ରିୟାଙ୍କ ବାପା ଇନ୍ଦ୍ରଜିତ ଚକ୍ରବର୍ତ୍ତୀଙ୍କୁ ପଚରାଉଚରା ପାଇଁ ସମନ ପଠାଇଲା ଇଡି

ମୁମ୍ବାଇ:  ସ୍କାନରରେ ରିୟା ଓ ତାଙ୍କ ପରିବାର ସଦସ୍ୟ । ରିୟାଙ୍କ ଭାଇ ସୌଭିକଙ୍କୁ ପଚରାଉଚରା କରାଯାଉଛି । ସୌଭିକ ସୁଶାନ୍ତଙ୍କ କମ୍ପାନୀରେ ପାର୍ଟନର ଥିଲେ। ସବୁଠାରୁ ଖାସ କଥା ହେଉଛି ଇଡି ରିୟାଙ୍କ ବାପା ଇନ୍ଦ୍ରଜିତ ଚକ୍ରବର୍ତ୍ତୀଙ୍କୁ ପଚରାଉଚରା ପାଇଁ ସମନ ଜାରି କରିଛି । କିଛି କାଗଜପତ୍ର ଯାଞ୍ଚ ପାଇଁ ମଧ୍ୟ ମଗାଯାଇଛି । ସେପଟେ ସିବିଆଇ ପୁଣି ସିଦ୍ଧାର୍ଥ ପିଠାନୀ, ନିରଜ ଓ ରଜତ ମେଓ୍ୱାନୀଙ୍କୁ ଜେରା କରୁଛି । ସେହିପରି ସୁଶାନ୍ତଙ୍କ ଓ୍ୱାଚମ୍ୟାନକୁ ମଧ୍ୟ ପଚରାଉଚରା କରାଯାଉଛି । ରିୟାଙ୍କ ନାଁରେ ସଂଗୀନ ଅଭିଯୋଗ ଆଣିଛନ୍ତି ସୁଶାନ୍ତଙ୍କ ବାପା । ଲମ୍ବା ସମୟ ଧରି ରିୟା ସୁଶାନ୍ତଙ୍କୁ ବିଷ ପିଆଉଥିଲେ । ସେ ହିଁ ହତ୍ୟାକାରୀ । ରିୟା ଓ ତାଙ୍କ ସହଯୋଗୀଙ୍କୁ ତଦନ୍ତକାରୀ ସଂସ୍ଥା ଶୀଘ୍ର ଗିରଫ କରୁ ବୋଲି ସେ ଦାବି କରିଛନ୍ତି । ସେପଟେ ରିୟାଙ୍କ ଡ୍ରଗ୍ସ କାରବାରରେ ଭୁବନେଶ୍ୱର ଲିଙ୍କ ରହିଥିବା ଖବର ସାମ୍ନାକୁ ଆସିଛି । ଡିଲିଟ ହୋଇଥିବା ହ୍ୱାଟ୍ସାଆପ ଚାଟରେ ରିୟାଙ୍କ ସନ୍ଦେହ ଜନକ ମେସେଜକୁ ନେଇ ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି । ରିୟା ସିମୋନ ଖମ୍ବାଟାଙ୍କ ସହ ଚ୍ୟାଟରେ ଭୁବନେଶ୍ୱର ନେଇ କଥା କହିଛନ୍ତି । ସିମୋନଙ୍କ ସହ ଡ୍ରଗ୍ସ ଲିଙ୍କ ନେଇ ଆଗରୁ ଚର୍ଚ୍ଚା ହେଉଥିଲା । ଆଉ ଏବେ ଭୁବନେଶ୍ୱରକୁ ନେଇ ରିୟାଙ୍କ ଚ୍ୟାଟ ସନ୍ଦେହ ବଢାଇଛି । ତେବେ ଭୁବନେଶ୍ୱର ଲିଙ୍କ ନେଇ ସିବିଆଇ, ଇଡି କିମ୍ବା ନାର୍କୋଟିକ ବ୍ୟୁରୋ ପକ୍ଷରୁ ସ୍ପଷ୍ଟ କରାଯାଇନି । ସେପଟେ ସୁଶାନ୍ତ ସିଂ ମୃତ୍ୟୁ ମାମଲାରେ ଯୋଡ଼ି ହୋଇଛି ଡ୍ରଗ୍ସ ଆଙ୍ଗଲ । ରିୟାଙ୍କ ହ୍ୱାଟ୍ସାଆପ ଚ୍ୟାଟରୁ  ମିଳିଛି ତାଙ୍କ ଡ୍ରଗ୍ସ କନେକ୍ସନକୁ ନେଇ ସୁରାକ । ଏହାକୁ ନେଇ ନାରକୋଟିକ୍ସ କଣ୍ଟ୍ରୋଲ ବ୍ୟୁରୋ ଆକ୍ସନ ମୋଡକୁ ଆସିଛି । ଏଥିପାଇଁ ମାମଲା ରୁଜୁ କରାଯାଇଛି । ଖୁବ ଶୀଘ୍ର ରିୟାଙ୍କୁ ସମନ ପଠାଯିବ ।

ସୁଶାନ୍ତ ମାମଲାରେ ଆର୍ଥିକ କାରବାର ନେଇ ଇଡିର ତଦନ୍ତ ବେଳେ ଡ୍ରଗ୍ସ ଲିଙ୍କ ନେଇ ସୁରାକ ମିଳିଥିଲା । ରିୟାଙ୍କ ସମେତ ୪ଜଣଙ୍କ ନାଁରେ ମାମଲା ରୁଜୁ ହୋଇଛି । ସୁଶାନ୍ତଙ୍କ ମ୍ୟାନେଜର ସାମୁଏଲ ମିରାଣ୍ଡା, ଟ୍ୟାଲେଣ୍ଟ ମ୍ୟାନେଜର ଜୟା ସାହା ଓ ଗୌରବ ଆର୍ୟ୍ୟାଙ୍କ ନାଁରେ ମାମଲା ରୁଜୁ ହୋଇଛି । ୪ଜଣଙ୍କ ହ୍ୱାଟ୍ସାଆପ ଚାଟରେ ଡ୍ରଗ୍ସ କାରବାର ନେଇ ତଥ୍ୟ ମିଳିଛି । କିଏ ଡ୍ରଗ୍ସ ନେଉଥିଲେ, କାହାକୁ ଦିଆଯାଉଥିଲା, କେଉଁଠୁ ଆସୁଥିଲା ଓ ଡ୍ରଗ୍ସ ଡିଲର କିଏ ଥିଲେ, ସେନେଇ ପଚରାଉଚରା କରାଯାଇପାରେ ।