RSPରେ ଶ୍ରମିକ ଅସନ୍ତୋଷ, ବିଭିନ୍ନ ସଂଘ ପକ୍ଷରୁ ଆନ୍ଦୋଳନ

ରାଉରକେଲା: ରାଉରକେଲା ଇସ୍ପାତ କାରଖାନାରେ ସ୍ଵିକୃତି ପ୍ରାପ୍ତ ଶ୍ରମିକ ସଂଗଠନ ନିର୍ବାଚନ ତୁରନ୍ତ କରିବା ସହ ଇସ୍ପାତ କାରଖାନାର କର୍ମଚାରୀଙ୍କ ନୁତନ ମଜୁରୀ ଚୁକ୍ତିନାମା ତୁରନ୍ତ କାର୍ଯ୍ୟକାରୀ କରିବା ପାଇଁ ଦାବି କରି ଆନ୍ଦୋଳନ ଆରମ୍ଭ ହୋଇଛି । ଇସ୍ପାତ କର୍ମଚାରୀଙ୍କ ଦୁଇ ପ୍ରମୁଖ ଦାବି ପୁରଣରେ ବିଳମ୍ବ ହେଉଥିବା ପ୍ରତିବାଦରେ ସୋମବାରଠାରୁ ରାଉରକେଲା କେନ୍ଦ୍ରୀୟ ଆଞ୍ଚଳିକ ଶ୍ରମ କମିଶନରଙ୍କ ଅଫିସ ସମ୍ମୁଖରେ ଗଣ ଧାରଣା ଓ ବିକ୍ଷୋଭ ପ୍ରଦର୍ଶନ କରାଯାଇଥିଲା । ରାଉରକେଲା ଶ୍ରମିକ ସଂଘ ଓ ଗାଙ୍ଗପୁର ମଜଦୁର ମଞ୍ଚ ପକ୍ଷରୁ ଆନ୍ଦୋଳନ ଆରମ୍ଭ ହୋଇଛି ।

ଗତ ୨୦୧୭ ମସିହା ଜାନୁଆରୀ ଏକ ତାରିଖ ଠାରୁ ଇସ୍ପାତ କାରଖାନା କର୍ମଚାରୀଙ୍କ ନୁତନ ମଜୁରୀ ଚୁକ୍ତିନାମା କାର୍ଯ୍ୟକାରୀ କରିବା ପାଇଁ ସମୟ ଧାର୍ଯ୍ୟ ରହିଥିଲେ ମଧ୍ୟ ଏହା କାର୍ଯ୍ୟକାରୀ ହେବାରେ ବିଳମ୍ବ ହେଉଥିବାରୁ ସଂଘ ପକ୍ଷରୁ ଅସନ୍ତୋଷ ପ୍ରକାଶ ପାଇଛି । ଏହାସହ ରାଉରକେଲା ଇସ୍ପାତ କାରଖାନାର ସ୍ଵିକୃତି ପ୍ରାପ୍ତ ଶ୍ରମିକ ସଂଗଠନ ନିର୍ବାଚନ କରିବା ପାଇଁ ରାଉରକେଲା ଇସ୍ପାତ କାରଖାନା କର୍ତ୍ତୃପକ୍ଷ ଟାଳଟୁଳ ନୀତି ଅବଲମ୍ବନ କରୁଥିବା ଓ ବିଳମ୍ବ କରୁଥିବାରୁ ତୁରନ୍ତ ନିର୍ବାଚନ କରିବା ପାଇଁ ଦୁଇ ସଂଘ ପକ୍ଷରୁ ଦାବି କରାଯାଇ ଆନ୍ଦୋଳନ ଆରମ୍ଭ ହୋଇଛି ।