ଦିଲ୍ଲୀକୁ ଉଠିଲା ‘ମହା’ ଡ୍ରାମା । ନୂଆ ସହଯୋଗୀ ଅପେକ୍ଷାରେ ଏନସିପି, ରାଜ୍ୟପାଳଙ୍କୁ ଭେଟିଲା ଶିବସେନା

ନୂଆଦିଲ୍ଲୀ: ମହାରାଷ୍ଟ୍ର ରାଜନୀତିର ମହାନାଟକ ଏବେ ଦିଲ୍ଲୀରେ ଚାଲିଛି । ସବୁଠି ଅଟକିଛି ନିଷ୍ପତ୍ତି ଓ ସହମତିର ରାଜନୀତିକ ଗୋଟି । ଗୋଟିଏ ଦିନରେ ଦୁଇ ଦୁଇଟି ବଡ଼ ଘଟଣାକ୍ରମ ମୁମ୍ବାଇ ରାଜନୀତିକୁ ଆହୁରି ରୋଚକ କରିଛି । ବିଜେପି ସଭାପତି ଅମିତ ଶାହାଙ୍କୁ ଦିଲ୍ଲୀରେ ସାକ୍ଷାତ କରିଛନ୍ତି ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବୀଶ । ଉଭୟଙ୍କ ମଧ୍ୟରେ ପ୍ରାୟ ଘଣ୍ଟାଏ କାଳ ଆଲୋଚନା ହୋଇଛି । ଏଥିରେ ରାଜନୀତି କମ୍ କୁଟନୀତି ଅଧିକ ହୋଇଥିବା ଚର୍ଚ୍ଚା ହେଉଛି । ସକାଳର ଏ ରାଜନୀତିକ ଘଟଣାକ୍ରମ ପରେ ସନ୍ଧ୍ୟାରେ କଂଗ୍ରେସ ସଭାପତି ସୋନିଆ ଗାନ୍ଧିଙ୍କୁ ଦିଲ୍ଲୀରେ ସାକ୍ଷାତ କରିଛନ୍ତି ଏନସିପି ସୁପ୍ରିମୋ ଶରଦ ପାଓ୍ୱାର । ଶିବସେନା ସହ କଂଗ୍ରେସ ଓ ଏନସିପିର ମେଣ୍ଟ ପ୍ରସଙ୍ଗରେ ଆଲୋଚନା ହୋଇଥିବା ଚର୍ଚ୍ଚା ହେଉଛି । ତେବେ ବଡ଼କଥା ହେଲା, ଶରଦ ପାଓ୍ୱାର କହିଛନ୍ତି ଯେ, ଶିବସେନା ସହ ମେଣ୍ଚ ପ୍ରସଙ୍ଗକୁ ଆମେ କେବେ ମନା କରିନାହୁଁ । ତେଣୁ ଉଭୟ କଂଗ୍ରେସ ଓ ଏନସିପି ଏବେ ନିଜ କୋର୍ଟରେ ବଲ୍ ରଖିଛନ୍ତି । ଦରକାର ହେଲେ ସେମାନେ ଏହାକୁ ଖେଳିବେ ବୋଲି ଆଶା କରାଯାଉଛି । ଯଦି ଉଭୟ ଦଳ ଶିବସେନାକୁ ସମର୍ଥନ କରନ୍ତି ତେବେ ତିନି ଦଳ ମିଶି ସରକାର ଗଠନ କରିବା ଥୟ । ପୂର୍ବରୁ ଶିବସେନା ଯାହା କହୁଥିଲା ଯେ, ଆମ ପାଖରେ ୧୭୦ ବିଧାୟକଙ୍କ ସମର୍ଥନ ଅଛି ତାହା ପୁଣିଥରେ ସତ ପ୍ରମାଣିତ ହେବ ।

ଏପଟେ ମହାରାଷ୍ଟ୍ର ରାଜ୍ୟପାଳ ଭଗତ ସିଂହ କୋଶଓ୍ୱାରିଙ୍କୁ ମୁମ୍ବାଇରେ ସାକ୍ଷାତ କରିଛନ୍ତି ଶିବସେନା ନେତା ରାମଦାସ କଡମ୍ ଓ ସଂଜୟ ରାଉତ । ନିର୍ବାଚନ ଫଳାଫଳ ପ୍ରକାଶକୁ ୧୦ ଦିନ ବିତିଥିଲେ ବି ଏଯାଏଁ କିଏ ଗଢ଼ିବ ସରକାର ସେ ନେଇ ସହମତି ହୋଇପାରୁନାହିଁ । ଏଭଳି ସ୍ଥିତିରେ ରାଜ୍ୟପାଳଙ୍କୁ ସାକ୍ଷାତ କରି ବର୍ତ୍ତମାନର ସ୍ଥିତି ସଂପର୍କରେ ଅବଗତ କରାଇଛନ୍ତି ଉଭୟ ନେତା । ନଭେମ୍ବର ୯ ତାରିଖକୁ ସରୁଛି ମହାରାଷ୍ଟ୍ର ବିଧାନସଭାର କାର୍ଯ୍ୟକାଳ । ଏହାକୁ ମାତ୍ର ୫ ଦିନ ଥିବା ବେଳେ ତା ପୂର୍ବରୁ ସରକାର ଗଠନ ନହେଲେ ଧାରା ୩୫୬ ଅନୁସାରେ ରାଷ୍ଟ୍ରପତି ଶାସନ ହେବ । ତେଣୁ ଏବେ କର ମା ମର ସ୍ଥିତିରେ ସବୁ ଦଳ । ବିଜେପି ଚୁପଚାପ୍ ରହିଛି, କଂଗ୍ରେସ ଘଟଣା ଉପରେ ନଜର ରଖିଛି । ଶିବସେନା ଓ ଏନସିପି ଫୁଲ୍ ଦମରେ ଲାଗିଛନ୍ତି ସରକାର ଗଠନ କରିବାକୁ । ')}