ଗହଳି ମନା, ଏଥର ଘରେ ଖେଳନ୍ତୁ ହୋଲି…
ଭୁବନେଶ୍ୱର: ଆନନ୍ଦ ଉଲ୍ଲାସର ପର୍ବ ହୋଲିରେ ମନକୁ ଲଗାମ୍ ଦିଅନ୍ତୁ । କାରଣ ଟିକିଏ ଉତ୍ସାହ ଆପଣଙ୍କ ପାଇଁ ଆଣିପାରେ ବିପଦ । ସୁରକ୍ଷିତ ହୋଲି ଖେଳିବା ନେଇ ସ୍ୱାସ୍ଥ୍ୟ ସଚିବ ନିକୁଞ୍ଜ ଧଳ ପରାମର୍ଶ ଦେଇଛନ୍ତି । ମୁହଁରେ ରଙ୍ଗ ଲଗାନ୍ତୁ ନାହିଁ । ଛିଙ୍କ, କାଶ ଓ ସର୍ଦ୍ଦି ହୋଇଥିଲେ ହୋଲି ଖେଳନ୍ତୁନି । ଆଲିଙ୍ଗନ କିମ୍ବା କରମର୍ଦ୍ଧନ କରନ୍ତୁନି । ହୋଲିରେ ଦଳଗତ ଭାବେ ଏକତ୍ରିତ ହୁଅନ୍ତୁନି । ନିଜ ଘର ଓ ପରିବାର ସହିତ ରଙ୍ଗ ଖେଳିବାକୁ ସେ ପରାମର୍ଶ ଦେଇଛନ୍ତି ।
କରୋନା ପ୍ରଭାବରେ ହୋଲି ବଜାର ମାନ୍ଦା ରହିଥିବା ବେଳେ ଆଜି ଆଉ ୨ ଜଣ ସନ୍ଦିଗ୍ଧଙ୍କୁ ଏସସିବିରେ ଭର୍ତ୍ତି କରାଯାଇଛି । ଦୁଇ ଜଣ ସନ୍ଦିଗ୍ଧ ଓମାନ ଓ ଇଟାଲୀରୁ ଫେରିଛନ୍ତି । ସେମାନଙ୍କ ସ୍ୱାବ ସଂଗ୍ରହ କରି ପରୀକ୍ଷା ପାଇଁ ଆରଏମଆରସିକୁ ପଠାଯାଇଛି । ରିପୋର୍ଟ ଆସିଲା ପରେ କରୋନା ଆକ୍ରାନ୍ତ କି ନୁହେଁ ଜଣାପଡ଼ିବ ବୋଲି କହିଛନ୍ତି ଡିଏମଇଟିର ସିବିକେ ମହାନ୍ତି ।
ସେହିଭଳି କୁକୁଡ଼ା ଖାଇବା ଦ୍ୱାରା କରୋନା ବ୍ୟାପୁଥିବା ଖବରକୁ ସେ ଖଣ୍ଡନ କରିଛନ୍ତି । ଚିକେନ୍ ଦ୍ୱାରା କରୋନା ହେବା ଅମୂଳକ ଓ ଅବାସ୍ତବ । ଏନେଇ କୌଣସି ତଥ୍ୟ ଏଯାଏଁ ପ୍ରମାଣିତ ହୋଇନଥିବା ସେ କହିଛନ୍ତି ।
