ପ୍ରବଳ ଖରା ଯୋଗୁ କଟକ ଏସସିବି ଓ କେନ୍ଦ୍ରୀୟ ରେଡକ୍ରସ୍ ରକ୍ତ ଭଣ୍ଡାରରେ ରକ୍ତ ଅଭାବ
1 min read
କଟକ: ସବୁଠି ପ୍ରଚଣ୍ଡ ରୌଦ୍ରତାପ । ଖରା ପାଇଁ ରକ୍ତ ସଂଗ୍ରହରେ ହେଉଛି ସମସ୍ୟା । ଫଳରେ ରକ୍ତ ଭଣ୍ଡାରରେ ଦେଖାଦେଇଛି ରକ୍ତ ସଙ୍କଟ । ରାଜ୍ୟର ପ୍ରମୁଖ ତଥା ବୃହତ ଏସସିବି ଓ ସେଣ୍ଟ୍ରାଲ ରେଡକ୍ରସ୍ ରକ୍ତ ଭଣ୍ଡାରରେ ରକ୍ତ ଅଭାବ ଦେଖାଦେଇଛି । ପ୍ରତିଦିନ ଏହି ଭଣ୍ଡାର ଉପରେ ନିର୍ଭର କରନ୍ତି ପ୍ରାୟ ୨ ହାଜର ଉର୍ଦ୍ଧ୍ବ ରୋଗୀ । ଥାଲାସେମିଆ, କର୍କଟ, ବୋନମ୍ୟାରୋ, ସାଧାରଣ ତଥା ଜଟିଳ ଅପରେସନ ସାଙ୍ଗକୁ ଦୁର୍ଘଟଣା ପାଇଁ ରକ୍ତ ଆବଶ୍ୟକତା ରହିଛି । ତେଣୁ ଖରା ଯୋଗୁଁ ରକ୍ତ ଅଭାବ ଦେଖା ଦେଇଥିବାରୁ କାହାକୁ ଘଣ୍ଟା ଘଣ୍ଟା ତ କାହାକୁ ଦିନ ଦିନ ଅପେକ୍ଷା କରିବାକୁ ପଡ଼ୁଛି ।
ପ୍ରତିବର୍ଷ ଗ୍ରୀଷ୍ମ ୨-୩ ମାସ ଏହି ସଙ୍କଟ ଦେଖାଦିଏ । ତେବେ ଚଳିତବର୍ଷ ଅଧିକ ଖରା ଯୋଗୁ ରକ୍ତଦାନ ପାଇଁ କେହି ଆଗକୁ ଆସୁନାହାନ୍ତି । ଏପରିକି ରକ୍ତ ଆବଶ୍ୟକ କରୁଥିବା ବ୍ୟକ୍ତି ମଧ୍ୟ ରକ୍ତ ଦେବାକୁ ଅନିଚ୍ଛା ପ୍ରକାଶ କରୁଛନ୍ତି । ପ୍ରତିଦିନ ଥାଲାସେମିୟା ଓ ଅନ୍ୟ ଜରୁରୀ ଅପରେସନ ରୋଗୀଙ୍କୁ ବିନା ଡୋନାର ରକ୍ତ ଯୋଗାଇ ଦିଆଯାଉଛି । ଏହି ସ୍ଥଳେ ଅନେକ ସମୟରେ ଭଣ୍ଡାରରେ ସମସ୍ତ ଗ୍ରୁପର ରକ୍ତ ମିଳିବା ସମ୍ଭବପର ହୋଇପାରୁ ନାହିଁ । ତେବେ ଏଥିପାଇଁ ସମସ୍ତଙ୍କ ସହଯୋଗ ଆବଶ୍ୟକ ବୋଲି ଉଭୟ କତୃପକ୍ଷ କହିଛନ୍ତି ।
