ଦିଲ୍ଲୀରେ ଓମିକ୍ରନର ଦ୍ୱିତୀୟ ମାମଲା, ଦେଶରେ ଆକ୍ରାନ୍ତଙ୍କ ସଂଖ୍ୟା ୩୩କୁ ବୃଦ୍ଧି

ଦିଲ୍ଲୀ: ଡରାଉଛି ଓମିକ୍ରନ, ବଢ଼ୁଛି ସଂକ୍ରମିତଙ୍କ ସଂଖ୍ୟା । ରାଷ୍ଟ୍ରୀୟ ରାଜଧାନୀ ଦିଲ୍ଲୀରୁ ଆଉ ଜଣେ ଓମିକ୍ରନ ସଂକ୍ରମିତ ଚିହ୍ନଟ ହୋଇଛନ୍ତି । ଏଥିସହ ଦିଲ୍ଲୀରେ ଓମିକ୍ରନ ଆକ୍ରାନ୍ତଙ୍କ ସଂଖ୍ୟା ୨ରେ ପହଞ୍ଚିଛି । ଓମିକ୍ରନ ସଂକ୍ରମିତ ଜଣଙ୍କ ଜିମ୍ବାୱେରୁ ଫେରିଥିଲେ । ଜିନୋମ ସିକ୍ୱେନ୍ସିଂ ରିପୋର୍ଟରେ ସେ ଓମିକ୍ରନ ପଜିଟିଭ୍ ଚିହ୍ନଟ ହୋଇଛନ୍ତି । ଏଥସହ ଦେଶରେ ଓମିକ୍ରନ ଆକ୍ରାନ୍ତଙ୍କ ସଂଖ୍ୟା ୩୩କୁ ବୃଦ୍ଧି ପାଇଛି ।

Man with travel history to Zimbabwe, South Africa tests positive for Omicron in Delhi, second patient of new Covid variant in city: Sources

— Press Trust of India (@PTI_News) December 11, 2021

ବିଦେଶରୁ ଦିଲ୍ଲୀ ଫେରିଥିବା ୨୭ ଜଣ କୋଭିଡ୍ ସଂକ୍ରମିତ ଚିହ୍ନଟ ହୋଇଥିଲେ । ସମସ୍ତଙ୍କ ନମୁନା ଜିନୋମ ସିକ୍ୱେନ୍ସିଂ ପାଇଁ ପଠା ଯାଇଥିଲା । ୨ ଜଣଙ୍କ ରିପୋର୍ଟ ଓମିକ୍ରନ ପଜିଟିଭ୍ ଥିବାବେଳେ ୨୫ ଜଣଙ୍କ ରିପୋର୍ଟ ନେଗେଟିଭ୍ ଆସିଛି । ଦେଶେରେ ଏବେ ଯାଏ ୩୩ଟି ଓମିକ୍ରନ ମାମଲା ଚିହ୍ନଟ ହୋଇଥିବା ବେଳେ ସବୁଠୁ ଅଧିକ ୧୭ ଆକ୍ରାନ୍ତ ମହାରାଷ୍ଟ୍ରରୁ ଆସିଛି ।

ଶୁକ୍ରବାର ଗୋଟିଏ ଦିନରେ ଦେଶରେ ଓମିକ୍ରନର ୯ଟି ମାମଲା ଚିହ୍ନଟ ହୋଇଛି । ମହାରାଷ୍ଟ୍ରରେ ଜଣେ ସାଢ଼େ ୩ ବର୍ଷର ଛୁଆ ଓମିକ୍ରନ ଆକ୍ରାନ୍ତ ହୋଇଛନ୍ତି । ମୁମ୍ବାଇରେ ଓମିକ୍ରନ ମାମଲା ବଢ଼ୁଥିବାରୁ ସେଠାରେ ୧୪୪ ଧାରା ଲାଗୁ କରାଯାଇଛି । ୧୨ ତାରିଖ ଯାଏ ୧୪୪ ଧାରା ବଳବତ୍ତର ରହିବ । ସମସ୍ତ ପ୍ରକାର ସଭା, ସମାବେଶ ଓ ରାଲି ଉପରେ ପ୍ରତିବନ୍ଧକ ଲାଗୁ କରାଯାଇଛି ।