ଅନୁସୂଚୀତ ଜାତି, ଜନଜାତିଙ୍କ ବିକାଶ ପାଇଁ ଥିବା ଯୋଜନା ଠିକ କାର୍ଯ୍ୟକାରୀ ହେଉଛି କି ନାହିଁ ?

ନନ୍ଦିଘୋଷ ବ୍ୟୁରୋ: ଭାରତର ଅନୁସୂଚିତ ଜାତି ଜନଜାତି ସଂସଦୀୟ ଷ୍ଟାଣ୍ଡିଂ କମିଟି ସମ୍ମିଳନୀରେ ଅନୁସୂଚିତ ଜାତି ଜନଜାତି ବର୍ଗଙ୍କୁ ନେଇ ଗୁରୁତ୍ୱପୂର୍ଣ୍ଣ ଆଲୋଚନା ହୋଇଛି । ଏବେ ଅନୁସୂଚିତ ଜାତି ଓ ଜନଜାତି ଲୋକେ ବହୁ ମାତ୍ରାରେ ଅତ୍ୟାଚାରିତ ହେଉଥିବା ବେଳେ ସେ ସବୁକୁ ରୋକିବାର ଆବଶ୍ୟକତା ଅଛି ବୋଲି ମତ ପ୍ରକାଶ ପାଇଛି । ଭୁବନେଶ୍ୱରରେ ଆୟୋଜିତ ଦୁଇ ଦିନିଆ ଜାତୀୟ ଜାତି ଜନଜାତି ସମ୍ମିଳନୀରେ ଏଭଳି ମତ ପ୍ରକାଶ ପାଇଛି । ଲୋକସଭା ବାଚସ୍ପତି ସମ୍ମିଳନୀକୁ ଉଦଘାଟନ କରିଥିବା ବେଳେ ସଂସଦ ତଥା ବିଭିନ୍ନ ରାଜ୍ୟର ଏସସି/ଏସଟି ଷ୍ଟାଣ୍ଡିଂ କମିଟି ଅଧ୍ୟକ୍ଷ ଓ ସଦସ୍ୟ ଯୋଗଦେଇଛନ୍ତି ।

ଅନୁସୂଚୀତ ଜାତି, ଜନଜାତିଙ୍କ ବିକାଶ ପାଇଁ ଥିବା ଯୋଜନା ଠିକ ଭାବେ କାର୍ଯ୍ୟକାରୀ ହେଉଛି କି ନାହିଁ ? ସେମାନଙ୍କ ପାଇଁ ଥିବା ବଜେଟ ଖର୍ଚ୍ଚ ହେଉଛି କି ନାହିଁ ? ଟ୍ରାଇବାଲ ଓ ସିଡ୍ୟୁଲ କାଷ୍ଟ ସବପ୍ଲାନ ଠିକ ଭାବେ ଖର୍ଚ୍ଚ ହେଉଛି କି ନାହିଁ ? ପେସା ଓ ସଂରକ୍ଷଣ ଆଇନ, ଜଙ୍ଗଲ ଅଧିକାର ଆଇନ, ଆଟ୍ରୋସିଟି ଆଇନ ସବୁ ଠିକ ଭାବରେ କାର୍ଯ୍ୟକାରୀ ହେଉଛି କି ନାହିଁ ? ଅନୁସୂଚିତ ଜାତି ଜନଜାତି ବର୍ଗର ଲୋକଙ୍କ ଏସବୁ ପ୍ରସଙ୍ଗକୁ ଭୁବନେଶ୍ୱରରେ ଆୟୋଜିତ ଜାତୀୟସ୍ତରୀୟ ଅନୁସୂଚିତ ଜାତି ଜନଜାତି ସଂସଦୀୟ ଷ୍ଟାଣ୍ଡିଂ କମିଟି ସମ୍ମିଳନୀରେ ଏସବୁ ବିଷୟକୁ ନେଇ ଚର୍ଚ୍ଚା ହୋଇଛି । ଜାତି ଜନଜାତିଙ୍କର ସଂସଦୀୟ ଷ୍ଟାଣ୍ଡିଂ କମିଟିର ବୈଠକରେ ଏସସି/ଏସଟି ବର୍ଗର ବିକାଶ ପାଇଁ କାମ ହେବା ଦରକାର ବୋଲି ଦାବି କରିଛି ବିଜେଡି । ବିଜେଡି ସମୟରେ ଅଷ୍ଟମ ଅନୁଚ୍ଛେଦ ଅନୁଯାୟୀ ଆଦିବାସୀ ଭାଷାକୁ ମାନ୍ୟତା ଦେବାକୁ ଦାବି ହୋଇଥିଲା । ହୋ, ଭୂମିଜ, ମୁଣ୍ଡାରୀ ଭାଷାକୁ ମାନ୍ୟତା, ଆଦିବାସୀଙ୍କୁ ପଟ୍ଟା ଦେବାକୁ ଦାବି କରିଛି ବିଜେଡି । ଆଦିବାସୀଙ୍କ ପାଇଁ ସରକାର କିଛି କରୁନାହାନ୍ତି । ଷ୍ଟାଣ୍ଡିଂ କମିଟି ଯାହା ସୁପାରିଶ କରୁଛି ତାହାକୁ ସରକାର କାର୍ଯ୍ୟକାରୀ କରୁନାହାନ୍ତି ବୋଲି ଦଳ କହିଛି । କଂଗ୍ରେସର କହିବା କଥା ଓଡ଼ିଶାରେ ଏସସି/ଏସଟି ମହିଳା ସବୁଠୁ ଅଧିକ ପୀଡିତ, କିନ୍ତୁ ଏ ସମ୍ପର୍କରେ ସରକାର ନିରବ । ପେସା ଆଇନ ଲାଗୁ ପାଇଁ ନିଜେ ଷ୍ଟେଟମେଣ୍ଟ ଦେଇଥିଲେ ମୁଖ୍ୟମନ୍ତ୍ରୀ, କିନ୍ତୁ କଥା କଥାରେ ରହିଗଲା। ମୁଖ୍ୟମନ୍ତ୍ରୀ ଆଦିବାସୀ ହୋଇଥିବାରୁ ସେ ଅନୁସୂଚିତ ଜାତି, ଜନଜାତିଙ୍କୁ ନ୍ୟାୟ ଦେବାକୁ ଦାବି କରିଛି କଂଗ୍ରେସ ।

