ପଞ୍ଚାୟତ ନିର୍ବାଚନ ନେଇ ଏସ୍ଆରସିଙ୍କ ଗାଇଡଲାଇନ୍: ସମାବେଶକୁ ନା, ସୋସିଆଲ ମିଡିଆରେ ହେବ ପ୍ରଚାର
ଭୁବନେଶ୍ୱର: ପଞ୍ଚାୟତ ନିର୍ବାଚନ ପାଇଁ ଜାରି ହେଲା ଗାଇଡଲାଇନ୍ । କୋଭିଡ ସଂକ୍ରମଣ ଦୃଷ୍ଟିରେ ରଖି ଗାଇଡଲାଇନ୍ ଜାରି କଲେ ଏସଆରସି । ସାମାଜିକ ଦୂରତା ସହିତ ମାସ୍କକୁ ବାଧ୍ୟତାମୂଳକ କରାଯାଇଛି । ଗଣତି କେନ୍ଦ୍ର ଆଗରେ ଏକାଠି ହେବାକୁ ବାରଣ କରାଯାଇଛି । ହୋଇପାରିବନି ଶୋଭାଯାତ୍ରା, ରାଲି, ସମାବେଶ । କେବଳ ସୋସସିଆ ମିଡିଆ ଓ ବୈଦ୍ୟୁତିକ ଗଣମାଧ୍ୟମ ପ୍ରଚାରକୁ ଅନୁମତି ଦିଆଯାଇଛି ।
ଡୋର ଟୁ ଡୋର କ୍ୟାମ୍ପେନରେ ସର୍ବାଧିକ ୫ଜଣଙ୍କୁ ଅନୁମତି ରହିଛି । ସମସ୍ତେ ମାସ୍କ ବ୍ୟବହାର କରିବା ବାଧ୍ୟତାମୂଳକ କରାଯାଇଛି । ଭୋଟର ସହିତ ନିର୍ବାଚନ ପ୍ରକ୍ରିୟାରେ ଅଂଶଗ୍ରହଣ କରୁଥିବା ସମସ୍ତେ ମାସ୍କ ପିନ୍ଧିବେ । ନିର୍ବାଚନ ପରିଚାଳନାରେ ଅଂଶଗ୍ରହଣ କରୁଥିବା ବ୍ୟକ୍ତି ଡବଲ୍ ଡୋଜ୍ ଟିକା ନେବେ । ଏହା ସହିତ କୋଭିଡ ଗାଇଡଲାଇନ୍ ପାଳନ ଉପରେ ସ୍ୱତନ୍ତ୍ର ନଜର ରଖାଯିବ । ପ୍ରକ୍ରିୟାରେ ସାମିଲ ଥିବା କୌଣସି ଅଧିକାରୀଙ୍କର ଯଦି ସାମାନ୍ୟ ଲକ୍ଷଣ ଥାଏ ତାଙ୍କୁ ନିର୍ବାଚନ ପ୍ରକ୍ରିୟାରୁ ବାଦ୍ ଦିଆଯିବ । ଭୋଟ ଦାନ କେନ୍ଦ୍ରକୁ ସାନିଟାଇଜ୍ କରାଯିବା ସହିତ ସମସ୍ତଙ୍କର ଥର୍ମାଲ ସ୍କ୍ରିନିଂ କରାଯିବ ।
ସମସ୍ତ ଉପକରକୁ ମଧ୍ୟ ସାନିଟାଇଜ୍ କରାଯିବ । କଣ୍ଟେନମେଣ୍ଟ ଜୋନରୁ ଆସିଥିବା କୌଣସି ବ୍ୟକ୍ତିଙ୍କୁ ନିର୍ବାଚନ ପ୍ରକ୍ରିୟାରେ ସାମିଲ କରାଯିବନି । ନୋମିନେସନ ସମୟରେ ପ୍ରାର୍ଥୀଙ୍କ ସହିତ କେବଳ ଜଣେ ନାମାଙ୍କନ ଦାଖଲ କରିବାକୁ ଯାଇପାରିବେ । ଏହି ସମୟରେ କେବଳ ଗୋଟିଏ ଗାଡିକୁ ଅନୁମତି ମିଳିବ । କୋଭିଡ ସଂକ୍ରମିତ ପ୍ରାର୍ଥୀ ନିଜ ପ୍ରସ୍ତାବକ ଜିରିଆରେ ନାମାଙ୍କନ ପତ୍ର ଦାଖଲ କରିବେ । କଣ୍ଟେନମେଣ୍ଟ ଜୋନ୍ରେ ଥିବା ବୁଥ୍କୁ ସ୍ଥାନାନ୍ତର କରାଯିବ । ଅମାନିଆଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ହେବ ବୋଲି ଗାଇଡଲାଇନରେ କୁହାଯାଇଛି ।
