ସୁଶାନ୍ତଙ୍କ ମୃତ୍ୟୁ ପରେ ମୁମ୍ବାଇ ପୋଲିସର କେଉଁ ବଡ ଅଫିସରଙ୍କୁ ଲଗାତର କଲ୍ କରୁଥିଲେ ରିୟା ?

ମୁମ୍ବାଇ : ଆକ୍ଟର ସୁଶାନ୍ତ ସିଂହ ରାଜପୁତ ମାମଲା ତଦନ୍ତ ଯେତେ ଆଗକୁ ବଢୁଛି ସେତେ ନୂଆ ତଥ୍ୟ ସାମ୍ନାକୁ ଆସୁଛି । ଏହି ତଥ୍ୟ ଘଟଣାକୁ ନୂଆ ଦୀଗ ଦେଉଥିବା ବେଳେ ରିୟାଙ୍କ ମୁସ୍କିଲକୁ ବଢାଇବାରେ ଲାଗିଛି ।  କେବଳ ରିୟା ନୁହନ୍ତି ଏବେ ପ୍ରଶ୍ନ ଘେରକୁ ମୁମ୍ବାଇ ପୋଲିସ ମଧ୍ୟ ଆସିଲାଣି । ଏବେ ରିୟାଙ୍କ କଲ ଡିଟେଲସରୁ ଆଉ ଗୋଟିଏ ଚମକାଇବା ଭଳି ତଥ୍ୟ ସାମ୍ନାକୁ ଆସିଛି । କୁହାଯାଉଛି ଯେ, ସୁଶାନ୍ତଙ୍କ ମୃତ୍ୟୁ ପରେ ରିୟା ଚକ୍ରବର୍ତ୍ତି ଲଗାତର ମୁମ୍ବାଇ ପୋଲିସର ଜଣେ ବରିଷ୍ଠ ଅଧିକାରୀଙ୍କ ସଂପର୍କରେ ଥିଲେ ।

କିଏ ସେହି ପୋଲିସ ଅଧିକାରୀ ?

ବାନ୍ଦ୍ରା ଡିସିପି ଅଭିଶେକ ତ୍ରିମୁଖେଙ୍କ ସମ୍ପର୍କରେ ରିୟା ଥିଲେ ବୋଲି ତାଙ୍କ କଲ ଡିଟେଲରୁ ଜଣା ପଡୁଛି । ଉଭୟଙ୍କ ମଧ୍ୟରେ ୪ ଥର ଫୋନରେ କଥାବାର୍ତ୍ତା ହୋଇଥିଲା । ଏହା ସହ ମେସେଜ୍ ଜରିଆରେ ମଧ୍ୟ ସଂପର୍କରେ ଥିଲେ ବୋଲି ଜଣା ପଡିଛି ।  ମିଳୁଥିବା ସୂଚନା ମୁତାବକ ଜୁନ୍ ୨୧ ତାରିଖ ଦିନ ବାନ୍ଦ୍ରା ଡିସିପିଙ୍କୁ ରିୟା ଫୋନ୍ କରିଥିଲେ । ୨୮ ସେକେଣ୍ଡ୍ ପର୍ଯ୍ୟନ୍ତ ଉଭୟଙ୍କ ମଧ୍ୟରେ କଥାବାର୍ତ୍ତା ହୋଇଥିଲା । ଜୁନ୍ ୨୨ ତାରିଖ ଦିନ ଡିସିପି ରିୟାଙ୍କୁ ମେସେଜ୍ କରିଥିଲେ । ଏହାପରେ ଡିସିପି ୨୨ ଜୁନରେ ରିୟାଙ୍କ ସହ ୨୯ ସେକେଣ୍ଡ କଥା ହୋଇଥିଲେ । ଏହାର ୮ ଦିନ ପରେ ଡିସିପି ପୁଣିଥରେ ରିୟାଙ୍କୁ କଲ କରିଥିଲେ । ଏଥରକ କଥାବାର୍ତ୍ତା ୬୬ ସେକେଣ୍ଡ୍ ଚାଲିଥିଲା । ଶେଷଥର ପାଇଁ ରିୟାଙ୍କ ପଟୁ ଜୁଲାଇ ୧୮ ତାରିଖ ଦିନ ଡିସିପିଙ୍କୁ କଲ୍ ଯାଇଥିଲା ।

ମୁମ୍ବାଇ ପୋଲିସ ଦେଲା ସଫେଇ

ତେବେ ମୁମ୍ବାଇ ପୋଲିସ କହୁଛି ଯେ, ରିୟାଙ୍କୁ ବାନ୍ଦ୍ରା ଓ ସାନ୍ତାକ୍ରୁଜ୍ ପୋଲିସ ଷ୍ଟେଶନ ଜେରା ପାଇଁ ଡକା ଯାଇଥିଲା । ଏହା ସେହି ସମୟର କଲ । ଅଫିସ କାମ ପାଇଁ ଫୋନ୍ କରାଯାଇଥିଲ ।

ଅନେକ ପ୍ରଶ୍ନ

ଯେଉଁ ବ୍ୟକ୍ତିଙ୍କ ବିରୋଧରେ ତଦନ୍ତ ଚାଲୁଥିଲା ତାଙ୍କ ସମ୍ପର୍କରେ ଜଣେ ଡିସିପି ରାଙ୍କ ଅଧିକାରୀଙ୍କ ରହିବାକୁ ନେଇ ଅନେକ ପ୍ରଶ୍ନ ଉଠୁଛି ।  ଏବେ ପ୍ରଶ୍ନ ଉଠୁଛି ଯେ, ୨୮,୨୯,୬୬ ଓ ୬୧ ସେକେଣ୍ଡ୍ ମଧ୍ୟରେ ଡିସିପିଙ୍କୁ ରିୟା କ’ଣ ସୂଚନା ଦେଇଥିଲେ ? ରିୟା ଡିସିପିଙ୍କ ସହ କ’ଣ କଥା ହୋଇଥିଲେ ? ଡିସିପି କଣ ପାଇଁ ଲଗାତର ଭାବେ ରିୟାଙ୍କ ସଂପର୍କରେ ଥିଲେ ? ଏହି ପ୍ରଶ୍ନ ସବୁର ଉତ୍ତର ଡିସିପି କିମ୍ବା ରିୟା ହିଁ ଦେଇ ପାରିବେ ।