୧୬ ନମ୍ବର ଜାତୀୟ ରାଜପଥରେ ସଡକ ଦୁର୍ଘଟଣା, ୧୭ ଯାତ୍ରୀ ଆହତ

ଖୋର୍ଦ୍ଧା: ୧୬ ନମ୍ବର ଜାତୀୟ ରାଜପଥ ଗଡ଼ ଖୋର୍ଦ୍ଧା ଛକ ନିକଟରେ ସଡକ ଦୁର୍ଘଟଣା । ରାସ୍ତାରେ ଛିଡ଼ା ହୋଇଥିବା ବସକୁ ଧକ୍କା ଦେଲା ହାଇୱା। ଦୁର୍ଘଟଣାରେ ୧୭ ଜଣ ଯାତ୍ରୀ ଆହତ ହୋଇଛନ୍ତି। ସମସ୍ତଙ୍କୁ ଡାକ୍ତରଖାନାରେ ଭର୍ତ୍ତି କରି ପ୍ରାଥମିକ ଚିକିତ୍ସା ଯୋଗାଇ ଦିଆଯାଇଛି। ଗୁଡ଼ାରୀରୁ ୪୨ ଜଣ ଯାତ୍ରୀଙ୍କୁ ନେଇ ବସଟି ଯାଉଥିବାବେଳେ ଖୋର୍ଦ୍ଧା ନିକଟରେ ବସଟି ଠିଆ ହୋଇଥିଲା । ଏହି ସମୟରେ ପଛରୁ ଏକ ହାଇୱା ଆସି ଧକ୍କା ଦେଇଥିଲା। ପୋଲିସ ଘଟଣାସ୍ଥଳରେ ପହଞ୍ଚି ବସ ଓ ହାଇୱାକୁ ଜବତ କରି ମାମଲାର ତଦନ୍ତ କରୁଛି ।

ଅନ୍ୟପଟେ ସାଇକେଲ ଆରୋହୀଙ୍କ ଉପରେ ଚଢିଗଲା ପିକପ୍ ଭ୍ୟାନ। ଦୁର୍ଘଟଣାରେ ସାଇକେଲ ଆରୋହୀଙ୍କ ମୃତ୍ୟୁ ହୋଇଛି। ୫୭ ନମ୍ବର ରାଜ୍ୟ ରାଜପଥ କଣ୍ଠାଳିଆ ଛକ ନିକଟରେ ଦୁର୍ଘଟଣା ଘଟିଛି। ମୃତ ବ୍ୟକ୍ତି ହେଲେ ନହରା ଗାଁର ଖଗେନ୍ଦ୍ର ଭୁଇଁୟା। ଘଟଣା ସ୍ଥଳରେ ଟାୟାର ଜାଳି ରାସ୍ତା ଅବରୋଧ। ଉଭୟ ପାର୍ଶ୍ଵରେ ଅଟକିଛି ଶତାଧିକ ଗାଡ଼ି।