ଭୁବନେଶ୍ବର : ସହଦେବ ନାୟକ ହତ୍ୟା ଘଟଣାରେ ସାଂଘାତିକ ଆରୋପ। ପୋଲିସକୁ କାଠଗଡାକୁ ଟାଣିଲେ ସହଦେବଙ୍କ ପତ୍ନୀ। ହତ୍ୟା ଷଡ଼ଯନ୍ତ୍ରରେ ରହିଛି ବ୍ରାଉନସୁଗାର ମାଫିଆ ଓ ପୋଲିସର ହାତ। ପୂର୍ବରୁ ସହଦେବଙ୍କୁ ଫସାଇବାକୁ ଚାହିଁଥିଲା ପୋଲିସ। ବିଳମ୍ବିତ ରାତିରେ ଭଡା ଘରେ ଧସେଇ ପଶିଥିଲେ ସ୍ପେଶାଲ ସ୍କ୍ବାଡର ୮ ଜଣିଆ ଟିମ୍ । ଶିଡି ତଳେ ନିଜେ ବ୍ରାଉନସୁଗାର ରଖି ସହଦେବଙ୍କୁ ବାନ୍ଧିବାକୁ ପୋଲିସ ରଚିଥିଲା ଷଡ଼ଯନ୍ତ୍ର। ହେଲେ ସିସିଟିଭି ପାଇଁ ଫସର ଫାଟିଥିଲା ଚକ୍ରାନ୍ତ। ଡିସିପିଙ୍କ ନିକଟରେ ଅଭିଯୋଗ ପରେ ବି ପଦକ୍ଷେପ ଶୂନ୍। ଜଘନ୍ୟ ହତ୍ୟାର ଦୁଇ ଦିନ ପରେ ପୋଲିସ ବିରୋଧରେ ଏଭଳି ସାଙ୍ଘାତିକ ଅଭିଯୋଗ ଆଣିଛନ୍ତି ସହଦେବଙ୍କ ପତ୍ନୀ। ବସ୍ତିରୁ ନିଶା ମୁକ୍ତ କରିବା ପାଇଁ ଅଭିଯାନ ଚଳାଇଥିଲେ ସହଦେବ। ପୋଲିସକୁ ଦେଉଥିଲେ ଟିକିନିଖି ସୂଚନା। ଯାହାକୁ ନେଇ ଖପ୍ପା ଥିଲେ ନିଶା ମାଫିଆ। ତେଣୁ ପୋଲିସ, ଚାନ୍ଦା ପାଇବା ଆଶାରେ ସହଦେବଙ୍କୁ ଫସାଇବା ପାଇଁ ରଚିଥିଲା ଷଡ଼ଯନ୍ତ୍ର। ଭଲକରି ଦେଖନ୍ତୁ ଏହି ସିସିଟିଭି ଭିଜୁଆଲକୁ । କିଭଳି ରକ୍ଷକ ହୋଇ ଭକ୍ଷକ ଭଳିଆ ସହଦେବଙ୍କୁ ଫସାଇବାକୁ ପୋଲିସ ନିଜେ ବ୍ରାଉନସୁଗାର ରଖି ନିଜେ ସିଜ୍ କରୁଛି। ଯାହାକୁ ଦେଖିବା ପରେ ପୋଲିସକୁ ପ୍ରଶ୍ନ କରିଥିଲେ ସହଦେବଙ୍କ ଝିଅ।
ପ୍ରଶ୍ନ ଉଠୁଛି, ଯଦି ସହଦେବ ବ୍ରାଉନସୁଗାର କାରବାର ବନ୍ଦ ପାଇଁ ଉଦ୍ୟମ କରୁଥିଲେ ତେବେ ପୋଲିସ ତାଙ୍କୁ କାହିଁକି ଫସାଇବା ପାଇଁ ଚେଷ୍ଟା କରୁଥିଲା ? କେଦାରପଲ୍ଲୀ ବସ୍ତିରେ ବ୍ରାଉନସୁଗାର କାରବାର କରୁଥିବା ମାଷ୍ଟରମାଇଣ୍ଡକୁ ବାନ୍ଧିବାକୁ କାହିଁକି ସାହସ ଜୁଟାଉନଥିଲା ପୋଲିସ ? ନା ନିଶା କାରବାର ଖବର ଦେଉଥିବା ସହଦେବଙ୍କୁ ଚୁପ କରିବାକୁ ଚାହୁଁଥିଲା ପୋଲିସ ? ପୋଲିସ ଓ ବ୍ରାଉନସୁଗାର ମାଫିଆଙ୍କ ଚୋରା ପୀରତିରେ ସହଦେବ ସାଜୁଥିଲେ କି ବାଧକ ? ଚାନ୍ଦା ନ ମିଳିବାରୁ ଏପରି ଚକ୍ରାନ୍ତ କରିଥିଲା କି ପୋଲିସ ? ନା ସହଦେବଙ୍କୁ ଫସାଇ ଜେଲରେ ରଖିବାକୁ ଚାହୁଁଥିଲା ପୋଲିସ ? ଯଦି ସହଦେବଙ୍କ ଘରେ ରେଡ୍ କରିବାକୁ ପୋଲିସ ଯାଇଥିଲା, ତେବେ ମହିଳା ପୋଲିସ କାହିଁକି ଯାଇନଥିଲେ ? ସହଦେବଙ୍କ ଘରେ ରେଡ୍ କରିବାକୁ ଯାଇଥିବା ପୋଲିସ ଅଧିକାରୀ କିଏ ? ଯଦି ଘରୁ ବ୍ରାଉନସୁଗାର ମିଳିଥିଲା, ତେବେ ପୋଲିସ ତାଙ୍କୁ ଗିରଫ କଲାନାହିଁ କାହିଁକି ? ତେଣୁ ସହଦେବଙ୍କ ହତ୍ୟା ଘଟଣାରେ ପୋଲିସ ସହ ମାଷ୍ଟରମାଇଣ୍ଡ ରମା ନାୟକ, ନିଲୁ ନାୟକ, ସୁଶେଇ ନାୟକ ସଂପୃକ୍ତ ବୋଲି କହିଛନ୍ତି ପତ୍ନୀ। ବୀଭତ୍ସ ହତ୍ୟାର ୧୨ ଘଣ୍ଟା ମଧ୍ୟରେ ଗିରଫ ହେଲେ ହତ୍ୟାକାରୀ। ମାମଲାକୁ ଗୁରୁତ୍ବପୂର୍ଣ୍ଣ କହି ବାହାବା ନେବାକୁ ଶତ ଚେଷ୍ଟା କଲା କମିଶନରେଟ ପୋଲିସ। ହେଲେ ସେଦିନ ପୋଲିସ କାହିଁକି ଶୁଣିନଥିଲା ସହଦେବଙ୍କ ଅଭିଯୋଗ। ଘଟଣାରେ ପୋଲିସର ସଂପୃକ୍ତି ଥିବା ସନ୍ଦେହରେ ତଦନ୍ତ କଲେନାହିଁ କି ସିପି ଡିସିପି। ଯାହାକୁ ନେଇ ଏବେ ପୋଲିସର କାର୍ଯ୍ୟଦକ୍ଷତା ଉପରେ ଉଠିଛି ଅନେକ ପ୍ରଶ୍ନ।
