OTV MDଙ୍କ ବିରୋଧରେ ବଢ଼ିଲା ଅଭିଯୋଗର ଫର୍ଦ୍ଦ, ରୁଜୁ ହେଲା SC/ST ମାମଲା
1 min read
ଖୋର୍ଦ୍ଧା: ଓଟିଭି ଏମଡି ଜଗି ମଙ୍ଗତ ପଣ୍ଡା ବିରୋଧରେ ବଢ଼ିଲା ଅଭିଯୋଗର ଫର୍ଦ୍ଦ । ବାଘମାରୀ ଥାନାରେ ଓଟିଭି ଏମଡିଙ୍କ ବିରୋଧରେ ଆଉ ଏକ ମାମଲା ରୁଜୁ ହୋଇଛି । ଓଟିଭିର ଏକଛତ୍ରବାଦ ବିରୋଧରେ ଥାନାରେ ଅଭିଯୋଗ କରିଛନ୍ତି ସାରୁଅ ଓ ଲୋକନାଥପୁର ଗ୍ରାମବାସୀ । ଏତଲାରେ ଦର୍ଶାଇଯାଇଛି ଯେ, ଜଗିଙ୍କ ବାପା, ଭାଇ ଓ ପ୍ରୋଜେକ୍ଟ ଦାୟିତ୍ଧରେ ଥିବା ବ୍ୟକ୍ତି ବିଶେଷମାନେ ସ୍ଥାନୀୟ ଲୋକଙ୍କୁ ଧମକାଉଛନ୍ତି ।
ଏପରିକି ଓଟିଭି ଓ ତରଙ୍ଗ ଚ୍ୟାନେଲ ଦ୍ୱାରା ଗାଁ ପୋଖରୀ ଜବରଦଖଲ ସହ ପାଚେରୀକୁ ବିରୋଧ ନକରିବାକୁ ଧମକ ଦେଉଛନ୍ତି ଜଗିଙ୍କ ପରିବାର । ଅନୁସୂଚିତ ଜାତି ଜନଜାତି ଶ୍ରେଣୀର ହୋଇଥିବାରୁ ଧମକାଉଥିବା ଅଭିଯୋଗ କରିଛନ୍ତି କ୍ଷତିଗ୍ରସ୍ତ ଚାଷୀ । ଏନେଇ SC/ST ଆଇନର ଧାରା ୩(୧) ଓ ଧାରା ୨(ଭିଏ)ରେ ମାମଲା ରୁଜୁ ହୋଇଛି । ସେହିପରି ଆଇପିସି ଧାରା ୪୪୭, ୫୦୬ ଓ ୩୪ରେ ମାମଲା ରୁଜୁ ହୋଇଛି । ସେହିପରି ପାଚେରୀ ତିଆରି କରିଥିବା ୪ ଠିକାଦାରଙ୍କ ସହ ପୋଲିସର ପଚରାଉଚରା କରିଥିବା ସୂଚନା ମିଳିଛି ।
ଅନ୍ୟପଟେ ଜମି କିଣା ଆଳରେ ଗାଁଟା ଯାକର ଜମି ମାଡ଼ି ବସିବାକୁ ରଚିଛନ୍ତି ଚକ୍ରବ୍ୟୂହ । ଏମିତି ବାଗରେ ଜମି କିଣାଯାଇଛି ଯେ ବାକି ଜମି ଯେମିତି ଆପେ ଆପେ ଗୋଡ଼ତଳକୁ ଆସିବ । ନିଜର ଜମି ହରାଇବା ଆଶଂକାରେ ଚିନ୍ତିତ ଗାଁଲୋକ ଜିଲ୍ଲାପାଳଙ୍କୁ ଅଭିଯୋଗ କଲାପରେ ମାପଚୁପ ଜାରି ରହିଛି । ଆଜି ଚତୁର୍ଥ ଥର ପାଇଁ ଖୋର୍ଦ୍ଧା ପ୍ରଶାସନର ୭ ଜଣିଆ ଟିମ ପୋଲିସ ଉପସ୍ଥିତିରେ ସାରୁଅ ଯାଇ ମାପଚୁପ କରିଛି । ତେବେ ଏହି ଟିମ୍ରୁ ବାଦ ପଡ଼ିଛନ୍ତି ବିବାଦୀୟ ବେଗୁନିଆ ତହସିଲଦାର । ପୂର୍ବରୁ ଏହି ତଦସିଲଦାର ଜଣଙ୍କ ବିରୋଧରେ ଓଟିଭି କର୍ତ୍ତୃପକ୍ଷଙ୍କ ପ୍ରତି ଅନୁକମ୍ପା ପ୍ରଦର୍ଶନ କରିଥିଲେ । ତାଙ୍କ ବିରୋଧରେ ସ୍ଥାନୀୟ ଲୋକ ଅଭିଯୋଗ କରିବା ପରେ ଜିଲାପାଳ କାର୍ଯ୍ୟାନୁଷ୍ଠାନ ପାଇଁ ରାଜସ୍ୱ ବିଭାଗକୁ ସୁପାରିସ କରିଥିଲେ ।
