ଭୁବନେଶ୍ୱର: ଓଡ଼ିଶା ପାଇଁ କିଛି କରିବାର ସ୍ୱପ୍ନ ଥିଲା। ସେଥିପାଇଁ ବିଜୁ ଜନତା ଦଳରେ ସାମିଲ ହୋଇଛି ବୋଲି କହିଛନ୍ତି କର୍ପୋରେଟର କିଙ୍ଗ ସଂତୃପ୍ତ ମିଶ୍ର। ସେ କହିଛନ୍ତି ଭୁବନେଶ୍ୱରରେ ସ୍କୁଲରେ ପାଠ ପଢିଥିଲି। ଓଡ଼ିଶା ପାଇଁ କାମ କରିବା ଭାଗ୍ୟର କଥା। ମୁଖ୍ୟମନ୍ତ୍ରୀଙ୍କ ଦୂରଦୃଷ୍ଟି, ବିକାଶମୂଳକ କାମ, ଆଧ୍ୟାତ୍ମିକ ଶାସନ ବ୍ୟବସ୍ଥା ଆକର୍ଷିତ କରିଛି। ନବୀନ ଓଡ଼ିଶା କାର୍ଯ୍ୟକ୍ରମରେ ଯୋଗ ଦେଇ ସହାୟତା କରିବି ବୋଲି ସଂତୃପ୍ତ କହିଛନ୍ତି।
ସଂତୃପ୍ତ ଆହୁରି କହିଛନ୍ତି, କଟକ ଜିଲ୍ଲା ବୀରପ୍ରତାପପୁରରେ ମୋ ଗାଁ। ଛୋଟ ଜାଗାରେ ପଢ଼ି ବଡ଼ ହୋଇଛି। ବଡ଼ ବଡ଼ ଦେଶରେ କାମ କରିଛି। ଏ ମାଟିର ଅବଦାନ ବହୁ ଅଧିକ। ସମସ୍ତଙ୍କ ସହ ମିଶି ପଜିଟିଭ ଦୃଷ୍ଟିକୋଣରେ କାମ କରିବୁ। ଚିନ୍ତା କରି ଦଳ ଜାତୀୟ ମୁଖପାତ୍ର ଦାୟିତ୍ୱ ଦେଇଛି। ସାମ୍ବାଦିକଙ୍କ ସହ ଆଗରୁ ସମ୍ପର୍କ ରହିଛି। ମୁଖ୍ୟମନ୍ତ୍ରୀଙ୍କ ବିଶ୍ୱାସ ମୋ ପାଇଁ ପ୍ରେରଣା। ଯେଉଁ ଦାୟିତ୍ବ ମିଳିଛି ତାହାକୁ ସୁଚାରୁରୂପେ ନିର୍ବାହ ଉପରେ କାମ କରିବି।
ରାଜନୀତିର ପ୍ରଥମ ଶ୍ରେଣୀରେ ଯୋଗ ଦେଇଛି। ଓଡ଼ିଶା ପାଇଁ କାମ କରିବାକୁ ଆସିଛି। ରାଜ୍ୟସଭା, ଲୋକସଭା ଆସନ ହେଉଛି ଦଶମ ଶ୍ରେଣୀ। ବିଜେଡି ମୋତେ ଗ୍ରହଣ କରି ଉଚ୍ଚ ମାନ ସ୍ଥାପନ କରିଛି। ବିଜେଡିରେ ବିଭିନ୍ନ ବ୍ୟକ୍ତିଙ୍କ ପାଇଁ ଜାଗା ଅଛି ତାହା ଦେଖାଇ ଦେଇଛନ୍ତି। ଏକ ଦଳ ସହ ବିଭିନ୍ନ ବିଚାର ଧାରାର ଲୋକ ଯୋଡିହେଲେ ରାଜ୍ୟର ପ୍ରଗତି ହେବ। ଜୀବନରେ ଶୃଙ୍ଖଳାର ଆବଶ୍ୟକତା ସବୁଠି ଅଛି। ରାଜନୈତିକ ଦଳମାନଙ୍କରେ ମଧ୍ୟ ଶୃଙ୍ଖଳା ଅଛି ବୋଲି ସଂତୃପ୍ତ କହିଛନ୍ତି।
