ବର୍ଷକ ମଧ୍ୟରେ ସୁଶାନ୍ତଙ୍କଠାରୁ ରିୟା ନେଇଥିଲେ ୧୪ କୋଟି ଟଙ୍କା !
ପାଟନା: ଅଭିନେତା ସୁଶାନ୍ତ ସିଂହ ରାଜପୁତଙ୍କ ପିତା କେ କେ ସିଂହ ପାଟନାର ରାଜିବ ନଗର ଥାନାରେ ଆଜି ପୁଅର ଗର୍ଲଫ୍ରେଣ୍ଡ୍ ରିୟା ଚକ୍ରବର୍ତ୍ତିଙ୍କ ବିରୋଧରେ ଏଫଆଇଆର ଦାଏର କରିଛନ୍ତି । ସୁଶାନ୍ତଙ୍କ ପିତାଙ୍କ ଅଭିଯୋଗ ଯେ, ରିୟା ତାଙ୍କ ପୁଅକୁ ପ୍ରେମ ଜାଲରେ ଫଶାଇ ଟଙ୍କା ହଡପ କରିବା ସହ ଆତ୍ମହତ୍ୟା ପାଇଁ ଉସକାଇଥିଲେ । ଏହି ମାମଲାର ତଦନ୍ତ ପାଇଁ ପାଟନା ପୋଲିସ ମୁମ୍ବାଇରେ ପହଂଚି ସାରିଛି ।
ଆଇପିସିର ସେକ୍ସନ ୩୪୦,୩୪୧,୩୪୨,,୩୮୦,୪୦୬,୪୨୦,୩୦୬ ଅନ୍ତର୍ଗତରେ ପୋଲିସ ମାମଲା ରୁଜ କରିଛି । ରିୟାଙ୍କ ସମେତ ଏଫାଆଇଆରରେ ଇନ୍ଦ୍ରଜିତ ଚକ୍ରବର୍ତ୍ତି,ସଂଧ୍ୟା ଚକ୍ରବର୍ତ୍ତି,ଶୋଭିକ୍ ଚକ୍ରବର୍ତ୍ତି,ସାମୁଏଲ ମିରଣ୍ଡା ଓ ଶୃତି ମୋଦିଙ୍କ ନାମ ରହିଛି । ସୁଶାନ୍ତଙ୍କ ପିତାଙ୍କ ଅଭିଯୋଗ ଅନୁସାରେ ଗୋଟିଏ ବର୍ଷ ମଧ୍ୟରେ ରିୟାଙ୍କ ପରିବାର ସୁଶାନ୍ତଙ୍କଠାରୁ ୧୪ କୋଟି ୫୦ ଲକ୍ଷ ଟଙ୍କା ଠକି ନେଇଥିଲେ । ଏହି ସବୁ ଟଙ୍କା ଅନଲାଇନ୍ ଟ୍ରାନ୍ସଫର ହୋଇଥିଲା । ଯାହାର ରେକର୍ଡ ପରିବାର ପକ୍ଷରୁ ପୋଲିସକୁ ଦିଆଯାଇଛି ।
ସୂଚନାଯୋଗ୍ୟ ଯେ, ନିକଟରେ ମୁମ୍ବାଇ ପୋଲିସ ରିୟାଙ୍କୁ ଏହି ମାମଲାରେ ପଚରାଉଚରା କରିଥିଲା । ତାଙ୍କୁ ୧୧ ଘଣ୍ଟା ଧରି ଜେରା କରାଯାଇଥିଲା । ସୁଶାନ୍ତଙ୍କ ମୃତ୍ୟୁ ପରେ ତାଙ୍କ ଫ୍ୟାନ୍ ରିୟାଙ୍କୁ ଟ୍ରୋଲ୍ କରିବା ଆରମ୍ଭ କରିଥିଲେ । ନିଜକୁ ନିର୍ଦ୍ଦୋଷ ବୋଲି କହି ରିୟା ମାମଲାର ସିବିଆ ତଦନ୍ତ ଦାବି ମଧ୍ୟ କରିଥିଲେ । ଏପରିକି ସେ ଦେଶର ଗୃହମନ୍ତ୍ରୀ ଅମିତ ଶାହଙ୍କୁ ଟ୍ୱିଟ୍ କରି ସିବିଆଇ ତଦନ୍ତ ପାଇଁ ନିବେଦନ କରିଥିଲେ ।
ସୁଶାନ୍ତ ଡିପ୍ରେସନର ଶିକାର ଓ ତାଙ୍କ ଜୀବନରୁ ରିୟା ବାହାରି ଯାନ୍ତୁ ବୋଲି ମହେଶ ଭଟ୍ଟ ତାଙ୍କୁ ପରାମର୍ଶ ଦେଇଥିବା କଥା ମଧ୍ୟ ଜୁନ୍ ୧୪ ତାରିଖର ଘଟଣା ପରେ ସାମ୍ନାକୁ ଆସିଥିଲା । ତେବେ ଗତକାଲି(ସୋମବାର ) ମହେଶ ମୁମ୍ବାଇ ପୋଲିସ ଆଗରେ ସେ କେବେ ମଧ୍ୟ ରିୟାଙ୍କୁ ଏଭଳି କହିନାହାନ୍ତି ବୋଲି କହିଛନ୍ତି । ସୂଚନାଯୋଗ୍ୟ ଯେ, ସୁଶାନ୍ତଙ୍କ ମୃତ୍ୟୁ ପରେ ତାଙ୍କ ଆପାର୍ଟମେଣ୍ଟରୁ କୌଣସି ସୁଇସାଇଡ୍ ନୋଟ୍ ପୋଲିସକୁ ମିଳିନାହିଁ ।
