ମହାରାଷ୍ଟ୍ର ନିର୍ବାଚନ ଫଳଫଳକୁ ସେୟାର ବଜାରର ସ୍ୱାଗତ,ନିବେଶକ ଲାଭ କଲେ ୯ ଲକ୍ଷ କୋଟି ଟଙ୍କା

ନନ୍ଦିଘୋଷ ବ୍ୟୁରୋ: ମହାରାଷ୍ଟ୍ର ବିଧାନସଭା ନିର୍ବାଚନର ଫଳାଫଳ ଦେଖିବା ପରେ ନିବେଶକଙ୍କ ଆତ୍ମବିଶ୍ୱାସ ସପ୍ତମ ଆକାଶରେ ପହଂଚିଛି । ସୋମବାର ବଜାର ଖୋଲିବା ମାତ୍ରେ ନିବେଶକ ଜୋରଦାର କିଣା ଆରମ୍ଭ କରିଥିଲେ ଏବଂ କିଛି ମିନିଟ୍ ମଧ୍ୟରେ ସେନ୍ସେକ୍ସ ୧୨୦୦ ପଏଣ୍ଟରୁ ଅଧିକ ବୃଦ୍ଧି ପାଇଥିଲା। ନିଫ୍ଟି ମଧ୍ୟ ଆଜି ୨୪ ହଜାର ଉପରେ ଖୋଲି୩୦୦ ପଏଣ୍ଟରୁ ଅଧିକ ବୃଦ୍ଧି ପାଇ କାରବାର କରୁଛି। ବଜାରରେ ହଠାତ୍ ଏହି ବୃଦ୍ଧି ପଛରେ ୭ଟି ବଡ଼ କାରଣ ରହିଛି ଏବଂ ବିଶେଷଜ୍ଞଙ୍କ ମତରେ ୨୦୨୪ରେ ଆହୁରି ଅଭିବୃଦ୍ଧି ହେବାର ଯଥେଷ୍ଟ ସମ୍ଭାବନା ରହିଛି।

ମହାରାଷ୍ଟ୍ର ବିଧାନସଭା ନିର୍ବାଚନରେ ବିଜେପି ନେତୃତ୍ୱାଧୀନ ଏନଡିଏର ବିପୁଳ ବିଜୟ ପରେ ନିବେଶକଙ୍କ ଆତ୍ମବିଶ୍ୱାସ ଫେରିଛି । ସକାଳେ ସେନ୍ସେକ୍ସ ୧୨୧୬ ପଏଣ୍ଟ ବୃଦ୍ଧି ସହ ଖୋଲିଥିବା ବେଳେ ନିଫ୍ଟି ୩୭୯ ପଏଣ୍ଟ ବୃଦ୍ଧି ସହ କାରବାର ଆରମ୍ଭ କରିଥିଲା। ଆଜି ସବୁ କ୍ଷେତ୍ରରେ ଉନ୍ନତି ପରିଲକ୍ଷିତ ହେଉଛି। ଅଟୋ, ବ୍ୟାଙ୍କ, ଗଣମାଧ୍ୟମ, ଟେଲିକମ୍, ତୈଳ ଓ ଗ୍ୟାସ, ଶକ୍ତି ଓ ରିଅଲ୍ଟି କ୍ଷେତ୍ରରେ ୧ରୁ ୨ ପ୍ରତିଶତ ବୃଦ୍ଧି ଘଟିଥିବା ବେଳେ ଆଦାନୀ ଏଣ୍ଟରପ୍ରାଇଜେସ୍ ସମେତ ଭାରତ ଇଲେକ୍ଟ୍ରୋନିକ୍ସ, ଶ୍ରୀରାମ ଫାଇନାନ୍ସ, ମହିନ୍ଦ୍ରା ଆଣ୍ଡ ମହିନ୍ଦ୍ରା ଏବଂ ବିପିସିଏଲ୍ ଭଳି କମ୍ପାନି ଆଜି ସର୍ବାଧିକ ଲାଭବାନ ହୋଇଛନ୍ତି। ବିଏସଇ ମିଡକ୍ୟାପ୍ ଏବଂ ସ୍ମଲକ୍ୟାପ୍ ରେ ମଧ୍ୟ ଆଜି ୧.୫% ବୃଦ୍ଧି ଦେଖିବାକୁ ମିଳିଛି।

ଏହି ବୃଦ୍ଧିର କାରଣ କ’ଣ?

