ଘଡ଼ିସନ୍ଧି ସମୟ ଦେଇ ଗତି କରୁଛି ରାଜ୍ୟ କଂଗ୍ରେସ: ଚିରଞ୍ଜୀବ ବିଶ୍ୱାଳ
ଭୁବନେଶ୍ୱର: କଂଗ୍ରେସରେ କିଛି ଭଲ ନାହିଁ । ଏ କଥାକୁ ମାନିଛନ୍ତି ଦଳର ବରିଷ୍ଠ ନେତା ଚିରଞ୍ଜୀବ ବିଶ୍ୱାଳ । ରାଜ୍ୟ କଂଗ୍ରେସ ଏବେ ଏକ ଘଡ଼ିସନ୍ଧି ସମୟ ଦେଇ ଗତି କରୁଥିବା କହିଛନ୍ତି ଚିରଞ୍ଜୀବ । ପିପିଲିରେ କଂଗ୍ରେସ ମାତ୍ର ୪ ହଜାର ଭୋଟ୍ ପାଇବା ଦଳର ନେତା ଓ କର୍ମୀଙ୍କୁ କ୍ଷୁବ୍ଧ କରିଛି । ଯାହାର ପ୍ରତିଫଳନ କଂଗ୍ରେସ ଭବନ ସମ୍ମୁଖରେ ହୋଇଥିଲା । କିଛି କଂଗ୍ରେସ କର୍ମୀ ଦଳୀୟ ସଭାପତିଙ୍କ ବିରୋଧରେ ବିକ୍ଷୋଭ ପ୍ରଦର୍ଶନ କରିବା ସହ ନେତୃତ୍ବ ପରିବର୍ତ୍ତନ ପାଇଁ ଦାବି କରିଥିଲେ ।
ଏହାକୁ ନେଇ ଚିରଞ୍ଜୀବ କହିଛନ୍ତି, ନେତୃତ୍ୱ ପରିବର୍ତ୍ତନ ନିଷ୍ପତ୍ତି ହାଇକମାଣ୍ଡ ନେବେ । ଦଳର ପରିଚାଳନା ନେଇ ଯଦି କାହାର କୌଣସି ଆପତ୍ତି ଥାଏ ତେବେ ସେମାନେ ହାଇକମାଣ୍ଡଙ୍କ ସହ ଆଲୋଚନା କରନ୍ତୁ । ପିପିଲିରେ ୪ ହଜାର ଭୋଟ୍ ୪ ଲକ୍ଷକୁ ବୃଦ୍ଧି ପାଇବାକୁ ବେଶି ସମୟ ଲାଗିବନି । ଉଭୟ ରାଜ୍ୟ ଓ ଦେଶରେ କଂଗ୍ରେସକୁ ପୁଣି ଥରେ ସଂଗଠିତ କରିବାକୁ ଦଳର ଶୀର୍ଷ ନେତାମାନେ ଉଦ୍ୟମ କରୁଥିବା କହିଛନ୍ତି ଚିରଞ୍ଜୀବ ବିଶ୍ୱାଳ ।
