ଜି-୨୦ ସମ୍ମିଳନୀ ପୂର୍ବରୁ ସାଉଦି ଆରବ ଫେରାଇନେଲା ଭାରତର ଭୁଲ ମାନଚିତ୍ର ଥିବା ନୋଟ୍

ଜି ୨୦ ସମ୍ମିଳନୀ ପୂର୍ବରୁ ସାଉଦି ଆରବ ରିୟାଦ ନୋଟ ଉପରେ ମୁଦ୍ରିତ ହୋଇଥିବା ଭାରତ ଭୁଲ ମାନଚିତ୍ରକୁ ଫେରାଇ ନେଇଛି । ୨୦ ରିୟଲ ବ୍ୟାଙ୍କ ନୋଟ ଉପରେ ଭାରତର ଭୁଲ ମାନଚିତ୍ରକୁ ମୁଦ୍ରିତ ହୋଇଥିଲା । ଯେଉଁଥିରେ ଅବିଭାଜିତ ଜାମ୍ମୁ କାଶ୍ମୀର ଏବଂ ଲଦାଖକୁ ପୃଥକ ଭାବେ ମୁଦ୍ରିତ କରାଯାଇଥିଲା । ଏହାକୁ ନେଇ ଭାରତ ବିରୋଧ କରିଥିଲା ଯାହା ପରେ ନୋଟ ଗୁଡ଼ିକୁ ପ୍ରାତ୍ୟାହାର କରିଦିଆଯାଇଛି ।

ସୂଚନା ଅନୁଯାୟୀ କେବଳ ନୋଟ୍ ପ୍ରତ୍ୟାହାର କରାଯାଇ ନାହିଁ, ଏହାର ମୁଦ୍ରଣ ମଧ୍ୟ ବନ୍ଦ କରାଯାଇଛି । ଅକ୍ଟୋବର ୨୮ରେ ସାଉଦି ଆରବ ସମ୍ମୁଖରେ ରିୟାଦରେ ଭାରତୀୟ ରାଷ୍ଟ୍ରଦୂତ ଆୟୁଷ ସଈଦ ଏହି ପ୍ରସଙ୍ଗ ଉଠାଇଥିଲେ । ୨୦ ରିୟଲ୍ ନୋଟରେ ତିଆରି ହୋଇଥିବା ବିଶ୍ୱ ମାନଚିତ୍ରରେ ଜାମ୍ମୁ କାଶ୍ମୀର ଏବଂ ଲଦାଖକୁ ଭାରତଠାରୁ ପୃଥକ ଭାବରେ ଦର୍ଶାଯାଇଛି ।

ବିବାଦୀୟ ନୋଟରେ ଗୋଟିଏ ପଟେ ରାଜା ସଲମାନ ଏବଂ ଜି -20 ସାଉଦି ସମ୍ମିଳନୀର ଲୋଗୋ ଥିବା ବେଳେ ଅନ୍ୟପଟେ ଜି -20 ଦେଶର ବିଶ୍ୱ ମାନଚିତ୍ର ଥିଲା। ମାନଚିତ୍ରରେ ପାକିସ୍ତାନ ଅଧିକୃତ କାଶ୍ମୀର , ଗିଲଗିତ-ବାଲିଟସ୍ତାନ ସହ ସମେତ ଜାମ୍ମୁ କାଶ୍ମୀରକୁ ପୃଥକ ଦେଶ ଭାବରେ ଦର୍ଶାଯାଇଥିଲା ।

ବୈଦେଶିକ ମନ୍ତ୍ରଣାଳୟର ମୁଖପାତ୍ର ଅନୁରାଗ ଶ୍ରୀବାସ୍ତବ ଗୁରୁବାର ଦିନ କହିଛନ୍ତି ଯେ, ‘ଆମେ ସାଉଦି କର୍ତ୍ତୃପକ୍ଷଙ୍କ ସହ ଭାରତୀୟ ମାନଚିତ୍ରକୁ ଭୁଲ ଉପସ୍ଥାପନ କରିବା ନେଇ ଆଲୋଚନା କରିଛୁ । ନୂଆଦିଲ୍ଲୀରେ ସାଉଦି ଅଧିକାରୀଙ୍କ ସହ ଆଲୋଚନା ହୋଇଥିଲା। ସାଉଦି କର୍ତ୍ତୃପକ୍ଷ ସୂଚନା ଦେଇଛନ୍ତି ଯେ ସେମାନେ ଏହି ପ୍ରସଙ୍ଗ ଉପରେ କାର୍ଯ୍ୟ କରିବେ ।

ସୂଚନା ଅନୁସାରେ, ଏହି ମାମଲା ନିୟନ୍ତ୍ରିତ କରାଯାଇଛି ଏବଂ ଯେଉଁ ମୁଦ୍ରା “ସ୍ମରଣିକା ଏବଂ ସଂଚାଳନ ପାଇଁ ଉଦ୍ଦିଷ୍ଟ ନଥିଲା, ସେହି ମୁଦ୍ରାକୁ ପ୍ରତ୍ୟାହାର କରାଯାଇଛି। ସୂଚନା ଯୋଗ୍ୟ ଯେ, ୧୫ ତମ ଜି -୨୦ ଶିଖର ସମ୍ମିଳନୀରେ ଅଧ୍ୟକ୍ଷତା ସାଉଦି ଆରବର ରାଜା କରିବେ । ଏଥର ଜି୨୦ ସମ୍ମିଳନୀ ଭର୍ଚୁଆଲ୍ ହେବ ।