୨୩ କୋଟି ଟଙ୍କାରେ ନିର୍ମିତ ସ୍ମଗ ଟାଓ୍ବାରରେ ତାଲା ପକାଇଲେ କର୍ମଚାରୀ

ନୂଆଦିଲ୍ଲୀ : ଦିଲ୍ଲୀର ସ୍ମଗ ଟାଓ୍ବାରରେ ପଡିଲା ତାଲା। ୨୦୨୧ରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ଏହାକୁ ଉଦଘାଟନ କରିଥିଲେ। ତେବେ କର୍ମଚାରୀଙ୍କୁ ଦରମା ଦିଆଯାଇ ନପାରିବାରୁ ସେଥିରେ ତାଲା ପକାଯାଇଛି।

ଦିଲ୍ଲୀ ଓ ଆଖପାଖ ଅଞ୍ଚଳରେ ବାୟୁ ଗୁଣବତ୍ତା ହ୍ରାସ ହୋଇଥିବା ବେଳେ ୨୩ କୋଟି ଟଙ୍କା ବ୍ୟୟରେ ନିର୍ମିତ ସ୍ମଗ ଟାଓ୍ବାରରେ ତାଲା ପଡିଛି। ଦିଲ୍ଲୀ କନ୍ନଟପ୍ଲେସ ସ୍ଥିତ ଏହି ବିଲଡିଂକୁ କର୍ମଚାରୀମାନେ ତାଲା ପକାଇଦେଇଛନ୍ତି। କର୍ମଚାରୀଙ୍କୁ ଚାକିରି ଲାଗି ଗ୍ୟାରେଣ୍ଟି ଦିଆଯାଇ ନଥିବାବେଳେ ଡିସେମ୍ବରର ଦରମା ମିଳି ନଥିବାରୁ ତାଲା ପକାଯାଇଛି।

ତେବେ ସ୍ମଗ ଟାଓ୍ବାରର ପରିଚାଳନା ଲାଗି ଏକ ୧୩ ଜଣ ସଦସ୍ୟ ବିଶିଷ୍ଟ ସଂଗଠନ ଭିବଗ୍ୟୋର କନସଲଟିଂକୁ ଦାୟିତ୍ବ ଦିଆଯାଇଛି। ଏହି କୋଠାଟି ଦିଲ୍ଲୀ ପ୍ରଦୂଷଣ ନିୟନ୍ତ୍ରଣ କମିଟି ଓ ଜାତୀୟ କୋଠା ନିର୍ମାଣ ନିଗମ ଅଧୀନରେ ରହିଛି। ଏହି ଟାଓ୍ବାରରେ ଖଞ୍ଜା ଯାଇଥିବା ୫ ହଜାର ଫିଲଟର ରହିଥିଲେ ବି ସେଗୁଡିକ ପୁରୁଣା ହୋଇଯାଇଛି । ସେଗୁଡିକୁ ବଦଳାଇବା ଲାଗି ପ୍ରସ୍ତାବ ଦିଆଯାଇଛି।