ବଲାଙ୍ଗୀରରେ ସମ୍ବାଦ ବାର୍ତ୍ତା ସମ୍ପାଦକଙ୍କ ଭାଇ ସରକାରୀ ଜାଗା ମାଡି ବସିଥିବା ଅଭିଯୋଗ

ବଲାଙ୍ଗୀର: ବଲାଙ୍ଗୀରରେ ଅଧ ଏକର ସରକାରୀ ଜାଗା ମାଡି ବସିଛନ୍ତି ସମ୍ବାଦ ବାର୍ତ୍ତା ସମ୍ପାଦକ ଅରବିନ୍ଦ ଦାସଙ୍କ ଭାଇ ପ୍ରତ୍ୟୁଷ ଦାସ। ସରକରୀ ଜମିରେ ଘର ଓ ଷ୍ଟଲ ନିର୍ମାଣ କରି ବ୍ୟବସାୟ କରୁଛନ୍ତି । ଅଭିଯୋଗ ପରେ ତହସିଲଦାର ପୁଷ୍ପାଞ୍ଜଳି ପଣ୍ଡାଙ୍କ ନେତୃତ୍ଵରେ ୮ଜଣିଆ ଟିମ୍ ମାପଚୁପ କରି ସରକାରୀ ଜମି ଚିହ୍ନଟ କରିଛି । ପୂର୍ବରୁ ସ୍ଥାନୀୟ ଲୋକେ ଏ ସଂପର୍କରେ ଅଭିଯୋଗ କରିଥିଲେ।

ତେବେ ପ୍ରତ୍ୟୁଷଙ୍କ ଭାଇ ଅରବିନ୍ଦ ଦାସ ସମ୍ବାଦ ଭୁବନେଶ୍ବର କାର୍ଯ୍ୟାଳୟରେ ବଡ ପଦବୀରେ ଥିବାରୁ ନିଜ କ୍ଷମତାର ଅପବ୍ୟବହାର କରି ମାମଲାକୁ ଚପାଇ ଦେଇଥିବା ସ୍ଥାନୀୟ ଲୋକ ଅଭିଯୋଗ କରିଛନ୍ତି। ୫ବର୍ଷରୁ ଅଧିକ ସମୟ ଧରି ଏହି ସରକାରୀ ଜମିରେ ଷ୍ଟଲ ନିର୍ମାଣ କରି ଲକ୍ଷ ଲକ୍ଷ ଟଙ୍କା ରୋଜଗାର କରୁଛନ୍ତି ପ୍ରତ୍ୟୁଷ।

ରାଜେନ୍ଦ୍ର ବିଶ୍ବବିଦ୍ୟାଳୟ ସମ୍ମୁଖରେ ଥିବା ପ୍ରାୟ ଅଧ ଏକର ସରକାରୀ ଜମିକୁ ଅରବିନ୍ଦଙ୍କ ଭାଇ ପ୍ରତ୍ୟୁଷ ଦାସ ବଳପୂର୍ବକ ଜବରଦଖଲ କରି ରଖିଛନ୍ତି। ଜମି ଜବରଦଖଲ କରିଥିବା ନେଇ ଅଭିଯୋଗ ହେବା ପରେ ଆଜି ଜିଲ୍ଲାପାଳଙ୍କ ନିର୍ଦ୍ଦେଶରେ ସଂପୃକ୍ତ ଜମିର ମାପଚୁପ ଆରମ୍ଭ ହୋଇଛି। ଜବରଦଖଲକାରୀଙ୍କ କବଜାରେ ଗାନ୍ଧୀ ଷ୍ଟାଡିୟମର ବାସ୍କେଟବଲ୍ କୋର୍ଟର କିଛି ଅଂଶ ମଧ୍ୟ ରହିଛି। ଏହି ସରକାରୀ ଜମିରେ ୧୨ଟି ଦୋକାନ ଘର ସହ ଏକ ଦୁଇ ମହଲା କୋଠା ରହିଛି। ଏହାର ପ୍ଲଟ ନମ୍ବର-୯୦୮, ଖାତା ନମ୍ବର-୨୭୭, ମୌଜା ବଲାଙ୍ଗିର ଜିଏରେ ରହିଛି । ଏହି ସରକାରୀ ଜମିକୁ ସମ୍ବାଦର କର୍ମଚାରୀ ଭାବେ ନିଜ ଦବଦବା ଜାହିର କରି ଜବରଦଖଲ କରିଥିବା ଅଭିଯୋଗ ହୋଇଛି।