ଜୀବନ ବଞ୍ଚାଇବାକୁ ୟୁକ୍ରେନରୁ ୧୧୦୦ କିଲୋମିଟର ଏକାକୀ ଯାତ୍ରା କଲା ୧୧ ବର୍ଷର ବାଳକ
କିଭ୍: ଯୁଦ୍ଧ ଭିତରେ ଜୀବନ ବାଜି । ୧୧ ବର୍ଷର ବାଳକ ଏକାକୀ ଯାତ୍ରା କଲା ୧୧୦୦ କିଲୋମିଟର । ଯୁଦ୍ଧ ଭିତରେ ୟୁକ୍ରେନରୁ ସ୍ଲୋଭାକିଆ ସୀମା ପହଞ୍ଚିଛି ନାବାଳକ । ଏକୁଟିଆ ନାବାଳକ ଏତେ ଦୂର ରାସ୍ତା ଟ୍ରେନରେ ଯାତ୍ରା କରି ସମସ୍ତଙ୍କୁ ଆଚମ୍ବିତ କରିଛି । ଯାତ୍ରା ବେଳେ ନାବାଳକ ପାଖରେ ଏକ ବ୍ୟାଗ ସହ ପାସପୋର୍ଟ ଥିଲା । ହାତରେ ସ୍ଲୋଭାକିଆର ଏକ ମୋବାଇଲ୍ ନମ୍ବର ଲେଖା ଯାଇଥିଲା ।
ଏବେ ବାଳକର ଫଟୋ ଭାଇରାଲ୍ ହେବାରେ ଲାଗିଛି । ନାବାଳକ ଜଣଙ୍କ ୟୁକ୍ରେନର ଆଣବିକ ପ୍ଲାଣ୍ଟ ଥିବା ଜପୋରିଝିଆ ଅଞ୍ଚଳର ବୋଲି ଜଣାପଡ଼ିଛି । ଯୁଦ୍ଧରୁ ଛୁଆକୁ ରକ୍ଷା କରିବା ଲାଗି ମାଆ ୧୧୦୦ କିମି ଦୂର ସ୍ଲୋଭାକିଆକୁ ପଠାଇ ଦେଇଛନ୍ତି । ତେବେ ବୁଢି ମାଆ ସହ ରହୁଥିବାରୁ ମାଆ ଏକାକୀ ଛୁଆକୁ ପଠାଇବାକୁ ବାଧ୍ୟ ହୋଇଥିବା ଜଣାପଡ଼ିଛି । ଜପୋରିଝିଆରେ ୟୁରୋପର ସବୁଠୁ ବଡ଼ ଆଣବିକ କାରଖାନା ରହିଛି । ପ୍ଲାଣ୍ଟରୁ ରେଡିଏସନ୍ ଆଶଙ୍କା କରି ସେଠାରୁ ବିପୁଳ ସଂଖ୍ୟାରେ ଲୋକ ପଳାୟନ କରୁଛନ୍ତି ।
ଏତେ ଦୂର ଯାତ୍ରା ବେଳେ ନାବାଳକକୁ ଟ୍ରେନରେ ଥିବା ଲୋକ ସାହାଯ୍ୟ କରିଥିଲେ । ନାବାଳକର ଧ୍ୟାନ ରଖିବା ସହ ଖାଇବା ପିଇବାକୁ ଦେଇଥିଲେ । ଛୁଆଟି ହାତରେ ଲେଖା ଯାଇଥିବା ମୋବାଇଲ୍ ନମ୍ବରକୁ କଲ୍ କରି ଗାର୍ଡ୍ସ ସ୍ଲୋଭାକିଆର ରାଜଧାନୀ ବ୍ରାତିସ୍ଲାଭାରେ ରହୁଥିବା ସମ୍ପର୍କୀୟଙ୍କୁ ଡାକି ଜିମା ଦେଇଥିଲେ । ସ୍ଲୋଭାକିଆ ଇଣ୍ଟରିୟର ମିନିଷ୍ଟ୍ରୀ ଛୁଆଟିର ଫଟୋକୁ ଫେସବୁକରେ ପୋଷ୍ଟ କରିବା ସହ ପ୍ରଂଶସା କରିଛି । ଛୁଆଟି ନିର୍ଭୀକ ବୋଲି ଲେଖିଛି ମନ୍ତ୍ରଣାଳୟ ।
