AICC ସଭାପତି ରେସରେ ଖାଡଗେ, ଥରୁର ଭରିଲେ ନାମାଙ୍କନ

ନୂଆଦିଲ୍ଲୀ: କଂଗ୍ରେସ ଅଧ୍ୟକ୍ଷ ନିର୍ବାଚନ । ଆଜି ପ୍ରାର୍ଥିପତ୍ର ଦାଖଲର ଶେଷ ଦିନରେ ନୂଆ ଟୁଇଷ୍ଟ । ପ୍ରାର୍ଥୀ ନହୋଇ ପ୍ରସ୍ତାବକ ହେବେ ଦିଗବିଜୟ ସିଂ । G-23 ମେମ୍ବର ତଥା ବରିଷ୍ଠ ନେତା ମଲ୍ଲିକାର୍ଜୁନ ଖାଡଗେ ରେସରେ ସାମିଲ ହୋଇଥିବା ବେଳେ ଦିଗବିଜୟ ରେସରୁ ଓହରି ଯାଇଛନ୍ତି । ଏହାଛଡ଼ା ସେ ଖାଡଗେଙ୍କ ପ୍ରସ୍ତାବକ ହେବେ ବୋଲି କହିଛନ୍ତି । କର୍ଣ୍ଣାଟକର ଦଳିତ ନେତା ଖାଡଗେ ଗାନ୍ଧୀ ପରିବାରର ବେଶ୍‌ ବିଶ୍ବସ୍ତ । ଫଳରେ ତାଙ୍କୁ AICC ସଭାପତି କରାଯାଇପାରେ । ଖାଡଗେଙ୍କ ପାଇଁ ପିଏଲ ପୁନିଆ ଓ ପ୍ରମୋଦ ତିଓ୍ବାରୀ ମଧ୍ୟ ପ୍ରସ୍ତାବକ ରହିବେ । ନାମାଙ୍କନ ପୂର୍ବରୁ ଖାଡଗେଙ୍କ ଘରେ ପହଞ୍ଚିଛନ୍ତି ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହେଲଟ ।

ସେପଟେ କେରଳ ସାଂସଦ ଶଶି ଥରୁର ଆଜି କଂଗ୍ରେସ ସଭାପତି ପଦ ପାଇଁ ନାମାଙ୍କନ ଦାଖଲ କରିଛନ୍ତି । ଏହାଛଡ଼ା ମୁକୁଲ ବାସନିକ, କୁମାରୀ ସୋଲଜା ମଧ୍ୟ ଆଜି ନାମାଙ୍କନ ଭରିପାରନ୍ତି ବୋଲି ଚର୍ଚ୍ଚା ହେଉଛି । ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ ରେସରୁ ଆଉଟ ହୋଇଥିବା ବେଳେ G-23ର ଆଉ କିଛି ନେତା ଦୌଡ଼ରେ ସାମିଲ ହୋଇପାରନ୍ତି ବୋଲି କୁହାଯାଉଛି । ୮ଅକ୍ଟୋବର ନାମାଙ୍କନ ପ୍ରତ୍ୟାହାରର ଶେଷ ତାରିଖ ରହିଛି । ଅକ୍ଟୋବର ୧୭ରେ ନିର୍ବାଚନ ଓ ୧୯ରେ ରେଜଲ୍ଟ ଘୋଷଣା ହେବ ।