Share Market: ସେନସେକ୍ସ ୨୧୭ ବୃଦ୍ଧି ପାଇ ପ୍ରଥମଥର ପାଇଁ ୫୮ ହଜାର ପାର୍
ମୁମ୍ବାଇ: ଭାରତୀୟ ସେୟାର ବଜାର ଲଗାତାର ଭଲ ସଂକେତ ଦେଉଛି । ପୁଣି ଥରେ ସେୟା ବଜାର ଇତିହାସ ରଚିଛି । ପ୍ରଥମଥର ପାଇଁ ସେନସେକ୍ସ ୫୮ ହଜାର ଉପରକୁ ଉଠିଛି । ଶୁକ୍ରବାର ଅଧିବେଶନ ଆରମ୍ଭରେ ସେନସେକ୍ସ ୨୧୭ ପଏଣ୍ଟ ବୃଦ୍ଧି ପାଇ ୫୮ ହଜାର ୬୯ରେ ପହଞ୍ଚିଛି । ସେହିଭଳି ନିଫ୍ଟି ୬୬.୨୦ ପଏଣ୍ଟ ବୃଦ୍ଧି ପାଇ ୧୭ ହଜାର ୩୦୦ ରେକର୍ଡ ସ୍ତରରେ ପହଞ୍ଚିଛି । ବମ୍ବେ ଷ୍ଟକ ଏକ୍ସଚେଞ୍ଜ ଗୁରୁବାର ୫୧୪ ପଏଣ୍ଟ ବୃଦ୍ଧି ପାଇ ରେକର୍ଡ ସ୍ତରରେ ବନ୍ଦ ହୋଇଥିଲା । ଏନଏସଇ ନିଫ୍ଟି ୧୫୭.୯୦ ପଏଣ୍ଟ ବଢ଼ି ୧୭ ହଜାର ୨୩୪.୧୫ରେ ବନ୍ଦ ହୋଇଥିଲା ।
ଗତକାଲି ସେୟାର ବଜାରରେ ସାମିଲ୍ ସେୟାର ମଧ୍ୟରେ ଟିସିଏସ୍ ସେୟାର ସର୍ବାଧିକ ୩.୩୪ ପ୍ରତିଶତ ବୃଦ୍ଧି ପାଇଥିଲା । ଏହାବାଦ୍ ଏଚୟୁଏଲ୍, ଅଲ୍ଟ୍ରାଟେକ୍ ସିମେଣ୍ଟ, ଡ. ରେଡ୍ଡୀଜ୍, ନେସଲେ ଇଣ୍ଡିଆ, କୋଟକ ବ୍ୟାଙ୍କ ଓ ଟାଇଟନର ସେୟାର ମଧ୍ୟ ବଢ଼ିଛି ।
ଅନ୍ୟପଟେ ମହିନ୍ଦା ଆଣ୍ଡ ମହିନ୍ଦ୍ରାର ସେୟାର ସର୍ବାଧିକ ୨.୨୯ ପ୍ରତିଶତ ହ୍ରାସ ପାଇଛି । ବୈଶ୍ୱିକ ସ୍ତରରେ ସେମିକଣ୍ଡକ୍ଟର କମ୍ କାରଣରୁ ଉତ୍ପାଦନ ୨୫ ପ୍ରତିଶତ କମାଯିବ । ଏହା ଫଳରେ ସେୟାର ଖସିଥିବା କମ୍ପାନୀ କହିଛି । ଅନ୍ୟମାନଙ୍କ ମଧ୍ୟରେ ବଜାଜ ଅଟୋ, ବଜାଜ ଫିନସର୍ଭ, ଏସିଆନ୍ ପେଣ୍ଟ୍ସ ଆଦିର ସେୟାର ଖସିଛି ।
