ସ୍କୁଲରେ ଆଜିଠାରୁ ନନ୍ଷ୍ଟପ ଚାଲିବ ପାଠପଢ଼ା, ସ୍କୁଲକୁ ଆସିବେ ଷଷ୍ଠ ଓ ସପ୍ତମ ଶ୍ରେଣୀ ଛାତ୍ରଛାତ୍ରୀ
ଭୁବନେଶ୍ୱର: ଆଜିଠୁ ସ୍କୁଲରେ ଆହୁରି ବଢିବ କୋଳାହଳ। ନନଷ୍ଟପ୍ ଚାଲିବ ପାଠପଢା। ଆଜିଠୁ ସ୍କୁଲ୍ ଆସିବେ ଷଷ୍ଠ ଓ ସପ୍ତମ ଶ୍ରେଣୀ ଛାତ୍ରଛାତ୍ରୀ। ଦୀର୍ଘ ଦେଢ ବର୍ଷ ପରେ ସ୍କୁଲ ହତା ମାଡିବେ ଛାତ୍ରଛାତ୍ରୀ। କୋଭିଡ କଟକଣାରେ ଶ୍ରେଣୀ ଗୃହରେ ହେବ ଶିକ୍ଷାଦାନ। ଏଥିପାଇଁ ସ୍କୁଲ ପରିସରରେ ହୋଇଛି ସ୍ୱତନ୍ତ୍ର ପ୍ରସ୍ତୁତି। ସ୍କୁଲ ଓ ଗଣଶିକ୍ଷା ବିଭାଗ ଜାରି କରିଥିବା ଗାଇଡଲାଇନ୍ ଅନୁସାରେ ପାଠ ପଢାଯିବ। ଶ୍ରେଣୀ ଗୃହ ସହିତ ସ୍କୁଲ ପରିସରକୁ ସାନିଟାଇଜ୍ କରାଯିବା ସହିତ ସାମାଜିକ ଦୂରତାରେ ପାଠ ପଢାଇବା ପାଇଁ ସ୍ୱତନ୍ତ୍ର ପ୍ରସ୍ତୁତି କରାଯିବ।
ସମସ୍ତଙ୍କ ପାଇଁ ମାସ୍କ ବାଧ୍ୟତାମୂଳକ ହୋଇଥିବା ବେଳେ ସାନିଟାଇଜର ବ୍ୟବହାର ସହିତ ସାମାଜିକ ଦୂରତା ରକ୍ଷା କରିବେ ଛାତ୍ରଛାତ୍ରୀ। କରୋନା ପାଇଁ ଦେଢ ବର୍ଷରୁ ଅଧିକ ସମୟ ଧରି ସ୍କୁଲ୍ ବନ୍ଦ ରହିଥିଲା। ବିଭିନ୍ନ ପର୍ଯ୍ୟାୟରେ ପୂର୍ବରୁ ଅଷ୍ଟମରୁ ଦ୍ୱାଦଶ ପିଲାଙ୍କ ପାଠପଢା ଅପଲାଇନରେ ଚାଲୁ ରହିଛି। ଏବେ ଷଷ୍ଠ ଓ ସପ୍ତମ ଶ୍ରେଣୀ ପିଲାମାନେ ଶ୍ରେଣୀ ଗୃହରେ ବସି ପାଠ ପଢିବାର ସୁଯୋଗ ପାଇବେ। ଏଥିପାଇଁ ଉତ୍ସାହିତ ଅଛନ୍ତି ଛାତ୍ରଛାତ୍ରୀ।