ଭାରତୀୟ ଷ୍ଟକ ବଜାରରେ ଏହି ବୃଦ୍ଧିର ସବୁଠାରୁ ବଡ଼ କାରଣ ହେଉଛି ଆମେରିକାରେ ୩୧ ମାସର ବ୍ୟବସାୟିକ କାର୍ଯ୍ୟକଳାପ ଶୀର୍ଷରେ ରହିଛି। ରାଷ୍ଟ୍ରପତି ନିର୍ବାଚନରେ ଡୋନାଲ୍ଡ ଟ୍ରମ୍ପ ଫେରିବା ପରେ ଆମେରିକାର ବ୍ୟବସାୟିକ କାର୍ଯ୍ୟକଳାପ ୩୧ ମାସ ମଧ୍ୟରେ ଦ୍ରୁତତମ ଥିଲା ଏବଂ ଏହାର ପ୍ରଭାବ ଡାଓ ଜୋନ୍ସ ସମେତ ଆମେରିକୀୟ ଷ୍ଟକ ବଜାରରେ ମଧ୍ୟ ଦେଖିବାକୁ ମିଳିଥିଲା । ଏହାବ୍ୟତୀତ ରୁଷିଆ-ୟୁକ୍ରେନ ଯୁଦ୍ଧର ପ୍ରଭାବ, ଅଶୋଧିତ ତୈଳ ଦର ବୃଦ୍ଧି, ସୁନା ଦରହ୍ରାସ, ମହାରାଷ୍ଟ୍ର ବିଧାନସଭା ନିର୍ବାଚନ ଫଳାଫଳ, ଗିଫ୍ଟ ନିଫ୍ଟିରେ ଉନ୍ନତି ଏବଂ ଏସୀୟ ବଜାରରେ ବୃଦ୍ଧି ମଧ୍ୟ ଆଜି ଦେଖିବାକୁ ମିଳିଛି।

ଆଗକୁ କ’ଣ ହେବ ?
ମୋତିଲାଲ ଓସୱାଲ ଫାଇନାନ୍ସିଆଲର ବିଶେଷଜ୍ଞଙ୍କ ଅନୁସାରେ ସରକାରୀ ବ୍ୟୟ ବୃଦ୍ଧି ଯୋଗୁଁ ଗ୍ରାମୀଣ ଚାହିଦା ବୃଦ୍ଧି ପାଇବ ଏବଂ ମୌସୁମୀ ସହାୟତାରେ ଅର୍ଥନୈତିକ ଅଭିବୃଦ୍ଧି ମଧ୍ୟ ଭଲ ଦେଖାଯିବ । ନିଶ୍ଚିତ ଭାବେ ଏହାର ପ୍ରଭାବ ଷ୍ଟକ ବଜାର ଉପରେ ସକାରାତ୍ମକ ରହିବ। ଏମକେ ଗ୍ଲୋବାଲ୍ ରିସର୍ଚ୍ଚ ପକ୍ଷରୁ କୁହାଯାଇଛି ଯେ ମହାରାଷ୍ଟ୍ର ଓ ଝାଡ଼ଖଣ୍ଡର ସରକାରଙ୍କ ପ୍ରତ୍ୟାବର୍ତ୍ତନ ମଧ୍ୟ ବଜାରକୁ ଏକ ସକାରାତ୍ମକ ବାର୍ତ୍ତା ଦେବ।

ନିବେଶକମାନେ ଆୟ କଲେ ୯ ଲକ୍ଷ କୋଟି
ଏମକେ ଗ୍ଲୋବାଲ କହିଛି ଯେ ସେପ୍ଟେମ୍ବର ପରଠାରୁ ଷ୍ଟକ ବଜାରରେ ୧୦ ପ୍ରତିଶତ ହ୍ରାସ ଦେଖିବାକୁ ମିଳିଛି, କିନ୍ତୁ ବର୍ତ୍ତମାନ ବଜାର ତା’ର ପୁରୁଣା ଚାଲକୁ ଫେରୁଛି ଏବଂ ଆଗାମୀ ସମୟରେ ନିଫ୍ଟି ୨୫ରୁ ୨୬ ହଜାର କୁ ବୃଦ୍ଧି ପାଇପାରେ । ସୋମବାର ଏହି ବୃଦ୍ଧି ଯୋଗୁଁ ନିବେଶକଙ୍କ ପୁଞ୍ଜି ମଧ୍ୟ ପ୍ରାୟ ୯ ଲକ୍ଷ କୋଟି ଟଙ୍କା ବୃଦ୍ଧି ପାଇଛି। ଏହି ସମୟ ମଧ୍ୟରେ ବିଦେଶୀ ନିବେଶକମାନେ ମଧ୍ୟ ବଜାରରେ ପ୍ରାୟ ୨୦,୦୦୦ କୋଟି ଟଙ୍କା ନିବେଶ କରିଛନ୍ତି।