ସ୍ପେନରେ ଭୟଙ୍କର ବନ୍ୟା; ମୃତ୍ୟୁସଂଖ୍ୟା ୧୫୦କୁ ବୃଦ୍ଧି

ନନ୍ଦିଘୋଷ ବ୍ୟୁରୋ: ସ୍ପେନରେ ତାଣ୍ଡବ ରଚୁଛି ବନ୍ୟା । ଏହି ପ୍ରଳୟକାରୀ ବନ୍ୟାରେ ଚାଲିଗଲାଣି ୧୫୦ରୁ ଉର୍ଦ୍ଧ୍ବ ନିରୀହଙ୍କ ଜୀବନ । ବନ୍ୟା ବିଭୀଷିକାରେ ଏକାଧିକ ନିଖୋଜ ଥିବାବେଳେ ଏବେବି ଜାରି ରହିଛି ଉଦ୍ଧାର କାର୍ଯ୍ୟ । ବନ୍ୟାରେ ଆହୁରି ମୃତ୍ୟୁସଂଖ୍ୟା ବଢିବାର ଆଶଙ୍କା ରହିଛି । ତେବେ ବିପନ୍ନଙ୍କୁ ସହାୟତା ଯୋଗାଇ ଦେବାକୁ ସ୍ପେନରେ ଏକ ଜରୁରୀକାଳୀନ କମିଟି ଗଠନ କରାଯାଇଛି । ଉଦ୍ଧାର ପାଇଁ କର୍ମକର୍ତ୍ତାଙ୍କ ସମେତ ୧୧୦୦ସେନାଙ୍କୁ ନିୟୋଜିତ କରାଯାଇଛି ।

ବର୍ତ୍ତମାନ ସୁଦ୍ଧା ଏହି ବନ୍ୟା ସ୍ପେନର ସବୁଠାରୁ ଭୟଙ୍କର ବନ୍ୟାର ଆଖ୍ୟା ଦିଆଯାଇଛି । ଦକ୍ଷିଣ-ପୂର୍ବ ସ୍ପେନର ଭାଲେନସିଆ ସହରରେ ପରିସ୍ଥିତି ଗୁରୁତର।  ପ୍ରବଳ ବର୍ଷା ଯୋଗୁ ଅନେକ ଅଞ୍ଚଳରେ ବନ୍ୟା ପରିସ୍ଥିତି ସୃଷ୍ଟି ହୋଇଛି। ଏହି ବନ୍ୟାରେ ଭାଲେନସିଆରେ କେବଳ ୧୫୫ଜଣଙ୍କର ମୃତ୍ୟୁ ହୋଇଥିବା ନିଶ୍ଚିତ କରାଯାଇଛି । ବାଦଲଫଟା ବର୍ଷା ଯୋଗୁ ଏଭଳି ଭୟଙ୍କର ସ୍ଥିତି ସ୍ପେନରେ ଉପୁଜିଛି । ବନ୍ୟାରେ ହଜାର ହଜାର ଲୋକ ବାସହରା ହୋଇଯାଇଛନ୍ତି । ସ୍ପେନର ମାଲାଗା ସହ ନିକଟବର୍ତ୍ତୀ ଅଞ୍ଚଳରେ ଗତ ୨୯ ତାରିଖଠୁ ପ୍ରବଳ ବର୍ଷା ଅନୁଭୂତ ହେଉଥିବାରୁ ସେଠାରେ ହଠାତ୍ ବନ୍ୟା ମାଡିଆସିଥିଲା। ବନ୍ୟା ଏତେ ଭୟଙ୍କର ଥିଲା ଯେ କେହି କିଛି ଭାବିବା ପୂର୍ବରୁ ସଙ୍ଗେ ସଙ୍ଗେ ପାଣି ମାଡି ରାସ୍ତାଘାଟ, ଘରେ ଜଳାର୍ଣ୍ଣବ ସ୍ଥିତି ଉପୁଜି ଥିଲା । ହଠାତ୍ ପାଣି ମାଡି ଆସିବାରୁ ଅନେକ ଜଣଙ୍କ ମୃତ୍ୟୁ ହୋଇଥିବା ବେଳେ ଅନେକ ନିଖୋଜ ଥିବା ଜଣାପଡ଼ିଛନ୍ତି।

ସ୍ପେନର ରାଷ୍ଟ୍ରପତି ପେଡ୍ରୋ ସାନେଜ୍ କହିଛନ୍ତି ଯେ ବନ୍ୟା ଯୋଗୁଁ ଅନେକ ସହର ପ୍ରଭାବିତ ହୋଇଛି । ପୀଡିତ ତଥା ନିଖୋଜ ଲୋକଙ୍କୁ ଖୋଜିବା ଆମର ପ୍ରାଥମିକତା ତେଣୁ ଆମେ ସେମାନଙ୍କ ପରିବାରକୁ ସାହାଯ୍ୟ କରିବା ବୋଲି ପ୍ରଧାନମନ୍ତ୍ରୀ ପେଡ୍ରୋ ସଞ୍ଚେଜ ଗୁରୁବାର ଭାଲେନ୍ସିଆରେ ଆଞ୍ଚଳିକ କର୍ତ୍ତୃପକ୍ଷ ଏବଂ ଜରୁରୀକାଳୀନ ସେବା ସହ ଆଲୋଚନା କରିବା ପରେ କହିଛନ୍ତି। ଲୋକଙ୍କୁ ଘର ଓ କାରରୁ ଉଦ୍ଧାର କରିବା ପାଇଁ ସେ ନିର୍ଦ୍ଦେଶ ଦେଇଛନ୍ତି । ଏଥିସହିତ ବନ୍ୟାରେ କ୍ଷତିଗ୍ରସ୍ତ ଲୋକଙ୍କୁ ସରକାରୀ ସହାୟତା ଯୋଗାଇ ଦିଆଯିବ ବୋଲି ଘୋଷଣା କରିଛନ୍ତି ।