ନନ୍ଦିଘୋଷ ବ୍ୟୁରୋ: ବାଂଲାଦେଶ ଫେରିବାକୁ ଶେଖ୍ ହସିନାଙ୍କ ଯୋଜନାକୁ ନେଇ ଏବେ ଚର୍ଚ୍ଚା ଜୋର ଧରିଛି। ଭାରତରେ ରହୁଥିବା ପୂର୍ବତନ ପ୍ରଧାନମନ୍ତ୍ରୀ ହସିନା ଡିସେମ୍ବରରେ ନିଜ ଦେଶକୁ ଫେରିବାକୁ ଘୋଷଣା କରିଛନ୍ତି। ହେଲେ ତାଙ୍କ ଫେରିବା ରାସ୍ତା ଏତେ ସହଜ ନୁହେଁ। ଏବେ ତାଙ୍କ ପାସପୋର୍ଟ ଓ ଜାତୀୟ ପରିଚୟପତ୍ରକୁ ନେଇ ବିବାଦ ଦେଖାଦେଇଛି।
ବାଂଲାଦେଶ ସରକାର ହସିନାଙ୍କୁ ନୂଆ ପାସପୋର୍ଟ ଓ ଜାତୀୟ ପରିଚୟପତ୍ର ଦେବାକୁ ମନା କରିଥିବା ଦାବି କରାଯାଇଛି। ଏହାପରେ ଆୱାମୀ ଲିଗ୍ ତାଙ୍କ ଦେଶକୁ ଫେରାଇ ଆଣିବା ପାଇଁ ନୂଆ ଯୋଜନା କରୁଥିବା ଖବର ଆସିଛି। ତେବେ ୨୦୨୪ ଛାତ୍ର ଆନ୍ଦୋଳନ ହିଂସାତ୍ମକ ପ୍ରଦର୍ଶନ ପରେ ଭାରତ ପଳାଇ ଆସିଥିବା ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନା ପୁଣି ଥରେ ନିଜ ଦେଶକୁ ଫେରିବାକୁ ପ୍ରସ୍ତୁତ ହେଉଥିବାବେଳେ ସେ ନୂଆଦିଲ୍ଲୀ ସ୍ଥିତ ବାଂଲାଦେଶ ଦୂତାବାସରେ ନୂଆ ପାସପୋର୍ଟ ଓ ଜାତୀୟ ପରିଚୟ ପତ୍ର (NID) ଯୋଗାଇ ଦେବାକୁ ଅନୁରୋଧ କରିଛନ୍ତି ।
ଶେଖ ହସିନା ନିଜ ଦେଶକୁ ଫେରିବା ପାଇଁ ଏକ ବଡ଼ ରଣନୀତି ପ୍ରସ୍ତୁତ କରୁଥିବା ଜଣାପଡିଛି। ସବୁ ଆଇନଗତ ପଦକ୍ଷେପ ଓ ବିପଦକୁ ଖାତିର ନକରି ସେ ଆସନ୍ତା ଡିସେମ୍ବର ୨୦୨୬ ସୁଦ୍ଧା ଢାକା ଫେରିବାକୁ ଲକ୍ଷ୍ୟ ରଖିଛନ୍ତି।
ରିପୋର୍ଟ ଅନୁସାରେ, ହସିନାଙ୍କ ଓକିଲ ପୁଣିଥରେ ବାଂଲାଦେଶ ସରକାରଙ୍କୁ ନୋଟିସ୍ ପଠାଇବେ। ଏହାର ଜବାବ ନମିଳିଲେ ଡିସେମ୍ବର ୨୦ କିମ୍ବା ୨୧ ତାରିଖ ଆଖପାଖରେ ବେନାପୋଲ ସୀମା ଦେଇ ପାଦରେ ଚାଲି ଚାଲି ବାଂଲାଦେଶ ପ୍ରବେଶ କରିବାର ଯୋଜନା ଥିବା ରିପୋର୍ଟରେ କୁହାଯାଇଛି। ଏହି ସମୟରେ ଆୱାମୀ ଲିଗ୍ର ବହୁ ସମର୍ଥକ ତାଙ୍କ ସହ ରହିବାର ଯୋଜନା ଥିବା ମଧ୍ୟ ଦାବି କରାଯାଇଛି।
ଅନ୍ୟପଟେ ବାଂଲାଦେଶର ତାରିକ୍ ରହମାନ ସରକାର ହସିନାଙ୍କ ପ୍ରତ୍ୟର୍ପଣ ଦାବି କରୁଛନ୍ତି। ତାଙ୍କ ବିରୋଧରେ ଅନେକ ମାମଲା ରହିଛି ଏବଂ କିଛି ମାମଲାରେ ମୃତ୍ୟୁଦଣ୍ଡ ମଧ୍ୟ ଶୁଣାଯାଇଛି। ଏପରି ସ୍ଥିତିରେ ହସିନାଙ୍କ ଫେରିବାକୁ ନେଇ ଭାରତ ଓ ବାଂଲାଦେଶ ମଧ୍ୟରେ କୂଟନୈତିକ ଚର୍ଚ୍ଚା ମଧ୍ୟ ଗୁରୁତ୍ୱ ନେଇଛି।
ଅନ୍ୟପଟେ ଶେଖ ହସିନା ସ୍ପଷ୍ଟ କରିଛନ୍ତି ଯେ ତାଙ୍କୁ ମୃତ୍ୟୁଦଣ୍ଡର ସମ୍ମୁଖୀନ ହେବାକୁ ପଡ଼ୁ କିମ୍ବା ଢାକାରେ ପହଞ୍ଚିବାମାତ୍ରେ ଗିରଫ କରାଯାଉ, ସେ ପଛଘୁଞ୍ଚା ଦେବେ ନାହିଁ। ନିଜ ଦେଶର ଲୋକଙ୍କୁ ଦୂରରୁ କଷ୍ଟ ପାଉଥିବାର ସେ ଆଉ ଦେଖିପାରିବେ ନାହିଁ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି।
ତେବେ ହସିନାଙ୍କ ଫେରିବା ଯୋଜନା କେବଳ ରାଜନୈତିକ ପ୍ରସଙ୍ଗ ନୁହେଁ, ବରଂ ବାଂଲାଦେଶର ଆଗାମୀ ରାଜନୀତି ଉପରେ ମଧ୍ୟ ଏହାର ପ୍ରଭାବ ପଡ଼ିପାରେ। ଏବେ ସମସ୍ତଙ୍କ ନଜର ଡିସେମ୍ବରରେ ହସିନାଙ୍କ ପରବର୍ତ୍ତୀ ପଦକ୍ଷେପ ଉପରେ। ୨୦୨୪ ଛାତ୍ର ଆନ୍ଦୋଳନ ସମୟର ହିଂସାକାଣ୍ଡକୁ ନେଇ ତାଙ୍କ ଅନୁପସ୍ଥିତିରେ ମୃତ୍ୟୁଦଣ୍ଡ ଶୁଣାଇଥିଲେ। ଏଭଳି ସ୍ଥିତିରେ ତାଙ୍କର ସ୍ୱଦେଶ ପ୍ରତ୍ୟାବର୍ତ୍ତନ ଖବର ସବୁଠି ଚର୍ଚ୍ଚାର ବିଷୟ ପାଲଟିଛି।
