ଦୁଷ୍କର୍ମକାରୀକୁ ଧରିବାକୁ ୪ଜଣିଆ ଟିମ୍ ଗଠନ କଲା ପୋଲିସ
ପୁରୀ: ନାବାଳିକା ଦୁଷ୍କର୍ମ ଘଟଣାକୁ ଗୁରୁତର ସହ ନେଇଛି ପୋଲିସ୍ । ଅଭିଯୁକ୍ତ ଫେରାର ଥିବାରୁ ତାକୁ ଗିରଫ କରିବାକୁ ୪ଟି ଟିମ୍ ଗଠନ କରିଛି ପୋଲିସ୍ । ସେପଟେ କଟକ ମେଡିକାଲରେ ଚାଲିଛି ନାବାଳିକାଙ୍କ ଚିକିତ୍ସା । ତାଙ୍କୁ ପ୍ରାଥମିକତା ଭିତ୍ତିରେ ଚିକିତ୍ସା ଯୋଗାଇ ଦେବା ସହ ଅଭିଯୁକ୍ତଙ୍କୁ କଠୋରରୁ କଠୋର ଦଣ୍ଡ ଦେବାକୁ ବିଭିନ୍ନ ମହଲରୁ ଦାବି ହୋଇଛି ।
କୁଆଡେ ଗଲା ନାବାଳିକା ଦୁଷ୍କର୍ମ ଅଭିଯୁକ୍ତ ? ଘଟଣାକୁ ଗୁରୁତର ସହ ନେଲା ପୋଲିସ୍ । ଅଭିଯୁକ୍ତକୁ ଧରିବାକୁ ୪ଟି ଟିମ୍ ଗଠନ । ପୁରୀ ଟାଉନଥାନା ଅଞ୍ଚଳରେ ୫ ବର୍ଷର ନାବାଳିକ ଦୁଷ୍କର୍ମ ଘଟଣାରେ ଫେରାର ଅଭିଯୁକ୍ତକୁ ଧରିବାକୁ ଜାଲ ବିଛାଇଛି ପୋଲିସ୍ । ତୁରନ୍ତ ଗିରଫ କରିବାକୁ ୪ ଟି ଟିମ୍ ଗଠନ କରିବା ସହ ଟାଉନଥାନା ଅଧିକାରୀ ଓ ଏସପିଙ୍କ ନେତୃତ୍ବରେ ଚଢଉ ଜାରି ରହିଛି । ଜିଲ୍ଲା ବାହାରର ପୋଲିସ୍ ସହ ଯୋଗାଯୋଗ କରାଯାଇଛି । ପୀଡିତା ଓ ଅଭିଯୁକ୍ତଙ୍କ ପରିବାର ସହ ଆଲୋଚନା କରି ଆଇନ ଅନୁଯାୟୀ ସମସ୍ତ ବ୍ୟବସ୍ଥା ଗ୍ରହଣ କରାଯାଇଥିବା କହିଛନ୍ତି ପୁରୀ ଏସପି ।
ଛାତଉପରେ ଏକୁଟିଆ ପାଇ ନାବାଳିକାଙ୍କୁ ଦୁଷ୍କର୍ମ କରିଥିଲା ଅଭିଯୁକ୍ତ । ଗୁରୁତର ନାବାଳିକାଙ୍କ ଏବେ କଟକ ମେଡିକାଲରେ ଚାଲିଛି ଚିକିତ୍ସା । ସେପଟେ ଘଟଣାକୁ ବିଭିନ୍ନ ମହଲରୁ ନିନ୍ଦା କରାଯିବା ସହ ପୀଡାତାଙ୍କ ପରିବାରକୁ କ୍ଷତିପୂରଣ ଓ ଅଭିଯୁକ୍ତ ବିରୋଧରେ କଠୋର କାର୍ଯ୍ୟାନୁଷ୍ଠାନ ପାଇଁ ବିଭିନ୍ନ ମହଲରେ ଦାବି ହୋଇଛି । ପିଲାଟିର ଅବସ୍ଥା ଗୁରୁତର ଥିବାରୁ ପ୍ରାଥମିକତା ଭିତ୍ତିରେ ତାର ଚିକିତ୍ସା କରିବାକୁ ସାଧାରଣରେ ଦାବି ହୋଇଛି ।
