ଦିଲ୍ଲୀ ମେୟର ନିର୍ବାଚନ ମାମଲା; ସୁପ୍ରିମକୋର୍ଟଙ୍କ ମୌଖିକ ମତ ପରେ ବିଜେପିକୁ ଝଟକା

ନୂଆଦିଲ୍ଲୀ: ଦିଲ୍ଲୀ ମେୟର ନିର୍ବାଚନ ମାମଲା । ସୁପ୍ରିମକୋର୍ଟଙ୍କ ମୌଖିକ ମତ ପରେ ବିଜେପିକୁ ଲାଗିଛି ଧକ୍କା । କୋର୍ଟ କହିଛନ୍ତି- ସାମ୍ବିଧାନିକ ବ୍ୟବସ୍ଥା ଅନୁସାରେ ମନୋନୀତ ସଦସ୍ୟ ଭୋଟ ଦେଇପାରିବେ ନାହିଁ । ତେବେ ଆସନ୍ତା ଶୁକ୍ରବାର ମାମଲାର ଶୁଣାଣି କରିବେ ସର୍ବୋଚ୍ଚ କୋର୍ଟ । ମେୟର ନିର୍ବାଚନରେ ମନୋନୀତ ସଦସ୍ୟଙ୍କୁ ଭୋଟ ଦେବାକୁ ଅନୁମତି ନଥିବା ବେଳେ ଉପରାଜ୍ୟପାଳ ଏ ନେଇ ଅନୁମତି ଦେବାରୁ ବିବାଦ ଆରମ୍ଭ ହୋଇଥିଲା ।

ତେବେ ଆଇନ ଅନୁଯାୟୀ ମନୋନୀତ ସଦସ୍ୟଙ୍କ ଭୋଟ ଦେଇପାରିବେ ନାହିଁ ବୋଲି ମାମଲାର ଶୁଣାଣି ପୂର୍ବରୁ କହିଛନ୍ତି ପ୍ରଧାନ ବିଚାରପତି ଡି ଓ୍ବାଇ ଚନ୍ଦ୍ରଚୂଡ଼ । ଆପ ଓ ବିଜେପି ମଧ୍ୟରେ ବିବାଦ ଯୋଗୁ ତିନି ଥର ମେୟର, ଡେପୁଟି ମେୟର ନିର୍ବାଚନ ବନ୍ଦ ରହିଛି । ଜାନୁଆରୀ ୬, ୨୪ ଓ ଫେବୃଆରୀ ୬ ତାରିଖରେ ଏମସିଡି ହାଉସରେ ବୈଠକ ବସିଥିଲେ ବି ଉପରାଜ୍ୟପାଳଙ୍କ ନୂଆ ନିୟମ ଯୋଗୁ ନିର୍ବାଚନ ହୋଇପାରି ନଥିଲା ।