ଡିଜିଟାଲ ଫଣ୍ଡ୍ ଟ୍ରାନ୍ସଫର କରୁଛନ୍ତି କି ? ଆଜି ମଧ୍ୟରାତ୍ରୀରୁ ୨୪ ଘଣ୍ଟା ମିଳିବ ଏହି ବ୍ୟାଙ୍କିଂ ସୁବିଧା

ମୁମ୍ବାଇ: RTGS ସୁବିଧା ଏଥର ୨୪ ଘଣ୍ଟା ମିଳିବ । ମଧ୍ୟରାତ୍ରୀ ୧୨.ଟାରୁ ଏହି ସୁବିଧା ଉପଲବ୍ଧ ହେବ । ଯେଉଁମାନେ ଡିଜିଟାଲ ପେମେଣ୍ଟ  କରିଥାନ୍ତି ସେମାନଙ୍କ ପାଇଁ ଏହା ଏକ ବଡ଼ ଖବର । ଭାରତୀୟ ରିଜର୍ଭ ବ୍ୟାଙ୍କ ରିୟଲ ଟାଇମ୍ ଗ୍ରସ ସେଟଲମେଣ୍ଟ୍ ବା ଆରଟିଏସ ସୁବିଧା ୨୪ ଘଣ୍ଟା ଉପଲବ୍ଧ କରାଇବା ପାଇଁ ନିଷ୍ପତ୍ତି ନେଇଛି । ୧୪ ଡିସେମ୍ବର ରାତି ୧୨ରୁ ଏହି ସୁବିଧା ମିଳିବା ଆରମ୍ଭ ହେବ ।

ରିଜର୍ଭ ବ୍ୟାଙ୍କ ଅନୁସାରେ ୧୪ ଡିସେମ୍ବରଠାରୁ ସପ୍ତାହକୁ ସାତ ଦିନ ଓ ଦିନକୁ ୨୪ ଘଣ୍ଟା ଏହି ସୁବିଧା ମିଳିବ । ଅର୍ଥାତ ଆପଣ ଯେତେବେଳେ ଚାହିଁବେ ସେତେବେଳେ ଆରଟିଜିଏସ୍ ଦ୍ୱାରା ଟଙ୍କା ଟ୍ରାନ୍ସଫର କରିପାରିବେ । ଭାରତ ସେହି ଅଳ୍ପ କେଇ ଦେଶଙ୍କ ମଧ୍ୟରେ ସାମିଲ ହୋଇଛି ଯେଉଁଠାରେ ୨୪ ଘଣ୍ଟା ଆରଟିଜିଏସ୍ ସେବା ମିଳିଥାଏ ।

ଆରଟିଜିଏସ୍ ଡିଜିଟାଲ ଫଣ୍ଡ୍ ଟ୍ରାନ୍ସଫରର ଏକ ମାଧ୍ୟମ ଯାହା ଦ୍ୱାରା ଆପଣ କମ ସମୟରେ ଟଙ୍କା ଟ୍ରାନସଫର କରି ପାରନ୍ତି । ଅଧିକ ଟଙ୍କା ଟ୍ରାନ୍ସଫର କରିବା ପାଇଁ ଏହାକୁ ବ୍ୟବହାର କରାଯାଇଥାଏ । RTGS ଅନ୍ତର୍ଗତରେ ଆପଣ ସର୍ବନିମ୍ନ ୨ ଲକ୍ଷ ଓ ସର୍ବାଧିକ ୧୦ ଲକ୍ଷ ଟଙ୍କା ପଠାଇ ପାରିବେ ।

୨୦୦୪ ମସିହାରେ ଭାରତରେ ପ୍ରଥମେ RTGS ସେବା ଆରମ୍ଭ ହୋଇଥିଲା । ସେତେବେଳେ ମାତ୍ର ୪ ଟି ବ୍ୟାଙ୍କ ଏହି ସେବା ଦେଉଥିଲେ । ବର୍ତ୍ତମାନ ୨୦୦ରୁ ଅଧିକ ବ୍ୟାଙ୍କ୍ ଏହି ସେବା ପ୍ରଦାନ କରୁଛନ୍ତି ।

RTGS ଜରିଆରେ ୨ ଲକ୍ଷରୁ ୫ ଲକ୍ଷ ଟଙ୍କା ଟ୍ରାନ୍ସଫର କରିବାକୁ ସର୍ବାଧିକ ୨୪.୫୦ ପଇସା ଶୁଳ୍କ ଦେବାକୁ ପଡିଥାଏ ।  ୫ ଲକ୍ଷରୁ ଅଧିକ ଟଙ୍କା ଟ୍ରାନ୍ସଫର କରିବାକୁ ୪୯.୫୦ ପଇସା ଫି’ ଦେବାକୁ ପଡେ । ଏହା ଉପରେ ଜିଏସଟି ଲାଗୁ ହୋଇଥାଏ । ତେବେ ଦେଶର ସବୁଠାରୁ ବଡ ବ୍ୟାଙ୍କ ଷ୍ଟେଟ୍ ବ୍ୟାଙ୍କ୍ ଅଫ୍ ଇଣ୍ଡିଆ ଏଥିପାଇଁ କୌଣସି ଶୁଳ୍କ ନେଇ ନଥାଏ ।