ଏକାଥର ଦୁଇଟା ଗାଡ଼ିକୁ ଧକ୍କା ଦେଲା ସ୍କର୍ପିଓ, ଘଟଣାସ୍ଥଳରେ ୯ ଜଣଙ୍କ ମୃତ୍ୟୁ

ପାଟନା: ବିହାର କୈମୁର ଜିଲ୍ଲାରେ ଭୟଙ୍କର ସଡ଼କ ଦୁର୍ଘଟଣା ହୋଇଛି । ଏହି ଦୁର୍ଘଟଣାରେ ମୋଟ ୯ ଜଣଙ୍କ ମୃତ୍ୟୁ ହୋଇଛି । ଗତାକାଲି ରାତିରେ NH 2 ରେ ଏହି ଭୟଙ୍କର ଦୁର୍ଘଟଣା ହୋଇଥିବା ଜଣା ପଡ଼ିଛି । ୩ଟି ଗାଡ଼ି ପରସ୍ପରକୁ ଧକ୍କା ଦେଇଥିଲେ ।

ସୂଚନା ଅନୁସାରେ, ଏକ ସ୍କର୍ପିଓରେ ମୋଟ ୮ ଜଣ ଲୋକ ସାସରାମ ନାମକ ସ୍ଥାନରୁ ବାରଣାସୀ ଅଭିମୁଖେ ଯାଉଥିଲେ । NH 2 ରେ ମୋହାନିଆ ପୋଲିସ୍ ଷ୍ଟେସନ ନିକଟରେ ସ୍କର୍ପିଓ ବାଇକ୍ ଆରୋହୀଙ୍କୁ ଧକ୍କା ଦେଇଥିଲା । ଏହି ଦୁର୍ଘଟଣା ଏତେ ଭୟଙ୍କର ଥିଲା ଯେ, ସ୍କର୍ପିଓଟି ଡିଭାଇଡର ପାର୍ କରି ଆରପଟ ରାସ୍ତାକୁ ଚାଲି ଯାଇଥିଲା । ଅନ୍ୟ ପଟ ରାସ୍ତାରେ ଆସୁଥିବା ଟ୍ରକ ସହ ସ୍କର୍ପିଓର ପୁଣି ଧକ୍କା ହୋଇଥିଲା ।

ଏହି ଦୁର୍ଘଟଣାରେ ଘଟଣାସ୍ଥଳରେ ହିଁ ୮ ଜଣଙ୍କର ମୃତ୍ୟୁ ହୋଇଯାଇଛି । ଦୁର୍ଘଟଣାରେ ସ୍କର୍ପିଓଟି ଭାଙ୍ଗି ଚୁରମାର୍ ହୋଇଯାଇଛି । ମୋହନିଆ ପୋଲିସ ଏବଂ NHAI ଟିମ୍ ଘଟଣାସ୍ଥଳରେ ପହଞ୍ଚି ସ୍କର୍ପିଓ ଭିତରେ ଥିବା ମୃତଦେହ ଉଦ୍ଧାର କରିଥିଲେ । ମୃତକଙ୍କ ଚିହ୍ନଟ ହୋଇପାରିନାହିଁ । ସମସ୍ତ ଶବ ଜବତ କରି ପୋଲିସ ପୋଷ୍ଟମର୍ଟମ କରିବାକୁ ପଠାଇଛି ।

ଦୁର୍ଘଟଣା ପରେ ଜାତୀୟ ରାଜପଥରେ କିଛି ସମୟ ପାଇଁ ଯାତାୟତ ବାଧାପ୍ରାପ୍ତ ହୋଇଥିଲା । କ୍ଷତିଗ୍ରସ୍ତ ଗାଡ଼ିକୁ ପୋଲିସ୍ ଘଟଣାସ୍ଥଳରୁ ହଟାଇଲା ପରେ ଯାତାୟତ ହୋଇଥିଲା ।