ଡଲାର ତୁଳନାରେ ଟଙ୍କା ଦୁର୍ବଳ, ଗୋଟିଏ ଡଲାର-୭୪.୫୫ ଟଙ୍କା

ନୂଆଦିଲ୍ଲୀ: ବୁଧବାର ଆରବିଆଇ ପଲିସି ଘୋଷଣା ପରେ ୪ ମାସ ମଧ୍ୟରେ ଟଙ୍କା ସର୍ବନିମ୍ନକୁ ଖସିଛି । ପ୍ରଥମ କ୍ୱାର୍ଟରରେ କେନ୍ଦ୍ରୀୟ ବ୍ୟାଙ୍କ ୧ ଲକ୍ଷ କୋଟିର ବଣ୍ଡ ସେକେଣ୍ଡାରୀ ମାର୍କେଟରୁ ଜିଏସ୍ଏପି ମାଧ୍ୟମରେ କ୍ରୟ କରିବାକୁ ଘୋଷଣା କରିଛି । ଏହାପରେ ଭାରତୀୟ ଟଙ୍କା ୧.୫ ପ୍ରତିଶତ ଖସି ଆମେରିକାର ଗୋଟିଏ ଡଲାର ତୁଳନାରେ ୭୪ ଟଙ୍କା ୫୫ ପଇସା ରହିଛି । ୨୦୧୯ ଅଗଷ୍ଟ ପରେ ଡଲାର ବିନିମୟରେ ଟଙ୍କାରେ ଏହା ହେଉଛି ଦୈନିକ ସର୍ବାଧିକ ହ୍ରାସ୍ ।

ମଙ୍ଗଳବାର ଗୋଟିଏ ଆମେରିକୀୟ ଡଲାର ବିନିମୟରେ ଟଙ୍କାର ମୂଲ୍ୟ ୭୪ ଟଙ୍କା ୪୩ ପଇସା ରହିଥିଲା । ରେଲିଗେୟାର ବ୍ରୋକିଂର ଉପ ସଭାପତି ସୁଗନ୍ଧ ସଚଦେବ କହିଛନ୍ତି- ଦେଶରେ କରୋନା ମାମଲା ବଢ଼ୁଥିବା ବେଳେ ବିଗତ ୫ ମାସ ମଧ୍ୟରେ ଟଙ୍କାର ମୂଲ୍ୟ ଖସିଛି ।

ଆରବିଆଇ ଲଗାତାର ପଞ୍ଚମଥର ଲାଗି ମନିଟାରୀ ପଲିସିରେ କୌଣସି ପରିବର୍ତ୍ତନ ଆଣିନଥିବା ବେଳେ କରୋନାର ଦ୍ୱିତୟ ଲହର ଟଙ୍କାକୁ ଧରାଶାୟୀ କରିଛି । କରୋନାର ଦ୍ୱିତୀୟ ଲହର ପ୍ରଭାବରେ ଘରୋଇ ଉତ୍ପାଦନ ଓ ମୁଦ୍ରା ଚାହିଦା କମିଛି । ଏହାଦ୍ୱାରା ଭାରତର ଆଭ୍ୟନ୍ତରୀଣ କ୍ଷେତ୍ର ପ୍ରଭାବିତ ହେବା ଆଶଙ୍କା କରାଯାଉଛି ।