ଜବରଦସ୍ତ କରାଇଲେ ମହିଳା ଏସଆଇଙ୍କ ଗର୍ଭନଷ୍ଟ, ପ୍ରେମ-ପ୍ରତିଶ୍ରୁତି-ପ୍ରତାରଣ.. ଜାଣନ୍ତୁ ପୁରା କାହାଣୀ…..
ଜଗତସିଂହପୁର: ବିବାହ ପ୍ରତିଶ୍ରୁତି ଦେଇ ଜନୈକ ପୋଲିସ ଏସଆଇ ମହିଳା ପୋଲିସ ଏସଆଇଙ୍କୁ ଗର୍ଭବତୀ କରି ପରବର୍ତ୍ତୀ ସମୟରେ ତାଙ୍କର ଗର୍ଭ ନଷ୍ଟ କରିଥିବା ଅଭିଯୋଗ ହୋଇଛି । ଅଭିଯୁକ୍ତ ଏସ ଆଇ ଓ ତାଙ୍କ ସମ୍ପର୍କୀୟ ବଟିକା ଦେଇ ମହିଳା ଏସଆଇଙ୍କ ଗର୍ଭ ନଷ୍ଟ କରିଛନ୍ତି । ପିଡୀତା ଏସ ଆଇ ଆଜି ଜଗତସିଂହପୁର ଏସ ପି ଙ୍କୁ ଭେଟି ଅଭିଯୋଗ କରିବା ସହ ଜଗତସିଂହପୁର ଥାନାର ଦ୍ୱାରସ୍ଥ ହୋଇଛନ୍ତି । ଜଗତସିଂହପୁର ପୋଲିସ ଅଭିଯୋଗ ଆଧାରରେ ମାମଲା ରୁଜୁ କରି ତଦନ୍ତ ଆରମ୍ଭ କରିଛି । ମହିଳା ଏସଆଇ ଜଣକ ମୟୂରଭଞ୍ଜ ଜିଲ୍ଲାର ଅଟନ୍ତି ।
ସେ ଗଲା ଦୁଇ ବର୍ଷ ତଳେ ପୁରୀରେ ରଥଯାତ୍ରା ଡିଉଟି ରେ ଯାଇଥିଲେ। ସେହି ସମୟରେ ତାଙ୍କ ବ୍ୟାଚର ଜଣେ ପୋଲିସ ଅଧିକାରୀଙ୍କ ସହ ତାଙ୍କର ଦେଖା ସାକ୍ଷାତ ହୋଇଥିଲା । ଉକ୍ତ ପୁଲିସ ଅଧିକାରୀ ଏବେ ପାରାଦୀପ ଥାନାରେ ଏସ ଆଇ ଭାବେ କାର୍ଯ୍ୟରତ ଅଛନ୍ତି । ତାଙ୍କ ନାମ ରଘୁନାଥ ବେହେରା । ପୁରୀ ରଥଯାତ୍ରା ସମୟରେ ଏମାନଙ୍କ ମଧ୍ୟରେ ଘନିଷ୍ଠତା ବଢିବା ପରେ ରଘୁନାଥ ବିବାହର ପ୍ରତିଶ୍ରୁତି ଦେଇଥିଲେ। ଏହା ପରେ ମିଳମିଶା ଓ ଦେଖା ସାକ୍ଷାତ ମଧ୍ୟ ବଢିଥିଲା । ଗଜପତି, ଭୁବନେଶ୍ୱର ଭଳି ବିଭିନ୍ନ ସ୍ଥାନକୁ ସେମାନେ ଏକାଠି ବୁଲିବାକୁ ମଧ୍ୟ ଯାଇଛନ୍ତି । ତେବେ ଏହାମଧ୍ୟରେ ଦୁହିଁଙ୍କ ମଧ୍ୟରେ ଶାରିରୀକ ସମ୍ପର୍କ ମଧ୍ୟ ଗଢି ଉଠିଥିଲା । ସେ ଗର୍ଭବତୀ ମଧ୍ୟ ହୋଇଥିଲେ ।
ଏକଥା ରଘୁନାଥ ଜାଣିବା ପରେ ତାଙ୍କୁ ଗର୍ଭନିରୋଧକ ବଟିକା ଦେଇ ତାଙ୍କ ଗର୍ଭ ନଷ୍ଟ କରିଥିଲେ । ତେବେ ଏବେ ସେ ବିବାହ ପାଇଁ ମନା କରୁଛନ୍ତି ଓ ଧରା ଛୁଆଁ ଦେଉନାହାଁନ୍ତି । ଏଭଳି ଅଭିଯୋଗ ମହିଳା ଏସଆଇ କରିଛନ୍ତି । ଅଭିଯୋଗ ଆସିବା ପରେ ଜଗତସିଂହପୁର ଥାନା ଅଧିକାରୀ ରଜନୀକାନ୍ତ ମିଶ୍ର ଅଭିଯୁକ୍ତ ରଘୁନାଥ ବେହେରାଙ୍କ ନାମରେ ମାମଲା ରୁଜୁକରି ତଦନ୍ତ ଆରମ୍ଭ କରିଦେଇଛନ୍ତି। ଅନ୍ୟପକ୍ଷରେ ମହିଳାଙ୍କୁ ଡାକ୍ତରୀ ପରୀକ୍ଷା ପାଇଁ ପଠାଯାଇଛି । ଘଟଣା ମଧ୍ୟରେ ଏକ ନୂଆ ଅଭିଯୋଗ ମଧ୍ୟ ସାମ୍ନାକୁ ଆସିଛି । ଅଭିଯୋଗ ଏହା ଯେ ଏସଆଇ ରଘୁନାଥ ଉକ୍ତ ମହିଳାଙ୍କୁ ତାଙ୍କ ଅନ୍ତରଙ୍ଗ ମୁହୂର୍ତ୍ତର ଭିଡିଓ ସୋସିଆଲ ମିଡିଆରେ ଅପଲୋଡ୍ କରିବା ନେଇ ଧମକ ଦେଉଛନ୍ତି ।
