । ଏହା ପୂର୍ବରୁ ମଧ୍ୟ ମନ୍ଦିରରୁ ପଥର ଖସିଛି । ଏମିତି ସ୍ଥିତିରେ ମନ୍ଦିରର ସୁରକ୍ଷାକୁ ନେଇ ପ୍ରଶ୍ନ ଉଠିବାରେ ଲାଗିଛି ।

ଦୁଇ ବର୍ଷ ତଳେ ସିଂହଦ୍ୱାର ଗୁମୁଟରୁ ସାତ କିଲୋ ଓଜନର ଏକ ପଥର ଖସିଥିଲା  । ମନ୍ଦିରର ରକ୍ଷଣାବେକ୍ଷଣ ପାଇଁ ବିଭିନ୍ନ ମହଲରୁ ଦାବି ହେବା ପରେ ତତ୍କାଳୀନ ବିଜେଡି ସରକାରଙ୍କ ବହୁ ମନ୍ତ୍ରୀ, ପ୍ରଶାସକ ଓ ଏପରିକି ପୁରୀ ଗଜପତି ଦିବ୍ୟସିଂହ ଦେବ, ଏବେର ବିଜେପି ସରକାରଙ୍କ କେନ୍ଦ୍ରମନ୍ତ୍ରୀ, ବହୁ ମନ୍ତ୍ରୀ ଓ ବିଧାୟକମାନେ ପରିଦର୍ଶନ କରି ଫେରିଥିଲେ । ତେବେ ମୁଖ୍ୟ ମନ୍ଦିରର ଅଁଳାଶ୍ରୀ କେବଳ ମରାମତି ହୋଇଥିବା ବେଳେ କିଛି ଦିନ ପରେ ବନ୍ଧl ଯାଇଥିବା ବାଉଁଶ କାଢି ଦିଆଯାଇଥିଲା ।

ଦିନକୁ ଦିନ ମନ୍ଦିରର ଭାସ୍କର୍ଯ୍ୟ ସବୁ ନଷ୍ଟ ହେବାରେ ଲାଗିଛି । ରାଜ୍ୟ କିମ୍ବା କେନ୍ଦ୍ର ସରକାର ଦୃଷ୍ଟି ନ ଦେବା ଫଳରେ ମର୍ଦ୍ଦରାଜ ବଂଶର ଏହି ଅକ୍ଷୟ କୀର୍ତ୍ତି ଜରାଜୀର୍ଣ୍ଣ ହୋଇପଡୁଛି । ତୁରନ୍ତ ମନ୍ଦିରର ସୁରକ୍ଷା ପାଇଁ ଆବଶ୍ୟକ ପଦକ୍ଷେପ ନେବାକୁ ଅଞ୍ଚଳବାସୀ ଦାବି କରିଛନ୍ତି ।