ଶ୍ରୀଲଙ୍କା ପ୍ରଧାନମନ୍ତ୍ରୀ ମହିନ୍ଦା ରାଜପାକ୍ଷେଙ୍କ ଇସ୍ତଫା
କଲୋମ୍ୱୋ: ଶ୍ରୀଲଙ୍କାରେ ଦେଖାଦେଇଥିବା ଆର୍ଥିକ ସଂକଟ ମଧ୍ୟରେ ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି ମହିନ୍ଦା ରାଜପାକ୍ଷେ । ଏ ନେଇ ଖବର ସରବରାହ ସଂସ୍ଥା ଏଏନ୍ଆଇ ପକ୍ଷରୁ ପ୍ରକାଶ କରାଯାଉଛି । ଇସ୍ତଫା ନଦେବା ଲାଗି ରାଜପାକ୍ଷେ ଜିଦ ଧରିଥିବା ବେଳେ ଆନ୍ଦୋଳନକାରୀଙ୍କ ଆଗରେ ମୁଣ୍ଡ ନୁଆଁଇବାକୁ ପଡ଼ିଛି ।
ଦୁଇ ଦିନ ପୂର୍ବେ ଶ୍ରୀଲଙ୍କାରେ ପୁଣି ଜରୁରିକାଳୀନ ପରିସ୍ଥିତି ଜାରି କରାଯାଇଥିଲା । ଦ୍ୱିତୀୟ ଥର ଲାଗି ଏହି ପଦକ୍ଷେପ ନେଇଛନ୍ତି ରାଷ୍ଟ୍ରପତି ଗୋଟାବାୟା ରାଜପାକ୍ଷେ । ନିରାପତ୍ତା ବାହିନୀ କବଳକୁ ଯାଇଛି ଦେଶର କ୍ଷମତା । ସାରାଦେଶରେ ସରକାର ବିରୋଧୀ ଆନ୍ଦୋଳନ ନିୟନ୍ତ୍ରଣ ବାହାରକୁ ଯିବାରୁ ରାଷ୍ଟ୍ରପତି ନେଇଛନ୍ତି ଏହି ପଦକ୍ଷେପ । ରାଷ୍ଟ୍ରପତିଙ୍କ ଇସ୍ତଫା ଦାବିରେ ଦେଶର ଶତାଧିକ ଟ୍ରେଡ୍ ୟୁନିୟନ ଦେଶବ୍ୟାପୀ ହରତାଳ କରିବା ପରେ ରାଷ୍ଟ୍ରପତି ବାଧ୍ୟ ହୋଇ ଜରୁରୀକାଳୀନ ପରିସ୍ଥିତି ଜାରି କରିଥିଲେ ।
ସଂସଦ ଭବନ ଆଗରେ ଚାଲିଥିବା ଆନ୍ଦୋଳନକୁ ଦମନ କରିବା ଲାଗି ପୋଲିସ ଲୁହବୁହା ଗ୍ୟାସ ଓ ଜଳତୋପ ପ୍ରୟୋଗ କରିଛି । ସେପଟେ ସାରା ଦେଶରେ ଖାଦ୍ୟ, ଇନ୍ଧନ, ମେଡିସିନର ଅଭାବ ଅଧିକ ଘନୀଭୂତ ହୋଇଛି । ୧୯୪୮ରେ ସ୍ୱାଧୀନତା ପରେ ସବୁଠାରୁ ଗୁରୁତର ଆର୍ଥିକ ସଂକଟ ବଳୟକୁ ଠେଲି ହୋଇଯାଇଥିବା ଶ୍ରୀଲଙ୍କାର ସ୍ଥିତି ଦିନକୁ ଦିନ ଅଧିକ ଉଦବେଗଜନକ ହେବାରେ ଲାଗିଛି । ଗତକାଲି ହୋଇଥିବ ଦେଶବ୍ୟାପୀ ଧର୍ମଘଟରେ ଲକ୍ଷ ଲକ୍ଷ କର୍ମଚାରୀ ଓ ଶ୍ରମିକ ଯୋଗ ଦେଇଥିବାରୁ ଉତ୍ପାଦନ ପ୍ରକ୍ରିୟା ଠପ୍ ହେବା ସହ ଯାନବାହନ ଚଳାଚଳ ବନ୍ଦ ହୋଇଯାଇଥିଲା । ସେପଟେ ରାଷ୍ଟ୍ରପତି ଗୋଟାବାୟା ରାଜପାକ୍ଷେ ଇସ୍ତଫା ଦେବାକୁ ଅଗ୍ରାହ୍ୟ କରିଛନ୍ତି ।
