ନନ୍ଦିଘୋଷ ବ୍ୟୁରୋ : ସାଇବର ଠକେଇ ପାଇଁ ଝାଡ଼ଖଣ୍ଡ ଜାମତରାକୁ ସପ୍ଲାଏ ହେଉଛି ସମ୍ବଲପୁର ସିମକାର୍ଡ । ସାଇବର ଠକେଇରେ ବ୍ୟବହାର ହେଉଛି ସମ୍ବଲପୁର ଲୋକଙ୍କ ସିମ କାର୍ଡ । ତେବେ ଏହି ଅଭିଯୋଗରେ ୩ ଜଣଙ୍କୁ ଗିରଫ କରିଛି ସମ୍ବଲପୁର ସାଇବର ପୋଲିସ । ୩ଟି ସିମ ଆକ୍ଟିଭେସନ ସେଣ୍ଟରରୁ ଏହି ଜାଲିଆତି ହେଉଥିବା ସାଇବର ପୋଲିସ ଆଜି ଏକ ସାମ୍ବାଦିକ ସମ୍ମିଳନୀରେ ଖୁଲାସା କରିଛି । ଗିରଫ ହୋଇଥିବା ୩ ଜଣିଆ ଗ୍ୟାଙ୍ଗ ସମ୍ବଲପୁରର ମାଳତୀ କମ୍ୟୁନିକେସନ, ଏମାନୁଆଲ ଟେଲି କମ୍ୟୁନିକେସନ, ସୂରଜ ଷ୍ଟୋରରେ ଏହି ସବୁ କାରବାର କରୁଥିଲେ । ଯଦି କେହି ଗ୍ରାହକ ସିମ କାର୍ଡ କିଣିବାକୁ ଆସୁଥିଲେ ତାଙ୍କ ନାଁରେ ଗୋଟିଏ ବଦଳରେ ୨ ଟି ସିମ କାର୍ଡ ଆକ୍ଟିଭ କରି ଜାମତରା ଗ୍ୟାଙ୍ଗକୁ ଉଚ୍ଚ ଦରରେ ବିକ୍ରି କରୁଥିଲେ । ସାଇବର ଠକେଇରେ ଏହି ସବୁ ସିମ କାର୍ଡ ଜାମତରା ଗ୍ୟାଙ୍ଗ ବ୍ୟବହାର କରୁଥିଲା । ତେବେ ଅଭିଯୋଗ ହେବା ପରେ ପୋଲିସ ୩ ଜଣିଆ ଗ୍ୟାଙ୍ଗକୁ ଗିରଫ କରିବା ସହିତ ୧୨୦ଟି ଏୟାରଟେଲ ସିମ କାର୍ଡ ଜବତ କରିଛି । ଗିରଫ ଅଭିଯୁକ୍ତ ମାନେ ହେଲେ ସୂରଜ ବାଗ, ମାଳତୀ ଓରାମ, ସେକ ପରବେଜ । ଗିରଫ ହୋଇଥିବା ସମସ୍ତ ଅଭିଯୁକ୍ତ ସମ୍ବଲପୁର ଜିଲ୍ଲାର ହୋଇଥିବା ସାଇବର ପୋଲିସ ସୂଚନା ଦେଇଛି ।
