ଭୁବନେଶ୍ବର : ଯାଜପୁର ବଡ଼ଚଣାରେ ବିଜେଡିକୁ ଟାର୍ଗେଟ କରି ଅଡୁଆରେ ପଡିଯାଇଛନ୍ତି ମୁଖ୍ଯମନ୍ତ୍ରୀ ମୋହନ ମାଝୀ । ମୋହନଙ୍କ ବିଜେଡି ବିରୋଧୀ ବକ୍ତବ୍ଯ ତାଙ୍କ ଲାଗି ବୁମେରାଂ ହୋଇଛି। ବିଜେଡି ସରକାର ଯାଜପୁରରେ କିଛି ବିକାଶ କରିନାହାନ୍ତି ବୋଲି ନଗଡ଼ା ଉଦାହରଣ ଦେଇ କହିଥିବା ବକ୍ତବ୍ଯକୁ ତୀବ୍ର ସମାଲୋଚନା କରିଛନ୍ତି ବିଜେଡି ସାଂସଦ ସୁଲତା ଦେଓ। ପାର୍ଲାମେଣ୍ଟରେ ଉପସ୍ଥାପିତ ପୋଷଣ ସମ୍ପର୍କିତ ତଥ୍ଯକୁ ସୁଲତା ଦେଓ ଗଣମାଧ୍ଯମ ସମ୍ମୁଖରେ ରଖିବା ସହ ମୁଖ୍ଯମନ୍ତ୍ରୀ ବିଭ୍ରାନ୍ତ କରୁଛନ୍ତି ଓ ରଙ୍ଗବଦଳା ରାଜନୀତିରୁ କ୍ଷାନ୍ତ ରୁହନ୍ତୁ ବୋଲି କହିଛନ୍ତି। ଦେଶରେ ବିଜେପିଶାସିତ ରାଜ୍ଯ ଗୁଜରାଟ, ରାଜସ୍ଥାନ, ମଧ୍ଯପ୍ରଦେଶ, ବିହାର ଓ ଉତ୍ତରପ୍ରଦେଶର ତଥ୍ଯ ସାଂଗକୁ ପୋଷଣ କ୍ଷେତ୍ରରେ ଜାତୀୟ ହାରର ତଥ୍ଯ ଉପସ୍ଥାପନ କରିଥିଲେ ସୁଲତା। ସେ କହିଛନ୍ତି- ଜାତୀୟ ହାର ସାଂଗକୁ ଏହିସବୁ ବିଜେପି ଶାସିତ ରାଜ୍ଯ ତୁଳନାରେ ଓଡ଼ିଶାର ସ୍ଥିତି ବେଶ୍ ଭଲ। ସେହିପରି ନଗଡ଼ାର ବିକାଶ ପାଇଁ ନବୀନ ସରକାର ନେଇଥିବା ବିଭିନ୍ନ ପଦକ୍ଷେପର ତାଲିକ ଦେଇଥିଲେ ସୁଲତା। ସେ କହିଛନ୍ତି- ନଗଡ଼ା ତଳେ ନବୀନ ୨୦୦ ପିଲାଙ୍କ ଲାଗି ଏକ ହଷ୍ଟେଲ ନିର୍ମାଣ କରିସାରିଛନ୍ତି। ତାକୁ ତୁରନ୍ତ ଉଦଘାଟନ କରନ୍ତୁ। ଫଳରେ ନଗଡ଼ାର ପିଲା ଉପକୃତ ହେବେ। ସେହିପରି ଯାଜପୁରକୁ ୩ଟି ପରିବାର ଲୁଟି ଖାଇଛନ୍ତି ବୋଲି ମୋହନ ମାଝି ଦେଇଥିବା ବକ୍ତବ୍ଯକୁ ନେଇ କେନ୍ଦ୍ରରେ ବିଜେପି ସରକାରଙ୍କ ମୁଖା ଖୋଲିଛନ୍ତି ସୁଲତା। ଏ ପ୍ରସଙ୍ଗରେ ଯାଜପୁର ଜିଲ୍ଲା ବିଜେଡି ସଭାପତି ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି ମୁଖ୍ଯମନ୍ତ୍ରୀଙ୍କ ଏଭଳି ବକ୍ତବ୍ଯ ଅତ୍ଯନ୍ତ ଦୁର୍ଭାଗ୍ଯଜନକ।
