ରାଜ୍ୟରେ କରୋନା ଟିକାକରଣ ପାଇଁ ଚାଲିଛି ପୂର୍ବ ପ୍ରସ୍ତୁତି, ଡ୍ରାଏ ରନ୍ ପରେ ଚେକ୍ ହେବ ସେସନ ସାଇଟର ଫିଜିବିଲିଟି
ଭୁବନେଶ୍ୱର: ରାଜ୍ୟରେ କରୋନା ଟିକାକରଣର ଡ୍ରାଏ ରନ ପରେ ଏବେ ଚେକ୍ ହେବ ସେସନ ସାଇଟର ଫିଜିବିଲିଟି। ଏ ନେଇ ସ୍ୱାସ୍ଥ୍ୟ ଓ ପରିବାର କଲ୍ୟାଣ ନିର୍ଦେଶକ ବିସ୍ତୃତ ସୂଚନା ଦେଇଛନ୍ତି। ରାଜ୍ୟରେ ଟିକାକରଣ ପାଇଁ ୨୯ ହଜାର ସେସନ ସାଇଟ ଅଛି। ହେଲେ ପ୍ରଥମ ପର୍ଯ୍ୟାୟରେ ଏତେ ଦରକାର ହେବନି। ଗତକାଲି ସ୍ୱାସ୍ଥ୍ୟ ସଚିବ ଏହି ସେସନ ସାଇଟର ଫିଜିବିଲିଟି ଦେଖିବାକୁ ଜିଲ୍ଲାପାଳ ଓ ମହାନଗର ନିଗମ କମିଶନରମାନଙ୍କୁ ଚିଠି ଲେଖିଛନ୍ତି।
ସେମାନେ ଦେଖିବେ ଯେ ସେସନ ସାଇଟରେ ପ୍ରତୀକ୍ଷା ପ୍ରକୋଷ୍ଠ, ଟିକାଦାନ ପ୍ରକୋଷ୍ଠ ଓ ଅବ୍ଜର୍ଭେସନ ରୁମ୍ ଠିକ୍ ଅଛି କି ନାହିଁ। ପ୍ରଥମେ ପ୍ରତୀକ୍ଷା ପ୍ରକୋଷ୍ଠରେ ଟିକା ପାଇବା ଲୋକଙ୍କ ତଥ୍ୟ ଯାଞ୍ଚ ହେବ। ସେମାନଙ୍କ ନାଁ ଡାଟାବେସରେ ଅଛି କି ନାହିଁ ତାହା ଯାଞ୍ଚ କରାଯିବ। ଏହା ପରେ ଟିକାଦାନ ପ୍ରକୋଷ୍ଠରେ ସେମାନଙ୍କ ବାକି ତଥ୍ୟ ଯାଞ୍ଚ ହୋଇ ଟିକା ଦିଆଯିବ। ତା ପରେ ସେମାନଙ୍କୁ ଅବଜର୍ଭେସନ ରୁମ୍ରେ ୩୦ ମିନିଟ ରଖାଯିବ। ଏହି ସମୟ ଭିତରେ ପାର୍ଶ୍ଵ ପ୍ରତିକ୍ରିୟା ନ ଆସିଲେ, ସେମାନଙ୍କୁ ଛାଡ଼ି ଦିଆଯିବ। ଏହି ମାସ ଶେଷ ଆଡ଼କୁ ଟିକା ଓଡ଼ିଶା ପହଞ୍ଚିବ ବୋଲି ସ୍ୱାସ୍ଥ୍ୟ ଓ ପରିବାର କଲ୍ୟାଣ ନିର୍ଦେଶକ ଡାକ୍ତର ବିଜୟ ପାଣିଗ୍ରାହୀ କହିଛନ୍ତି।
