ସୀମାରେ ସ୍ଥିତି ବିଗାଡୁଛି ଚୀନ, ବୈଦେଶିକ ମନ୍ତ୍ରାଳୟର ଭର୍ତ୍ସନା

ନୂଆଦିଲ୍ଲୀ: ସୀମାରେ ସ୍ଥିତି ବିଗାଡୁଛି ଚୀନ । ଗତ ଛଅ ମାସ ଧରି LACରେ ଯେଉଁ ସ୍ଥିତି ଉପୁଜିଛି ଏଥିପାଇଁ ଚୀନ ସରକାର ହିଁ ଦାୟୀ । ଏହା ଦ୍ୱାରା ସୀମା ନୀତି ଉଲ୍ଲଂଘନ ହେଉଥିବା କହିଛି ଭାରତର ବୈଦେଶିକ ମନ୍ତ୍ରାଳୟ । LACରେ ଚୀନର ମନମାନି ଫଳରେ ଦ୍ୱିପାକ୍ଷିକ ଶାନ୍ତି ଭଙ୍ଗ ହେବା ସହ ପ୍ରୋଟକଲର ଉଲ୍ଲଂଘନ ମଧ୍ୟ ହେଉଛି ।

ଦୁଇ ଦେଶ ମଧ୍ୟରେ ୧୯୯୩ ଏବଂ ୧୯୯୬ରେ ହୋଇଥିବା ଦ୍ୱିପାକ୍ଷିକ ଚୁକ୍ତି ମାନୁ ନାହାଁନ୍ତି ଚୀନ ସରକାର । ଏଣୁ ବେଜିଂ ନିଜର ନୀତିରେ ପରିବର୍ତ୍ତନ କରିବାର ଯଥେଷ୍ଟ ଆବଶ୍ୟକତା ରହିଛି ବୋଲି ଭାରତର ବୈଦେଶିକ ମନ୍ତ୍ରାଳୟ ପକ୍ଷରୁ କୁହାଯାଇଛି ।

ଭାରତ ଓ ଚୀନ ମଧ୍ୟରେ ବର୍ଷ ବର୍ଷ ଧରି ସୁ-ସମ୍ପର୍କ ରହି ଆସିଛି, ହେଲେ ଏବେ ସୀମାରେ ଚୀନ ସରକାରଙ୍କ ବିସ୍ତାରବାଦୀ ନୀତି ଅନେକ ସମସ୍ୟା ସୃଷ୍ଟି କରିଛି । ଗତ କିଛି ମାସ ଧରି ପୂର୍ବ LACରେ ଭାରତ ଓ ଚୀନ ମଧ୍ୟରେ ସୀମା ବିବାଦ ଲାଗି ରହିଛି । ଉଭୟ ଦେଶ ମଧ୍ୟରେ ଅନେକ ଥର ଆଲୋଚନା ହୋଇଥିଲେ ମଧ୍ୟ ସମାଧାନର ବାଟ ଫିଟିପାରୁନି ।