ଅଶ୍ଳୀଳ ଭିଡିଓ ମାମଲା; ୩୧ରେ ହାଜର ହେବେ କର୍ଣ୍ଣାଟକ ଜେଡିଏସ ଏମପି ପ୍ରଜ୍ବଳ ରେବନ୍ନା

ବହୁଚର୍ଚ୍ଚିତ ଅଶ୍ଳୀଳ ଭିଡିଓ ମାମଲା। ଆସନ୍ତା ୩୧ରେ ସ୍ବତନ୍ତ୍ର ତଦନ୍ତକାରୀ ଟିମ ନିକଟରେ ହାଜର ହେବେ କର୍ଣ୍ଣାଟକ ଜେଡିଏସ ଏମପି ପ୍ରଜ୍ବଳ ରେବନ୍ନା। ଶହ ଶହ ମହିଳାଙ୍କୁ ଯୌନ ନିର୍ଯାତନା ମାମଲାରେ ଅଭିଯୁକ୍ତ ପ୍ରଜ୍ବଳ ଦେଶ ଛାଡ଼ି ପଳାୟନ କରିଥିଲେ। ତାଙ୍କ ବିରୋଧରେ ଗିରଫ ପରୱାନା ଜାରି ହୋଇଥିବା ସତ୍ତ୍ବେ ସେ ହାଜର ହୋଇ ନଥିଲେ।

ଏହି ପ୍ରସଙ୍ଗରେ ତାଙ୍କ ବାପା ଏଚ.ଡି. ରେବନ୍ନାଙ୍କୁ ଗିରଫ କରାଯାଇଥିବାବେଳେ ପୂର୍ବତନ ପ୍ରଧାନମନ୍ତ୍ରୀ ଏଚ.ଡି. ଦେବେଗୌଡା ବି ଅସୁବିଧାର ସମ୍ମୁଖୀନ ହୋଇଥିଲେ। ଏହାକୁ ନେଇ ବିଜେପି-ଜେଡିଏସ ମେଣ୍ଟରେ ବି ସୃଷ୍ଟି ହୋଇଥିଲା କମ୍ପନ। ଏକ ଭିଡିଓ ବାର୍ତ୍ତାରେ ପ୍ରଜ୍ବଳ କହିଛନ୍ତି ସେ ୩୧ ତାରିଖ ପୂର୍ବାହ୍ନ ୧୦ଟାରେ ଏସଆଇଟି ନିକଟରେ ହାଜର ହେବେ।

ମହିଳାଙ୍କୁ ଯୌନ ନିର୍ଯାତନା ଘଟଣା ପ୍ରଘଟ ହେବା ପରେ ସେ ଗତ ଏପ୍ରିଲ ୨୬ରେ ଦେଶଛାଡି ପଳାୟନ କରିଥିଲେ। ତେବେ ତାଙ୍କ ବିରୋଧରେ ଏହା ଏକ ଷଡ଼ଯନ୍ତ୍ର ବୋଲି ସେ କହିଥିଲେ। ତାଙ୍କ ବିରୋଧରେ ଗତ ମେ ୧୮ରେ କର୍ଣ୍ଣାଟକର ଏକ ସ୍ବତନ୍ତ୍ର କୋର୍ଟ ଗିରଫ ପରୱାନା ଜାରି କରିଥିଲେ।