ବିମାନରେ ସ୍ମୃତି ଇରାନୀଙ୍କୁ ଘେରିଲେ କଂଗ୍ରେସ ନେତ୍ରୀ: ଦରଦାମ୍ ବୃଦ୍ଧି ନେଇ କଲେ ଏଭଳି ପ୍ରଶ୍ନ
1 min read
ଗୌହାଟୀ: ବିମାନ ଯାତ୍ରା ବେଳେ ହଟହଟା ହେଲେ କେନ୍ଦ୍ରମନ୍ତ୍ରୀ । କଂଗ୍ରେସ ନେତ୍ରୀଙ୍କ ପ୍ରଶ୍ନବାଣରେ କେନ୍ଦ୍ରମନ୍ତ୍ରୀ ଘାଇଲା । LPG, ପେଟ୍ରୋଲ, ଡିଜେଲ ଦାମ ବୃଦ୍ଧିକୁ ନେଇ କେନ୍ଦ୍ରମନ୍ତ୍ରୀ ସ୍ମୃତି ଇରାନୀଙ୍କୁ ଗୌହାଟି ବିମାନବନ୍ଦରରେ ଘେରିଲେ ମହିଳା କଂଗ୍ରେସ ଅଧ୍ୟକ୍ଷା ନିତା ଡି’ସୁଜା । ଗୌହାଟୀ ଏୟାରପୋର୍ଟରେ ବିମାନରୁ ଓହ୍ଲାଇବା ବେଳେ କଂଗ୍ରେସ ନେତ୍ରୀ କେନ୍ଦ୍ରମନ୍ତ୍ରୀଙ୍କୁ ଘେରିଥିଲେ ।
ଦରଦାମ ବୃଦ୍ଧିକୁ ନେଇ କେନ୍ଦ୍ରମନ୍ତ୍ରୀଙ୍କୁ ପ୍ରଶ୍ନ କରିବାକୁ ପ୍ରଥମେ ସେ ଏହାକୁ ଏଡ଼ାଇ ଦେଇଥିଲେ । ପରେ ମାଗଣା କରୋନା ଟିକା ଓ ରାଶନ ଯୋଗାଣ ଯୋଗୁଁ ଦରଦାମ ବଢୁଥିବା କହିଥିଲେ । କଂଗ୍ରେସ ନେତ୍ରୀ ଏହି ୧ ମିନିଟ ୧୧ ସେକେଣ୍ଡର ଏକ ଭିଡିଓ ନିଜ ଟ୍ୱିଟର ହ୍ୟାଣ୍ଡେଲରେ ପୋଷ୍ଟ କରିଛନ୍ତି । ନିତାଙ୍କ ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହେଉଥିବା ବେଳେ ତାଙ୍କ ପୋଷ୍ଟରେ ଅନେକ ୟୁଜର୍ସ ଦରବୃଦ୍ଧିକୁ ନେଇ କେନ୍ଦ୍ରକୁ ସମାଲୋଚନା କରିଛନ୍ତି । ସେହିପରି ଅନେକ ୟୁଜର୍ସ ନିତା ଡିସୁଜାଙ୍କୁ ପ୍ରଶଂସା ମଧ୍ୟ କରିଛନ୍ତି ।
ଅପରପକ୍ଷରେ ଗ୍ୟାସ୍ ଦର ଏତେ ଉଚ୍ଚରେ ପହଞ୍ଚିଲାଣି ଯେ, ଏବେ ଦେଶର ଏଲ୍ପିଜି ଦର ବିଶ୍ୱରେ ମହଙ୍ଗା । ଦେଶ ବାହାରେ ଗ୍ୟାସ୍ ସିଲିଣ୍ଡର ପିଛା ୭ରୁ ୮ ଟଙ୍କା ଟିକସ ନିଆଯାଉଛି । ଅଥଚ ଭାରତରେ ଉତ୍ପାଦ ଶୁଳ୍କ ଓ ସେସ୍ ବାବଦରେ ସିଲିଣ୍ଡର ପିଛା ଆଦାୟ ହେଉଛି ୨୫୦ରୁ ୩୦୦ ଟଙ୍କା । ଏମିତି ଟ୍ୟାକ୍ସ ଲଦି ୭ ବର୍ଷ ଭିତରେ ପେଟ୍ରୋଲ୍, ଡିଜେଲ୍ ଓ ଗ୍ୟାସ୍ ଉପରୁ କେନ୍ଦ୍ର ସରକାର ଆଦାୟ କଲେଣି ୨୬ ଲକ୍ଷ କୋଟି ଟଙ୍କା । ତୈଳ ଓ ଗ୍ୟାସ ଦର ନିୟନ୍ତ୍ରଣ ନ କରି ବିପଣନକାରୀ କମ୍ପାନୀଙ୍କୁ ଖୁଲମଖୋଲା ଛାଡ଼ି ଦେଇଛନ୍ତି କେନ୍ଦ୍ର ସରକାର । ରାଜସ୍ୱ ସଂଗ୍ରହ ପାଇଁ ବିକଳ୍ପ ବାଟ ବାହାର ନ କରି ଖାଉଟିଙ୍କୁ ହନ୍ତସନ୍ତ କରୁଛି କେନ୍ଦ୍ର ।
