ପୁରୀରେ ସେବାୟତଙ୍କୁ କରୋନା ନେଇ ବଢୁଛି ଚିନ୍ତା, ଆଜିଠାରୁ ଘରଘର ବୁଲି ସର୍ଭେ କରିବ ସ୍ୱତନ୍ତ୍ର ସ୍ୱାସ୍ଥ୍ୟ ଟିମ୍

ପୁରୀ: ପୁରୀରେ ଚିନ୍ତା ବଢାଇଲାଣି କରୋନା । ବିଶେଷକରି ଶ୍ରୀମନ୍ଦିର ସେବାୟତଙ୍କ ସଂକ୍ରମଣ ଚିନ୍ତା ବଢାଇଛି। କିଛି ସେବାୟତ ମଧ୍ୟ କରୋନାରେ ପ୍ରାଣ ହରାଇଛନ୍ତି । ତେଣୁ ଆଜିଠାରୁ ସ୍ୱତନ୍ତ୍ର ସ୍ୱାସ୍ଥ୍ୟ ଟିମ୍ ସେବାୟତଙ୍କ ଘର ଘର ବୁଲି ସର୍ଭେ କରିବ । ଏହି ଟିମରେ ଏଏନଏମ, ଆଶା ଓ ଜେଟିପିଙ୍କୁ ନେଇ କୋଭିଡ ସର୍ଭେ ଟିମ ଗଠନ କରାଯାଇଛି । ଯେଉଁମାନଙ୍କର ଥଣ୍ଡା, ଜ୍ୱର, କାଶ ଆଦି ଲକ୍ଷଣ ଆଦି ଥିବ, ସେମାନଙ୍କୁ ଚିକିତ୍ସା ଯୋଗାଇ ଦିଆଯିବ ।

ଏଥିପାଇଁ ଉତ୍କଳ ହିନ୍ଦୀ ବିଦ୍ୟାପୀଠରେ ଚିକିତ୍ସା ପାଇଁ ବ୍ୟବସ୍ଥା କରାଯାଉଛି । ସୋମବାର, ବୁଧବାର, ଶନିବାର ଦିନ ୧୧ଟାରେ ୨ଟା ଯାଏଁ ଏହି ବ୍ୟବସ୍ଥା କରାଯିବ । କୋଭିଡ କେୟାର ସେଣ୍ଟର କରାଯାଇଥିବା ହୋଟେଲ ରକୱେରେ ୮୦ ଜଣଙ୍କର ଚିକିତ୍ସା କରାଯାଉଥିବା ବେଳେ ନୀଳାଚଳ ଭକ୍ତ ନୀବାସରେ ମଧ୍ୟ ସେବାୟତ ରହିଛନ୍ତି । ଆବଶ୍ୟକ ପଡିଲେ ଭୁବନେଶ୍ୱର ସ୍ଥାନାନ୍ତର କରାଯାଉଛି । ବର୍ତମାନ ସ୍ଥିତିରେ ସେବାୟତମାନେ କିଭଳି ସୁରକ୍ଷିତ ରହିବେ ସେନେଇ ସମସ୍ତ ବ୍ୟବସ୍ଥା ଶ୍ରୀମନ୍ଦିର ପ୍ରଶାସନ ପକ୍ଷରୁ ଗ୍ରହଣ କରାଯାଉଛି ବୋଲି କହିଛନ୍ତି ଶ୍ରୀମନ୍ଦିର ଉନ୍ନୟନ ପ୍ରଶାସକ ।