Cabinet Decision: ରେଭେନ୍ସା ବିଶ୍ୱବିଦ୍ୟାଳୟ ଆକ୍ଟ-୨୦୦୫ ପ୍ରତ୍ୟାହାର, ସବୁ ବିଶ୍ୱବିଦ୍ୟାଳୟ ପାଇଁ ଗୋଟିଏ ଆକ୍ଚ
ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ବସିଥିବା ରାଜ୍ୟ କ୍ୟାବିନେଟ୍ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛି । ଶିକ୍ଷା କ୍ଷେତ୍ରକୁ ନେଇ ନିଆଯାଇଛି ଗୁରୁତ୍ୱପୂର୍ଣ୍ଣ ନିଷ୍ପତ୍ତି । ଏ ସମ୍ପର୍କରେ ମୁଖ୍ୟ ଶାସନ ସଚିବ ଅସିତ୍ ତ୍ରିପାଠୀ ପ୍ରେସମିଟରେ ସୂଚନା ଦେଇଛନ୍ତି । ରାଜ୍ୟର ସମସ୍ତ ପବ୍ଲିକ ବିଶ୍ୱବିଦ୍ୟାଳୟ ଓଡ଼ିଶା ବିଶ୍ୱବିଦ୍ୟାଳୟ ଆଇନ୍ ୧୯୮୯ ଅନ୍ତର୍ଭୂକ୍ତ ହୋଇଥିବା ବେଳେ ରେଭେନ୍ସା ପାଇଁ ୨୦୦୫ରେ ସ୍ୱତନ୍ତ୍ର ଆଇନ୍ ଆସିଥିଲା । ସରକାର ଏହାକୁ ପ୍ରତ୍ୟାହାର କରି ନେଇଛନ୍ତି । ଏଣିକି ଓଡ଼ିଶାର ସମସ୍ତ ବିଶ୍ୱବିଦ୍ୟାଳୟ ପାଇଁ ଏବେ ବିଶ୍ୱବିଦ୍ୟାଳୟ ଆଇନ୍ ୧୯୮୯ରେ ପରିଚାଳିତ ହେବ । ଓଡ଼ିଶା ବିଶ୍ୱବିଦ୍ୟାଳୟ ଆଇନ୍ ୧୯୮୯ ସେଥିରେ ଅନେକ ସଂଶୋଧନ ଅଣାଯାଇଛି ।
ବିଶ୍ୱବିଦ୍ୟାଳୟରେ ଥିବା ସିନେଟ ଓ ସିଣ୍ଡିକେଟ୍ ମଧ୍ୟରୁ ସିନେଟକୁ ଉଠାଇ ଦିଆଯାଇଛି । ସିଣ୍ଡିକେଟକୁ ବ୍ୟବସ୍ଥିତ କରିବାକୁ ସେଥିରେ କିଛି ପରିବର୍ତ୍ତନ ଅଣାଯାଇଛି । ବିଶ୍ୱବିଦ୍ୟାଳୟର ଭିସିଙ୍କ ଅଧିନରେ ଜଣେ ଏକାଡେମିସିଆନ୍ ରହିବେ । ଭାଇସ୍ ଚାନ୍ସଲରଙ୍କ କାର୍ଯ୍ୟକାଳ ବୃଦ୍ଧି ପାଇଛି । ଏଣିକି ଭିସି ଗୋଟିଏ ବିଶ୍ୱବିଦ୍ୟାଳୟରେ ୩ ବର୍ଷ ବଦଳରେ ୪ ବର୍ଷ ରହିବେ । ନିଯୁକ୍ତି ପାଇଁ ସର୍ବାଧିକ ବୟସ ସୀମା ୬୭ ରଖାଯାଇଛି । ସେମାନଙ୍କୁ ପୁନଃ ନିଯୁକ୍ତି ବିଶ୍ୱବିଦ୍ୟାଳୟରେ ଦିଆଯିବ ନାହିଁ ।
ସବୁ ବିଶ୍ୱବିଦ୍ୟାଳୟ ପାଇଁ ଅଧ୍ୟାପକ ଚୟନ ଓଡ଼ିଶା ପବ୍ଲିକ ସର୍ଭିସ୍ କମିଶନ କରିବେ । ଏବଂ ଅଣଶିକ୍ଷକ ନିଯୁକ୍ତି ଷ୍ଟେଟ ସିଲେକ୍ସନ ବୋର୍ଡ କରିବ । ଯାହାକି ଉଚ୍ଚଶିକ୍ଷା ବିଭାଗ ଅଧୀନରେ ରହିଛି । ପ୍ରତିବର୍ଷ ବିଶ୍ୱବିଦ୍ୟାଳୟ ଗୁଡ଼ିକର ଅଡିଟ୍ ରିପୋର୍ଟ ବିଧାନସଭାରେ ଉପସ୍ଥାପନ ହେଉଥିଲା । ତାହାକୁ ସର୍ବସାଧାରଣଙ୍କ ପାଇଁ ଉପଲବ୍ଧ ପାଇଁ ୟୁନିଭରସିଟି ୱେବସାଇଟରେ ୩ ବର୍ଷ ପାଇଁ ରଖାଯିବ ।
