ପାରାଦୀପ: ପୂଜା ପାଣି ଛିଞ୍ଚି ଦେବାରୁ ମାଆକୁ ହାଣିଦେଲା ପୁଅ । ପାରାଦୀପ ଭୂତମୁଣ୍ଡାଇ ଗାଁ କୁମ୍ଭାରସାହିରେ ବୀଭତ୍ସ ହତ୍ୟା । ସାମାନ୍ୟ କଥାରୁ ମାଆକୁ ହାଣିଦେଲା ମାନସିକ ବିକୃତ ପୁଅ । ମୃତ ମା’ ସୁଲୋଚନା ଦେବୀ ନୂଆଗଡ଼ ସ୍କୁଲର ଶିକ୍ଷୟିତ୍ରୀ । ସକାଳୁ ପୂଜା ସାରି ପୁଅ ଅଂଶୁମାନ ଉପରକୁ ପୂଜା ପାଣି ଛିଞ୍ଚିଥିଲେ । ଏଥିରେ ରାଗିଯାଇ ପୁଅ ଅଂଶୁମାନ ମାଆର ମୁଣ୍ଡକୁ ହାଣି ଦେଇଥିଲା । ଅଂଶୁମାନ ସୁଲୋଚନାଙ୍କ ସାନ ପୁଅ । ଘଟଣାସ୍ଥଳରେ ଲକ୍ ଥାନା ପୋଲିସ ଓ ପାରାଦୀପ ଅତିରିକ୍ତ ଏସପି ପହଞ୍ଚି ତଦନ୍ତ କରୁଛନ୍ତି । ସାଇଣ୍ଟିଫିକ ଟିମ୍କୁ ଖବର ଦିଆଯାଇଛି।
ସକାଳ ୫.୩୦ ମଧ୍ୟରେ ଏହି ବିଭତ୍ସ ହତ୍ୟାକାଣ୍ଡ ଘଟାଇଛି ଅଂଶୁମାନ। ଏକ କଟୁରୀରେ ସୁଲୋଚନାଙ୍କ ମୁଣ୍ଡକୁ ହାଣି ଟିକ୍ ଟିକ୍ କରିବା ପରେ ଘର ଭିତରକୁ ପଳାଇ କବାଟ ଦେଇଥିଲା। ଘଟଣାସ୍ଥଳରେ ଲକ୍ ଥାନା ପୋଲିସ ପହଞ୍ଚି ଛାତ ଦେଇ ଘର ଭିତରକୁ ପଶି ଅଂଶୁମାନଙ୍କୁ କାବୁ କରିଛି। ତେବେ ଅଂଶୁମାନ ଜଣେ ମେଧାବୀ ଛାତ୍ର ଥିଲେ ଏବଂ ସେ ଇଞ୍ଜିନିୟରିଂ ପଢ଼ିଛନ୍ତି। ଇଞ୍ଜିନିୟରିଂ ସମୟରେ ତାଙ୍କର ମାନସିକ ବିକୃତି ଦେଖା ଦେଇଥିଲା ଏବଂ ଏଥିପାଇଁ ସେ ଦୈନିକ ମେଡିସିନ ଖାଉଥିଲେ। ଗତକାଲି ତାଙ୍କ ଆଇ ମାଙ୍କ ପ୍ରଥମ ଶ୍ରାଦ୍ଧବାର୍ଷିକୀ ଥିବାରୁ, ତାଙ୍କୁ କାର୍ଯ୍ୟ ବ୍ୟସ୍ତତା ଭିତରେ ମେଡିସିନ ଦିଆଯାଇ ନଥିବା ସୂଚନା ମିଳିଛି। ଅଂଶୁମାନକୁ ଥାନାରେ ଅଟକ ରଖାଯାଇଥିବା ବେଳେ, ସାଇଣ୍ଟିଫିକ୍ ଟିମ୍ ତଦନ୍ତ କରିବା ପରେ ପ୍ରକୃତ ତଥ୍ୟ ସାମ୍ନାକୁ ଆସିବ ।