ସେପଟେ ଆମ ସରକାର ଆଦିବାସୀ ଜନଜାତି ପାଇଁ କାମ କରୁଛନ୍ତି ବୋଲି କହିଛନ୍ତି ମୁଖ୍ୟମନ୍ତ୍ରୀ । ସରକାର ଏସସି/ଏସଟି ବିଭାଗ ବଜେଟ ୬୮ ହଜାର ୮୮୧ କୋଟି କରିଛନ୍ତି । ଆଦିବାସୀଙ୍କ ପାଇଁ ଫରେଷ୍ଟ ପ୍ରୋସେସିଙ୍ଗ ୟୁନିଟ୍ କରିବେ ସରକାର । ସମସ୍ତ ଜନଜାତି ଭାଷାରେ ଶିକ୍ଷାଦାନ ପାଇଁ ସରକାର ନିଷ୍ପତ୍ତି ନେଇଛନ୍ତି । ଦୁଇ ଦୁନିଆ ସମ୍ମିଳନୀରେ ପ୍ରସ୍ତାବ ଓ ପରାମର୍ଶକୁ ନେଇ ନୂଆ ନୀତି ଆସିବ ବୋଲି କହିଛନ୍ତି ମୁଖ୍ୟମନ୍ତ୍ରୀ । ସମ୍ମିଳନୀରେ ଯୋଗ ଦେଇ ଲୋକସଭା ବାଚସ୍ପତି ଓମ ବିର୍ଲା କହିଛନ୍ତି ବେଳେ ବେଳେ ସଂସଦୀୟ କମିଟିର ରିପୋର୍ଟରେ ଦେଖିବାକୁ ମିଳୁଛି ଯେଉଁ ବିଷୟ ବସ୍ତୁ ପାଇଁ ବଜେଟ ଆବଣ୍ଟନ ହେଉଛି ତାହା କାର୍ଯ୍ୟକାରୀ ହେଉନି । ସେହି ଦିଗରେ ଅଧିକ ବିଚାରବିମର୍ଷ କରିବାକୁ ପଡ଼ିବ ।

ସଂସଦୀୟ ଷ୍ଟାଣ୍ଡିଂ କମିଟି ଅଧ୍ୟକ୍ଷ ଓ ସଦସ୍ୟମାନେ ସମ୍ମିଳନୀରେ ଯୋଗ ଦେଇଥିବା ବେଳେ ବିଭିନ୍ନ ପ୍ରସଙ୍ଗରେ ଆଲୋଚନା ହେଉଛି । ସଂସଦ, ବିଧାନସଭା ଓ କେନ୍ଦ୍ର ଶାସିତ ଅଞ୍ଚଳ ଷ୍ଟାଣ୍ଡିଂ କମିଟିର ସଦସ୍ୟମାନେ ଯୋଗ ଦେଇଥିବା ଏହି ସମ୍ମିଳନୀ ଦୁଇଦିନ ଧରି ଚାଲିବ ।