ରକ୍ତମୁଖା ଋଷ କବଳରୁ ବର୍ତ୍ତି ପାରୁନି ୟୁକ୍ରେନ ସହର, ୬୨ ଦିନରେ ଯୁଦ୍ଧ ଜାରି

କିଭ୍: ଋଷ-ୟୁକ୍ରେନ ଯୁଦ୍ଧକୁ ପୂରିଲା ୬୨ ଦିନ । ରକ୍ତମୁଖା ଋଷ କବଳରୁ ବର୍ତ୍ତି ପାରୁନି ୟୁକ୍ରେନ ସହର । ୟୁକ୍ରେନର ବିଭିନ୍ନ ସ୍ଥାନରେ ଜାରି ରହିଛି ଋଷର ରକେଟ ମାଡ଼ । ଏକ ରେଳବାଇ କାରଖାନା ନିକଟରେ ଏୟାରଷ୍ଟ୍ରାଇକ ହେବା ଯୋଗୁ ପ୍ରାଣ ହରାଇଛନ୍ତି ୫ ଜଣ । ଆହତ ହୋଇଛନ୍ତି ୧୮ଜଣ । ଦୋନବାସକୁ କବଜା କରିବା ଲାଗି ଋଷ ପ୍ରାଣମୂର୍ଚ୍ଛା ଉଦ୍ୟମ କରିବା ସହ ଜୋରଦାର ହମଲା କରିଛି ।

ଦୁଇଦେଶର ସୀମାନ୍ତରେ ଅବସ୍ଥିତ ଋଷର ଏକ ବୃହତ ତୈଳ ଡିପୋରେ ଘଟିଛି ବଡ଼ ଧରଣର ଅଗ୍ନିକାଣ୍ଡ । ବ୍ରିୟାନସ୍କ ସହରର ଅନ୍ତର୍ଗତ ତୈଳ ଡିପୋରେ ଏହି ଅଗ୍ନିକାଣ୍ଡ ଘଟିବାରୁ ବିପୁଳ କ୍ଷତି ଘଟିଛି । ଗତ ୫ ଦିନ ତଳେ ପୋର୍ଟସିଟି ମାରିୟୁପୋଲକୁ କବଜା କରାଯାଇଛି ବୋଲି ଋଷ ରାଷ୍ଟ୍ରପତି ଭ୍ଲାଦିମିର ପୁଟିନ ଘୋଷଣା କରିଥିଲେ ମଧ୍ୟ ଏବେ ସହରରେ ହମଲା ଜାରି ରହିଛି ।

ଏହାସହ ଭୟଙ୍କର ଧ୍ବଂସଲୀଳା ଭିତରେ ସାରା ସହରର ଛାରଖାର ହୋଇଛି । ଗତକାଲି ୟୁକ୍ରେନୀୟ ସୈନ୍ୟ ୧୫୦୦ଟି ବିସ୍ଫୋରକ ଓ ୩ଟି ବୋମାକୁ ନିଷ୍କ୍ରିୟ କରିଥିବା ଦାବି କରିଛି ଷ୍ଟେଟ ଏମର୍ଜେନସି ସର୍ଭିସ । ବର୍ତ୍ତମାନ ସୁଦ୍ଧା ୟୁକ୍ରେନୀୟ ସୈନ୍ୟ ୭୮ ହଜାରରୁ ଅଧିକ ବିସ୍ଫୋରକକୁ ନିଷ୍କ୍ରିୟ କରିଥିବା କୁହାଯାଇଛି ।