ବିପଦ ବେଳେ ସାହାଯ୍ୟ କଲା ଭାରତ, କଥା ରଖିଲାନି ଶ୍ରୀଲଙ୍କା
1 min read
ନୂଆଦିଲ୍ଲୀ: ସମସ୍ତ ସାହାଯ୍ୟ ସତ୍ତ୍ବେ ଭାରତର କଥା ରଖିଲେନି ଶ୍ରୀଲଙ୍କା ସରକାର । ଚୀନର ସ୍ପାଏ ସିପ୍କୁ ଅଟକିବା ଲାଗି ଶ୍ରୀଲଙ୍କା ସରକାର ଦେଲେ ଗ୍ରୀନ ସିଗନାଲ । ପ୍ରତିରକ୍ଷା କାରଣରୁ ଭାରତ ଏହାର ପ୍ରତିବାଦ କରିଥିଲେ ମଧ୍ୟ ଏହାକୁ ଗୁରୁତ୍ବ ଦେଇନାହାନ୍ତି ଶ୍ରୀଲଙ୍କା ସରକାର । ଚୀନର ୟୁଆନ ଓ୍ବାଙ୍ଗ-୫ ଜାହାଜ ଯଦି ଶ୍ରୀଲଙ୍କାର ହମ୍ବନଟୋଟା ବନ୍ଦରରେ ରୁହେ ତେବେ ଭାରତର ପ୍ରତିରକ୍ଷା ଗବେଷଣା, ଏପିଜେ ଅବଦୁଲ କଲାମ ଦ୍ବୀପର ଗୋପନ ତଥ୍ୟ, କ୍ଷେପଣାସ୍ତ୍ର କାର୍ଯ୍ୟକ୍ରମ ଆଦି ସମ୍ପର୍କରେ ଚୀନ ସମସ୍ତ ତଥ୍ୟ ପାଇବ ବୋଲି ଭାରତ ଉଦବେଗ ପ୍ରକାଶ କରିଆସୁଥିଲା ।
ଏହା ସହ ଭାରତ ମହାସାଗର ଓ ଶ୍ରୀଲଙ୍କାରେ ଚୀନର ପ୍ରାଧାନ୍ୟ ବିସ୍ତାରକୁ ଭାରତ ସନ୍ଦିଗ୍ଧ ଦୃଷ୍ଟିରେ ଦେଖୁଛି । ଗତ ୧୧ ତାରିଖରେ ଏହି ଜାହାଜ ଶ୍ରୀଲଙ୍କା ବନ୍ଦରରେ ଲାଗିବାର ଥିଲା । ମାତ୍ର ଶ୍ରୀଲଙ୍କାର ପ୍ରଥମେ ପ୍ରତିବାଦ ଯୋଗୁ ଏହି ତାରିଖ ଘୁଞ୍ଚିଛି । ଆସନ୍ତା ୧୬ରୁ ୨୨ ତାରିଖ ଯାଏ ଜାହାଜଟି ବନ୍ଦରରେ ଲାଗିବ । ଜାହାଜ ସମ୍ପର୍କରେ ଶ୍ରୀଲଙ୍କା ସରକାରଙ୍କ କୂଟନୈତିକ ମଞ୍ଜୁରୀ ମିଳିଛି । ବର୍ତ୍ତମାନ ଜାହାଜଟି ଶ୍ରୀଲଙ୍କାଠାରୁ ୧ ହଜାର କିଲୋମିଟର ଦୂରରେ ରହିଛି ଏବଂ ଧୀର ଧୀରେ ହମ୍ବନଟୋଟା ବନ୍ଦର ଆଡକୁ ଅଗ୍ରସର ହେଉଛି ।
