ଲକ୍ଷ୍ନୌ : ଉତ୍ତରପ୍ରଦେଶ ସମ୍ଭଲ ହିଂସା ମାମଲା। ଶାହି ଜାମା ମସଜିଦ ସର୍ଭେ ଲାଗି ଶାହି ଇଦଗା କମିଟି ହାଇକୋର୍ଟଙ୍କ ଦ୍ବାରସ୍ଥ ନହେବା ଯାଏ ନିମ୍ନକୋର୍ଟରେ କୌଣସି ଶୁଣାଣି ହୋଇପାରିବ ନାହିଁ ବୋଲି କହିଛନ୍ତି ସୁପ୍ରିମକୋର୍ଟ। ସେପଟେ ଆଜି ବିଭିନ୍ନ ସ୍ଥାନରେ ହୋଇଛି ପଥରମାଡ। ସ୍ଥିତି ନିୟନ୍ତ୍ରଣ ରଖିବାକୁ ବିଭିନ୍ନ ସ୍ଥାନରେ ମୁତୟନ ହୋଇଛନ୍ତି ସଶସ୍ତ୍ର ପୋଲିସ। ସମ୍ଭଲସ୍ଥିତ ଶାହି ଜାମା ମସଜିଦର ସର୍ଭେକୁ ନେଇ କିଛି ଦିନ ଧରି ଉତ୍ତେଜନା ଜାରି ରହିଛି। ଆଜି ଚାନ୍ଦାଉସି କୋର୍ଟରେ ମସଜିଦ ସର୍ଭେ ରିପୋର୍ଟ ଦାଖଲ ହୋଇପାରିନାହିଁ। ଶୁକ୍ରବାର ପ୍ରାର୍ଥନା ନେଇ ଉତ୍ତେଜନା ବୃଦ୍ଧି ପାଇଛି।
ସର୍ଭେ ବେଳେ ସୃଷ୍ଟି ହୋଇଥିବା ହିଂସାରେ ୪ ଜଣଙ୍କ ମୃତ୍ଯୁ ଓ ଅନେକ ପୋଲିସ ଅଧିକାରୀ ଆହତ ହେବା ଘଟଣା ପରେ ଥମୁନି ଉତ୍ତେଜନା। ଜାମା ମସଜିଦ ବନାମ ହରିହର ମନ୍ଦିର ଘଟଣାକୁ ନେଇ ଏବେ ତୀବ୍ର ଉତ୍ତେଜନା ଜାରି ରହିଛି। ବିଭିନ୍ନ ସ୍ଥାନରେ ୧୫ କମ୍ପାନୀ ନିରାପତ୍ତା ବାହିନୀ ମୁତୟନ କରାଯାଇଛି। ସାରା ସମ୍ଭଲକୁ ୫୫ ସେକ୍ଟରରେ ବିଭକ୍ତ କରାଯାଇ ଏହାର ଆଇନ ଶୃଙ୍ଖଳା ଲାଗି ବିଭିନ୍ନ ଟିମକୁ ଦାୟିତ୍ବ ଦିଆଯାଇଛି। ଡ୍ରୋନ ଜରିଆରେ ସ୍ଥିତି ଉପରେ ସଜାଗ ନଜର ରଖାଯାଇଛି।
