ଖାଲି ସିନ୍ଦୁକ ଓ ଆଲମୀରାକୁ ରଖାଯିବା ପରେ ମରାମତି ହେବ ରତ୍ନଭଣ୍ଡାର
1 min read
ପୁରୀ: ଶ୍ରୀମନ୍ଦିର ରତ୍ନଭଣ୍ଡାର ମରାମତି ନେଇ ଆଜି ତଦାରଖ କମିଟି ବୈଠକ ବସି ବିଭିନ୍ନ ନିଷ୍ପତ୍ତି ନିଆଯାଇଛି । ମରାମତି ପୂର୍ବରୁ ପ୍ରଥମେ ଖାଲି ଥିବା ସିନ୍ଦୁକ ଓ ଆଲମୀରାଗୁଡିକୁ କୌଣସି ଏକ ରୁମକୁ ସ୍ଥାନାନ୍ତର କରାଯିବ । ଏହି ସିନ୍ଦୁକ ଓ ଆଲମୀରାକୁ ରଖିବା ପାଇଁ ଶ୍ରୀମନ୍ଦିର ପ୍ରଶାସନ ଏକ ରୁମ ବାହାର କରିବେ । ସେଠାରେ ରତ୍ନଭଣ୍ଡାରରୁ ବାହାରିଥିବା ଖାଲି ସିନ୍ଦୁକ ଓ ଆଲମୀରାକୁ ରଖାଯିବା ପରେ ମରାମତି କାମ ନେଇ ନିଷ୍ପତ୍ତି ନିଆଯିବ ।
ମରାମତି ଲାଗି ଉନ୍ନତ ଟେକ୍ନୋଲଜି ପ୍ରୟୋଗ ପାଇଁ ପରିଚାଳନା କମିଟିକୁ ଅନୁମୋଦନ କରାଯାଇଛି । ପରିଚାଳନା କମିଟି ସରକାରଙ୍କୁ ସୁପାରିସ କରି ନିଷ୍ପତ୍ତି ନେବେ । ମରାମତି ସରିଲେ ଯାଇଁ ରତ୍ନ ଗଣତି ମଣତି କାମ କରାଯିବ । ଲେଜର ସ୍କାନିଂ ହେବ କି କଣ ସେ ନେଇ ଏଏସଆଇ ସହ ଆଲୋଚନା କରାଯିବ । ନୀତିକାନ୍ତି କିମ୍ବା ଦର୍ଶନରେ ଯେପରି ବାଧା ନଉପୁଜିବ ସେଥିପ୍ରତି ଧ୍ଯାନ ଦିଆଯିବ ।
ସମସ୍ତ କାର୍ଯ୍ୟଧାରା ପୂର୍ବରୁ ଛତିଶା ନିଯୋଗ ସହ ମଧ୍ଯ ଆଲୋଚନା ହେବ ବୋଲି ରତ୍ନଭଣ୍ଡାର ମରାମତି ନେଇ ତଦାରଖ କମିଟି ବୈଠକ ପରେ କହିଛନ୍ତି ଅଧ୍ଯକ୍ଷ ଜଷ୍ଟିସ ବିଶ୍ବନାଥ ରଥ । ବୈଠକରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢ଼ୀ, ରତ୍ନ ଭଣ୍ଡାର ଟିମର ସଦସ୍ୟଙ୍କ ସହ ASIର ଉଚ୍ଚସ୍ତରୀୟ ଟିମ ଉପସ୍ଥିତ ଥିଲେ
