ବାଇଡେନଙ୍କ ପରେ ଆଜି ଇସ୍ରାଏଲ ପ୍ରଧାନମନ୍ତ୍ରୀଙ୍କୁ ଭେଟିବେ ବ୍ରିଟେନ ପ୍ରଧାନମନ୍ତ୍ରୀ ଋଷି ସୁନକ

ନୂଆଦିଲ୍ଲୀ :  ଆମେରିକା ରାଷ୍ଟ୍ରପତି ଜୋ ବାଇଡେନଙ୍କ ପରେ ଆଜି ବ୍ରିଟେନ ପ୍ରଧାନମନ୍ତ୍ରୀ ଋଷି ସୂନକ ଇସ୍ରାଏଲ ଯିବେ । ସେଠାରେ ଯୁଦ୍ଧର କ୍ଷୟକ୍ଷତି ଓ ହମାସ ବିରୋଧରେ ଚାଲିଥିବା ଯୁଦ୍ଧ ପରିଣାମ ସମ୍ପର୍କରେ ଆଲୋଚନା କରିବେ । ଇସ୍ରାଏଲ ଉପରେ ହମାସର ଆକ୍ରମଣକୁ ଦୃଢ ନିନ୍ଦା କରିଛନ୍ତି ଋଷି ସୁନକ । ଇସ୍ରାଏଲକୁ ସମର୍ଥନ କରିବା ପାଇଁ ଏହି ଗସ୍ତରେ ଯାଉଛନ୍ତି ସୂନକ ।
ଆମେରିକା ଭଳି ଭୁଲ ନକରିବାକୁ ଇସ୍ରାଏଲକୁ ଚେତାଇ ଦେଲେ ରାଷ୍ଟ୍ରପତି ଜୋ ବାଇଡେନ । ଆମେରିକା ଉପରେ ହୋଇଥିବା ୯-୧୧ ଆତଙ୍କବାଦୀ ଆକ୍ରମଣ ପରେ ରାଗରେ ବହୁ ଭୁଲ କରିଛି ଆମେରିକା । ଏଭଳି ଭୁଲକୁ ଆଦୌ ନକରୁ ଇସ୍ରାଏଲ । ଆମେରିକା ଉପରେ ହୋଇଥିବା ଆକ୍ରମଣଠୁ ହମାସର ଆକ୍ରମଣ ବହୁତ ବଡ଼ । ଇସ୍ରାଏଲ ଗୋଟିଏ ଛୋଟିଆ ଦେଶ ।

ସେଠାରେ ଗୋଟିଏ ଆକ୍ରମଣରେ ହଜାର ହଜାର ଲୋକଙ୍କ ମୃତ୍ୟୁ ହେବା ଆଦୌ ଠିକ୍‌ ହୋଇନାହିଁ । ଏଥିସହ ପାଲେଷ୍ଟାଇନ ସମର୍ଥନରେ ମଧ୍ୟ କହିଛନ୍ତି ବାଇଡେନ । ହମାସକୁ ସମର୍ଥନ କରୁନାହିଁ ପାଲେଷ୍ଟାଇନ୍‌ । ହମାସ ପାଲେଷ୍ଟାଇନକୁ ପ୍ରତିନିଧିତ୍ବ କରେ ନାହିଁ । ଏହା ଗୋଟିଏ ଆତଙ୍କୀ ସଂଗଠନ । ଗାଜାରେ ସାଧାରଣ ଲୋକଙ୍କର ହୋଇଥିବା କ୍ଷତିକୁ ସୁଧାରିବା ପାଇଁ ୧୦୦ ମିଲିୟନ ଡଲାରର ସହାୟତା ଘୋଷଣା କରିଛନ୍ତି ଜୋ ବାଇଡେନ । ଏହି ଅର୍ଥ ଯେମିତି ହମାସ ପାଖରେ ନପହଞ୍ଚେ ସେଥିପାଇଁ ଏକ ମେକାନିଜିମ ପ୍ରସ୍ତୁତ ହେବ ବୋଲି କହିଛନ୍ତି ବାଇଡେନ ।

ତେବେ ଇସ୍ରାଏଲ ଆମେରିକା ଭଳି ଭୁଲ କରିବାକୁ ଚେତାଇଛନ୍ତି ବାଇଡେନ । ୯-୧୧ର ଘଟଣା ପରେ ଆମେରିକାବବାସୀ କ୍ରୋଧିତ ହୋଇଥିଲେ । ନ୍ୟାୟ ଚାହିଁଥିଲେ ଏବଂ ନ୍ୟାୟ ପାଇଥିଲେ ମଧ୍ୟ ସେତେବେଳେ ଅନେକ ଭୁଲ୍ କରିଥିଲା ଆମେରିକା । ଏହାର ପୁନରାବୃତ୍ତି କରନ୍ତୁନାହିଁ ବୋଲି ଇସ୍ରାଏଲକୁ କହିଛନ୍ତି ବାଇଡେନ । ଅନ୍ୟ ପଟେ ଗାଜା ଡାକ୍ତରଖାନା ଆକ୍ରମଣ ଘଟଣାରେ ଇସ୍ରାଏଲକୁ କ୍ଲିନ୍ ଚିଟ୍ ଦେଇଛି ଆମେରିକା । ମହାକାଶରୁ ପ୍ରାପ୍ତ ଚିତ୍ର ଏବଂ ହସ୍ତଗତ ହୋଇଥିବା ଗୁଇନ୍ଦା ତଥ୍ୟକୁ ଆଧାର କରି ଆମେରିକୀୟ ଗୁପ୍ତଚର ଏଜେନ୍ସି ଦର୍ଶାଇଛନ୍ତି ଯେ ଗାଜା ଡାକ୍ତରଖାନା ଉପରେ ହୋଇଥିବା ରକେଟ୍ ଆକ୍ରମଣ ପଛରେ ଇସ୍ରାଏଲର ହାତ ନାହିଁ। ଏଠାରେ ଘଟିଥିବା ଶହ ଶହ ଲୋକଙ୍କ ମୃତ୍ୟୁ ପାଇଁ ଇସ୍ରାଏଲର ଦାୟୀ ନୁହେଁ।