ରାଜନୀତି ମଇଦାନରେ ବୀରାପ୍ପାନଙ୍କ ଝିଅ ବିଦ୍ଯାରାଣୀ

କ୍ରିଷ୍ଣଗିରି: ଲୋକସଭା ନିର୍ବାଚନ ଲାଗି ପ୍ରଚାର ଜୋରଦାର। ମଇଦାନରେ ହାଇଭୋଲଟେଜ ଫାଇଟ। ଅବତୀର୍ଣ୍ଣ ହୋଇଛନ୍ତି ବିଭିନ୍ନ ଦଳର ରାଜନେତା। ସେପଟେ ସାରା ଦେଶକୁ ଦିନେ ଚହଲାଇଦେଇଥିବା ଜଙ୍ଗଲ ତସ୍କର ବୀରାପ୍ପାନଙ୍କ ଝିଅ ବିଦ୍ଯାରାଣୀ ବି ପରୀକ୍ଷା କରୁଛନ୍ତି ଭାଗ୍ୟ।

ତାମିଲନାଡୁ କ୍ରିଷ୍ଣଗିରି ଲୋକସଭା ଆସନରୁ ସେ ନାମ୍ ତାମିଲାର କାଚି ବା ଏନଟିକେ ଦଳରୁ ହୋଇଛନ୍ତି ପ୍ରାର୍ଥୀ। ସ୍ଥାନୀୟ ଅଞ୍ଚଳର କୃଷକ ଓ ମହିଳାଙ୍କ ବିକାଶ ଲାଗି ସେ କାର୍ଯ୍ୟ କରିବେ ବୋଲି କହିଛନ୍ତି। ସେ କହିଛନ୍ତି- ଲୋକଙ୍କ ମୁଖପାତ୍ର ହେବାକୁ ସେ ପ୍ରସ୍ତୁତ। କ୍ରିଷ୍ଣଗିରି ଅଞ୍ଚଳରେ ପର୍ଯ୍ୟାପ୍ତ ଚାଷଜମି ରହିଛି। ହେଲେ ପାଣି ନାହିଁ। ଅନେକ ଶିକ୍ଷିତ ଯୁବକଯୁବତୀ ବେକାର ଅଛନ୍ତି। ଯଦି ତାଙ୍କୁ ପାର୍ଲାମେଣ୍ଟ ଯିବା ଲାଗି ସୁଯୋଗ ମିଳେ ତେବେ ଏସବୁ ସମସ୍ଯାର ସମାଧାନ ଲାଗି ସେ କାର୍ଯ୍ୟ କରିବେ। ଯଦି କୌଣସି ଦଳ ଏହି ସବୁ ସମସ୍ଯାର ସମାଧାନ କରିବା ଲାଗି ଆଗେଇ ଆସେ ତେବେ ସେହି ଦଳର ପ୍ରାର୍ଥୀଙ୍କୁ ସେ ସମର୍ଥନ କରିବାକୁ ପ୍ରସ୍ତୁତ ବୋଲି କହିଛନ୍ତି ବିଦ୍ଯାରାଣୀ।